港隊出線形勢：作客平壤先係關鍵一戰？｜KH筆記
亞洲盃外圍賽最後一圈今晚重燃戰火，香港將會喺大球場迎戰已經出線嘅黎巴嫩。隨住北韓憑金俞星連中三元，加上朴光龍入波，中立場以4-1擊敗馬來西亞，B組嘅最後一個出線席位就係港隊同北韓之爭。對於最後兩場分別主場迎戰黎巴嫩，與及作客北韓嘅港隊，呢輪比賽之後嘅出線形勢會係點呢？
首先講下同分之下，決定小組排名嘅順序：(1) 對賽成績；(2) 對賽得失球差；(3) 對賽得球；(4) 對賽作客入球；(5) 總得失球差；(6) 總得球。(之後嗰啲應該都用唔著，所以不在此列啦。)
如果港隊擊敗黎巴嫩嘅話，將會同北韓同分，不過依然會因為對賽作客入球較少而暫列小組第三。出年三月作客北韓打和0-0嘅話，港隊依然要出局；如果打和1-1，就要視乎總得失球差 (如果今場港隊淨勝兩球，下場打和1-1就可以出線)；不過只要以2-2或以上嘅比數逼和對手，港隊就可以同黎巴嫩攜手出線。
一旦港隊未能全取三分，最後一場作客北韓就必須取勝。然而，就算香港俾黎巴嫩打到七個一皮，因為亞洲盃外圍賽係先睇對賽成績，只要贏到北韓，就可以憑較佳嘅戰績，力壓對手晉身決賽周。
10-0贏黎巴嫩，打和北韓都有機會出局；俾黎巴嫩大炒40-0，贏北韓一球照樣出線。真正嘅「生死戰」，其實還望作客平壤。不過咁並唔代表主場對黎巴嫩唔重要：贏波賺國際賽分，力壓大馬保住未來嘅亞冠盃分組賽資格，其實對本地足球而言，同樣關鍵。
