曼城「造數」欺瞞歐洲足協，或被罰禁賽歐戰一年 | 足球財經
編按：《紐約時報》報導，曼城有可能因為違反歐洲足協財政公平競技條例（FFP），被禁止參加一季歐聯賽事（尚未確定是下季還是下下季。）在去年（2018年）年尾，Football Leaks曾經披露曼城如何以欺詐手段逃避FFP。
歐洲足協轄下嘅財務監控委員會(Financial Control Board) 最快將會下星期提交調查報告，建議向曼城施以禁止參與歐聯最少一季嘅懲罰。
報導指，曼城將被控告於較早時歐洲足協嘅調查作出誤導性陳述，與及向英格蘭嘅發牌機構作出虛假陳述。如果控罪成立，曼成將會係自從財務公平條例 (Financial Fair Play Regulations, 簡稱 FFP) 於 2011 年實施以來，最具規模嘅被處罰球會。
自從阿布扎比聯合集團 (Abu Dhabi United Group, “ADUG”) 入主曼城後，一直大灑金錢招兵買馬，被球迷視為破壞球圈生態平衡。今次 UEFA 嘅調查，主要受 2018 年尾「足球解密」 (Football Leaks) 公開一系列疑為曼城內部文件，其中顯示 ADUG 同曼城管理層以不同手法試圖繞過有關規例，包括將實際應視作為 ADUG 注入嘅股本投資，利用同屬 ADUG 旗下嘅伊蒂哈德航空 (Etihad Airways) 以贊助費嘅名義入帳，令有關款項化成收入而非股東增資。（編按：Football Leaks文章指，曼城在2012年解僱領隊文仙尼的時候出現了財政赤字，為了避過歐洲足協的懲罰，故意讓球會母公司ADUG以額外贊助收入形式填補資金空缺。）
曼城一直並無正面回應被洩露文件嘅真偽，只係指有關指控為一場「清晰並有組織地意圖損害曼城聲譽」嘅舉動。
另一方面，亦有唔少評論指 FFP 不過係傳統豪門(如曼聯、皇馬同拜仁等)巧立名目地維護自身利益，阻礙投資者發展新勢力。甚至有法律專家指 FFP 唔符合歐盟有關公平競爭嘅法規，上到法庭未必站得住腳。
目前尚未清楚委會會會建議禁止曼城參與2019/20 定2020/21 球季賽事，但可以肯定嘅係，若然UEFA真係懲處曼城，曼城必定會用盡一切能力嘗試推翻判決。FFP 能否繼續發揮功效，將會受到一大考驗。
曼聯球迷兼會計師一名，平時留意曼聯與及各大球會財務數據多過落場踢波，希望透過分享自己少少知識，同大家了解更多球場背後嘅操作。歡迎大家留言分嚮睇法或者想討論乜嘢話題。
