曼聯失落歐聯資格的金錢損失 ｜足球財經
曼聯接連輸俾愛華頓同曼城之後，來季出席歐聯嘅機會大受打擊。大家都知道歐聯嘅奬金比起歐霸可謂天壤之別。但到底若果曼聯下季真係只能參加歐霸，實際損失金額有幾多呢？筆者嘗試從 17/18 同18/19 嘅數據去作出推算。
之前同大家略略分享過 17/18 球季歐聯獎金嘅分配制度 (見財務報表分析(3) – 英超Big6 收入比較 (電視播映收入))。 而 18/19 球季，除咗定額獎金提升之外，最大嘅變化係 market pool 嘅比例大幅降低，並新增按各參賽隊伍到上十季歐洲賽成績得出嘅系數排名高低作分配。最明顯嘅效果，就係傳統勁旅即使某季以較低本土聯賽排名取得歐聯參賽資格，都唔會好似喺舊制之下咁喺 market pool 分少太多。詳情大家有興趣可以參考歐洲足協網站講解。
要估算曼聯嘅損失，我地可以作出一定嘅假設，比較一下曼聯出席兩項賽事分別可以獲得嘅獎金。以目前形勢，即使曼聯最終搶到歐聯席位，都係以聯賽第四位嘅資格得到。再假設曼聯下季分組賽取得四勝二負，晉級十六強後出局 （唔算太進取吧）。
至於歐霸，以本土杯賽冠軍資格參賽會從 Market pool 獲得較高分成。但假如某國所有代表球會都係以聯賽排名資格參賽，各隊所得就會不論排名平均分配。我哋假設曼城順利贏得今屆足總杯，與及曼聯將會喺歐霸杯全勝奪冠, 以估計最高可以獲得幾多獎金。
至於系數排名，歐洲足協資料顯示曼聯今季排第五，假設下季排名不變，曼聯理論上會係歐霸參賽球會中排名最高嗰隊。
而 Market pool 就按照 17/18 球季英格蘭球會分別所佔比例，套用到 18/19 球季嘅金額作粗略估算。
綜合以上各項條件同假設，可以得出以下嘅數據：
圖片來源：i.ibb.co
亦即係€37.5m (約£32.4m)，佔曼聯17/18球季總營業額 5.5%。 筆者必須要強調，呢個只係一個非常粗略嘅估算，亦只考慮賽事獎金分成嘅差異，唔包括其他收入來源可能出現嘅變化。呢條數仲襟計！
曼聯球迷兼會計師一名，平時留意曼聯與及各大球會財務數據多過落場踢波，希望透過分享自己少少知識，同大家了解更多球場背後嘅操作。歡迎大家留言分嚮睇法或者想討論乜嘢話題。
