當受傷變成另類祝福 | 蔣美葉
近一、兩個月，好容易就係各大討論區有關利物浦嘅帖就見到有人大肆批評紅軍兩閘表現強差人意。對兩閘嘅批評，我先想講嘅係，不妨睇下一啲數據先：
占士米拿 2016/17 上陣次數：
聯賽 37 場賽事裡上陣 35 場
聯賽盃 6 踢 4
足總盃 3 踢 0
佳尼：
聯賽 37 踢 36
聯賽盃 6 踢 4
足總盃 3 踢 0
* 參考自 transfermarkt.co.uk
我明白，職業球員喺咁高水平嘅比賽作賽，每星期?咁高人工，球迷要高求係理所當然；我亦都明白，防守球員一次半次犯錯足以斷送成個職業生涯，睇下 Karius 又或者 Moreno，所以球迷對閘位嘅要求比攻擊球員高，或者容忍度比攻擊球員低都係可以理解。
戴足兩個頭盔後我先敢講，其實有無諗過球場上十一個球員，邊個位置嘅體力消耗係最大？又有無諗過，要站穩一個正選閘位，球員需俱備咩嘅條件？
第一個問題，我諗答案已經呼之欲出；第二個問題，廿年前會簡單啲，速度或體能，兩樣條件俱備其中一樣，加埋前面隻翼攻擊力夠強同埋會回後幫輕下，都可能可以撞彩上神枱，最經典嘅例子係加利仔（包返底講句，加利仔又未至於一文不值嘅，但如果佢遲十年出世，最信佢今日唔會係曼聯留到掛靴）。而今時今日，要係英超打閘佔一席正選位，除非隊波無哂其他人選得返你一個，唔係你除咗要有返咁上下速度同體能之餘，出波同引球推進都要有返咁上下，又或者你嘅防守能力同企位好好，可以暫時替代中堅位置，俾出擊能力高嘅中堅暫時離開位置上前助攻。前者嘅英超最佳人辨我會揀華倫西亞，後者嘅英超最佳人辨我會揀上季嘅艾斯派古達（今季索性變埋中堅）。
講返利物浦兩閘。佳尼，速度絕對係有，出擊能力未必出眾，但試問利記都無一個十分善頂嘅中鋒，防守方面我覺得中上，甚至係上佳；而米拿，唔使多講，繼古治後利物浦嘅新金霸王之一（當然 Lallana 體能較好，但 Lallana 比米拿年輕），速度嚟講，面對英超咁多快翼一定唔可以稱米拿為快，但米拿好多時鬥心夠、唔放棄，都叫纏得住啲快翼，同埋最重要一樣，特別比起摩蘭奴，米拿喺後場係好少打高章，有咩唔對路勝在左右腳都可以清返個波上前場。助攻方面，季初嘅米拿明顯只得一瓣：左腳扣大位順腳斬中。老老實實，要求再低嘅球迷都好難滿意咁嘅閘位助攻能力。但當十月成隊都好順時，米拿係左路同隊友係有啲小組配合。或者，兩閘助攻能力都受制於前場隊友發揮？
唔係要為兩閘辯護而推卸責任，相反，無疑兩閘去到季尾跌 Watt 係好明顯，特別米拿，我唔反對近兩三場球迷對佢嘅批評，尤其係對屈福特場夜波，開波初段嘅米拿的確係好曳。我再仆街啲講句，米拿唔係對修咸頓射失十二碼後攬哂所有責任上身攞返同情分，我相信佢已經成為咗球迷們嘅槍靶。但差還差，鬧還鬧，若果球迷因為球員踢足成季，嚟到季尾跌 Watt 又話要劏要殺，其實真係難聽過粗口。費事搞到開名我先唔 Quote 返班專家大約講過啲咩。
有時我自己都會話，不如用下摩蘭奴收起米拿抖下，但摩蘭奴一出嚟就整球世紀浪射又真係好難幫得落。至於對青訓嘅迷思，TAA 係咪真係可以勝任英超賽事正選右閘呢，生理上如無意外係可以，但英藉或英本土青訓球員嘅問題往往都係心理大於生理，教練團有見及此對青訓嘅保護其實係好明顯，你唔會見到利物浦輸波時會出個新人出嚟博，最多都重係和緊波先會出個新人出嚟博下，但大多數時間都係紅軍贏緊波先會見到 Woodburn、TAA 或 Ejaria 嘅後備入替。
所以，又係阿Q咁諗，其實作為利物浦 Fans，我地應該感恩有佳尼同米拿打閘，而且 Touch Wood 講，佢地今季都無乜受傷，如果唔係個傷兵潮又豈止季中嘅中堅荒同三月嘅前鋒荒？季尾跌 Watt 就…都要忍架啦，唔係點呀？重有最後一場，撐埋佢就放假啦！
最後，反而想知，可以下巴輕輕郁啲就話要賣走呢個、賣走嗰個嘅利迷其實係咩心態？
