曼聯盤數已玩爛 Jim Ratcliffe入場能撥亂反正？｜中環十一少

由中環十一少 · 已發表 17/10/2023 · 已更新 17/10/2023

曼聯賣盤傳出最新消息，最後會由英國首富Jim Ratcliffe入股25%，擊敗卡塔爾財團嘅全購計劃，相信曼聯球迷有人歡喜有人愁，一來未必可以走財大氣粗路線，二來無人知道到底美國格拉沙家族家族會逐漸有序退場，球迷要繼續受氣。

這宗交易，有趣嘅係，Jim Ratcliffe據報將支付超過15億美元收購英格蘭球會曼聯（Manchester United，MANU）25%的股份，按比例計，曼聯的估值高達60億美元。

而翻查舊一啲嘅新聞，格拉沙家族本身叫價50億英鎊（約610億美元），與今次傳聞中的作價貼近，但有趣嘅係，曼聯股價開市後卻大跌超過一成，最新市值不足33億美金，相信就是反映出一系列不確定性。

又話說之前盛傳會同呢位英國首富會夥拍碧咸收購，但最後似乎就無咗件事，唔知同之前英國〈鏡報〉話，如果卡塔爾贏取競投成功，碧咸有機會做推廣大使一事有冇關係。

以數論數，格拉沙表面上都幾大咬，因為睇返維基百科、新聞，Glazer家族喺2003年至2005年以舉債方式，合共用大約 7.9 億英鎊收購曼聯，不過原來因為債重，而搞到每年產生嘅利息超過 6000 萬英鎊，所以今次Glazer叫價偏高，應該係想收回成本。

之但係過去三年曼聯都係蝕到傻，分別蝕1.16億英鎊（2022年）、9222萬英鎊（2021年）、2333萬英鎊（2020年），呢盤生意蝕得咁癲，本身對於係咪真係賣到靚價都幾令人產生疑問，但估唔到英國佬真係就範。

但經營足球隊係咪係一盤好生意？咁不如一齊睇下曼聯盤數：

無錯，搞球隊，開支佔比最重嘅當然係球星，employee benefit 就喺過去五年失控咁上升，由2018年嘅50%升到2022年66%，某程度上就係反映咗曼聯亂買人；EBIT margin更加係慘不忍睹，2022年已經變咗負15%。

雖然曼聯嘅收入就升返去2016年水平，相信大概已經過咗疫情最差嘅階段，不過見到佢EBITDA margin、經營開支失控地惡化，似乎真係無乜得救。

而有睇開波嘅都知道曼聯近年有幾唔掂，近幾年好明顯係想沽注一擲，一口氣簽入大量球星，不過都係搞唔起，而領隊坦夏亦似乎擅長於搞更衣室政治多過搞波。

好明顯，曼聯已經畀班主Glazer呢18年玩爛晒，而佢哋最終於打算放棄治療，諗住止蝕離場。

又參考返，早排車路士因為俄烏戰爭後令到俄佬油王阿巴莫域治要焗賣42.5億英鎊，咁曼聯今次個賣盤價多少都叫做有benchmark嘅。

對於今次曼聯嘅終局，大家又歡唔歡喜呢？