紐迷筆記﹕孤單的北境之王 | The Outsider
權力遊戲(美劇《Game of Thrones》)播到第七季，今季私生子瓊恩雪諾(Jon Snow)成為北境之王，正當各地開戰不斷，但係夜王(Night’s King)正率領異鬼軍團(Wigthts)越過長城進入北境想將人類消滅。北境之內唔係人人都相信異鬼既存在，瓊恩雪諾就好似一個傻瓜咁，帶住半信半疑既臣民去保護家園， 感覺相當孤單。而紐卡素作為英格蘭東北足球代表，又何嘗唔孤單呢？
17-18球季紐卡素係注定孤獨既。上個球季降班三隊全部位處東北，對東北足球勢力嚟講好大打擊。新特蘭同紐卡素兩間球會嘅世仇關係大家都應該有所聽聞。唔講唔知，查返wiki新特蘭竟然有個花名叫「英倫銀行球會」（Bank of England club），因為喺二十世紀初既年代，球會經常花費巨額金錢購買球員之故，所以大家唔使好奇佢地點解啲球員成日轉出轉入喇！不過使得多錢未必有回報，上季黑貓表現大家應該明白，洗錢要洗得其所。
米杜士堡名義上歸屬(North Yorkshire)，但係由紐卡素揸車過去都係一個鐘頭左右，本身屬於自治市鎮嘅米杜士堡，好多時佢地都當自己係泰恩-威爾郡(Tyne and Wear )既一份子。 紐卡素同米杜士堡嘅比賽，叫「泰恩-蒂斯打吡」（Tyne-Tees derby） ，相比同新特蘭既「泰恩-威爾打吡」（Tyne-Wear derby )溫和好多。要知道當年我親戚做生意，紐卡素輸波就好似打風咁，要小心窗戶唔好被人打爆！同埋近年嚟兩隊波好少同一個聯賽對碰，最多都係紐記誤請麥膠倫，米杜士堡仝人真係多謝晒……
侯城上球季因為收購事件影響，不論組軍、請主帥等等事宜大打節扣之下，成績慘不忍睹。雖然一月之後請到馬高斯華(Marco Silva) 走馬上任，曾經俾到球迷希望，只係失分太多，季尾幾場你話失準好、欠運好，總之就係護級失敗。下季喺英冠會點，真係要睇下先知。
講返紐卡素，紐記借用多蒙特中後場球員米基爾馬連奴 (Mikel Merino)之後，有傳賓尼迪斯被肥佬主席閂水喉，要求佢要賣人換錢先可以再買人，更有傳佢會憤而離職。最近一場熱身賽對德甲既緬恩斯(1. FSV Mainz 05) ，紐卡素表現不濟輸1:2。比賽過程肥賓看似淡定，訪問亦唔見有幾失望，至於增唔增兵又不置可否……
