列貝利的眼淚，洛賓的軌跡 | 李聲揚

好少可只講波唔講統計唔講$，今次破例。唔長。

睇題都知，講拜仁慕尼黑組合，Robbery 洛賓列貝利，正式告別。洛賓2009年開始踢拜仁，列貝利仲誇張，2007年開始。兩位嘅黃金時代都畀晒拜仁，都稱得上係名宿了。

Robbery固然Rob行先，中文一般都講洛賓列貝利，除咗音調上嘅方便，洛賓照計名氣同實力都高過列貝利。但你見我個題放列貝利先，主要想講佢。

以下係列貝利最後一場聯賽告別嘅情況。

在拜仁慕尼黑主場安聯球場（我去過，但冇睇過波，舊場奧林匹克球場反而睇過）。留意其實唔係咩「告別賽」，正式比賽嚟的，甚至聯賽冠軍都未到手。但多得對手法蘭克福唔爭氣，拜仁主場大勝5-1，拎埋冠軍，洛賓列貝利都入波，表演賽咁踢法。

嗯，都真係好感人。球會層面好少我會咁覺得，即使拜仁兩次捧歐聯，都冇。

其實一齊離開嘅仲有洛賓。講名氣講實力講關鍵時侯打救拜仁，洛賓遠高過列貝利。又有 「洛賓的軌跡」。

Two whole minutes of Arjen Robben cutting inside. Drink it in. Pure sauce. 💉 pic.twitter.com/8qtqzcK09V

— Nisar (@iNisarKhan) July 4, 2019

但感覺真係唔同（你可以睇埋洛賓告別段片）。可能我去到呢啲位就真係膚淺講熱血啦。

一個關鍵係，洛賓未嚟拜仁之前，已經好L出名（好波、快馬、獨食、串嘴），在車路士年代已出晒名，甚至去埋皇馬，後來半失意，跟恩師雲戈爾齊齊去拜仁搵食。你想像到，當時以洛賓嘅級數，由銀河艦隊皇馬，撈唔掂，去都相當濕9嘅拜仁，係有啲委屈的。但難得皇馬太平賣，拜仁得以平價買到佢返嚟，呢單係拜仁近十季最佳收購無誤，歐聯決賽捧盃都係佢入波奠勝。而洛賓在國際賽亦都好L出名。在荷蘭都屢建奇功，甚至係一號球星，爭小小就捧咗世界盃，就係爭小小。

但列貝利呢——好主觀講，近乎係one club man。之前馬賽波圖嗰啲算L數啦。你講佢只會講拜仁。加上佢國際賽其實冇咁大成就。冇錯06年係世界盃亞軍，決賽正選添，但你明的，風頭畀其他人拎晒。之後08年同10年，法國早早收皮。12年好少少，14年傷埋，然後退出國家隊。即係列貝利，除咗拜仁，差不多一無所有。

仲有一點唔同，洛賓在拜仁基本上順風順水，係最初由皇馬嚟有啲失意，但話晒恩師雲戈爾睇住，打後都極之順，亦冇聽過要轉會或乜。但列貝利有啲唔同，在拜仁真係有高低起跌。

故事大約係咁，2010年前，在香港，列貝利嘅花名係 「刀疤佬」。但2010年後，佢嘅花名係 「雞蟲」。是咁的，2010年列貝利事業如日方中，在拜仁踢得相當好。當時盛傳佢會去皇馬（事實未去拜仁前皇馬已經想買佢），同好友（兼炮兵團團友）賓施馬一齊。其實拜仁由頭到尾都唔想賣，唔知係列貝利放風丫，定有私下傾丫，定想扭加人工。

之但係，就係嗰期，爆咗列貝利嫖妓單嘢。本來球星嫖妓真係冇乜咁大不了（定你以為有錢人，或者靚仔，或者運動員唔嫖？知唔知明星足球隊係上世紀最偉大嘅發明？而家就被海外馬拉松取代），真係冇乜大不了。況且列貝利不過係對自己好啲，生日叫外賣，600英鎊咋，真係港女生日去次日本都唔止，對佢嚟講散紙啦（不過佢出埋機票房錢嘅，球星嘛，唔通去撳鐘仔咩，仲要佢個樣咁易認）。做乜搞到咁大劑？因為，條女未夠秤咯！！

網上你可以睇返新聞，條女開晒名，樣都登晒出嚟，亦都冇metoo話人地硬上弓。列貝利真誠覺得條女冇可能未成年。法官大人信了，嗯，我都信。冒犯女性都要講句，條女波大過頭，你話未夠秤？點信。講緊係2010年，案發當時不久嘅相。

再講一次，本來球星嫖妓冇乜咁大不了，拜仁亦冇咩道德潔癖（不過拜仁或者德國德甲啲球星真係比較少呢啲嘢，可能因為窮）。但，衰十一又另一回事。不過成個過程，拜仁都好支持列貝利，相反皇馬就盛傳打退堂鼓，或者借機壓價，或者列貝利打消咗跳草裙舞嘅念頭。總之，同好多情侶夫妻一樣，葉念琛話齋，你以為關係靠愛去維持？錯啦，內咎先係最好嘅維繋。打後咁多年，列貝利偶然仲會同隊友開下拖，但再冇扭計呀玩嘢呀咁，踢波亦十分落力。佢經歷過嘅畢竟同洛賓唔同。

當然，可能都同民族性有關，法國人浪漫嘛。的確，你睇球場上洛賓好似離經逆道（特別係早期），死都唔交波，係都唔練右腳，冇晒角度都要起腳，好似同荷蘭全能足球違背。但洛賓其實場外新聞冇乜，好有紀律。反而列貝利先係新聞多多，又火爆又激情（所以要出火），成日鬧呢個鬧嗰個，性格巨星，性情中人，難怪離開反應都激烈啲。重覆一次，除咗拜仁，其實佢職業生涯唔係太多野留戀（有嘅，同賓施馬一齊尋歡搞到上差館嘅日子咯）。

其實篇文主要想講列貝利，講多兩句洛賓。在咁多 「洛賓的軌蹟」中，我比較記得嘅，係以下兩次。

第一次就係洛賓在拜仁第一季，09/10年歐聯，十六強拜仁對費倫天拿。嗰時雲戈爾教嘅拜仁係有點甩皮甩骨（你睇下啲陣容？），但好L有娛樂性。拜仁首回合小勝一球，次回合其實輸波，但靠洛賓招牌式屈機追到2-3，得以4-4作客入球優惠晉級

最正嘅係，同一季，去到8強對曼聯，劇本差不多一樣。又係先主後客，又係主場小勝一球。次回合作客更加凶險，拜仁迪米捷利斯拍雲布廷嘅搞笑後防，7分鐘已輸兩球，半場未夠輸夠3球，諗住死得。劇本又係最後洛賓追返球，不過呢球應該唔算洛賓的軌跡。洛賓入完波個串樣辣著好多曼聯迷。又係次回合作客輸1球，又係4-4作客入球優惠。拜仁之後殺到入決賽，不敵摩連奴帶嘅國際米蘭，奇蹟之旅就咁玩完。

至於第二次最深刻洛賓的軌跡，係13/14歐聯，拜仁捧盃嗰屆。但並唔係決賽奠勝球（嗰球唔算係洛賓的軌跡），而係4強對巴塞，次回合。今次冇咁驚險啦，拜仁首回合主場（又係主場！）已經大炒巴塞4球。但，巴塞嘛，正所謂 90 minutes at Camp Nou is a long time，邊個可以排除巴塞主場翻盤嘅可能？就真係等到下半場，又一次洛賓的軌跡，拎埋個作客入球，領先5球，巴塞要半場追6球，我先安心啲去開罐嘢飲。最後拜仁殺入決賽，捧埋歐聯。

都再講講，你睇洛賓呢兩下動作，自然不過。一控，一扣，第二個後防伸腳前已經快腳扯埋個波入網。天才？廢話，三次踢歐聯決賽嘅主力攻擊球員，荷蘭近十幾年最出色嘅攻擊手，一度可以挑戰世三（美斯C朗拿度之後）嘅洛賓，點會唔天才？但又係極老套講句，天才都要苦幹，咪L睇啲咩有能力的人不加班。C朗拿度日日操L到死（雖則都係唔及美斯），洛賓細細個跟足 Coerver Method，十分有系統地練波（第一個 Coerver Method嘅子弟，正係早洛賓一期嘅辛頓），仲要練波永不遲到——唯一一次遲咗十五分鐘，就係去溝女，正係佢後來嘅太太。

都唔係勝利球迷，其實而家我已經冇乜對一間球會好有感情。眾所周知本人捧德國，呢個咁多年冇變，但球會真係睇得好化。我嘅諗法唔係人人同意，但你捧德國唔捧拜仁，生活就都幾痛苦，至少我係選擇呢啲相對簡單嘅路。對我嚟講永遠係國家隊為先，球會第二，甚至第三四。2012/13年我當然想拜仁決賽打低多蒙特，但今年我係食大花生想拜仁跌返個聯賽冠軍出嚟的。可惜冇。甚至唔同曼城，唔係因為拜仁太勁。拜仁一路有失分，只係多蒙特亦冇利物浦咁誇張。

真係轉眼就十年，其實十幾年。洛賓列貝利退下來，加上拜仁在歐聯16強出局，點都係會大換血—其實都預告左唔少。哥利茲卡同基拿比兩位土炮可以擔到大旗 ，京士利高文亦都會繼續受重用。後防亦都簽咗法國嘅 盧卡斯靴南迪斯同埋柏華特。隨住洛賓列貝利離開，會有啲新氣象新鮮感。等我重拾返啲睇波嘅樂趣。

呀，臨尾抽多下水。同樣告別嘅仲有拉芬拿。我估都唔係太多人知邊個拉芬拿（唔係巴塞嗰個）。拉芬拿都2011年踢到而家，但我好似冇聽過一個人會懷念佢鍾意佢，甚至唔討厭佢。呢位仁兄，絶對係有破壞冇建設日日好似聖誕節。屎波就固然，屎波得嚟又臭串又鍾意搞事又聲大大。佢在拜仁嘛，我最記得就係上年萬聖節（其實係萬聖夜，是但）扮阿拉伯炸彈人。畀人鬧到七彩，最正啲友用返佢對皇馬出醜嘅片回佢，佢先係真正後防炸彈人。

呢啲咁嘅友都拎歐聯冠軍，真係人類文明之恥。最L好笑係條友拎埋德國護照，拒絶巴西國家隊徵召（其實有cap的，但係啲太公波），話要代表德國喎。幸好德國再折墮都未墮落到要用佢。人生仲有希望。

君子馬蘭頭 - Ivan Li 李聲揚