其實傑志咁樣踢亞冠……｜KH筆記
2018年亞冠盃嘅賽事即將展開，代表香港出戰亞冠盃分組賽嘅球隊將會由東方龍獅，變成上屆幾乎闖入分組賽嘅傑志。今季人腳變動唔算大，不過球隊陣容喺一月亦有所調整：除咗回收佐迪、鄭展龍同李毅凱之外，亦邀得曾經效力多支歐洲勁旅、亦為大阪櫻花出戰亞冠盃嘅科蘭加盟，只係傳聞斟介中嘅國腳級中場因為中後場嘅人腳變動，而未能成事。
相比起上季東方龍獅可謂「一仆一碌」嘅組軍，其實傑志今季嘅組軍明顯係有計劃、有誠意得多，不過並唔代表組軍工作做得充足同埋完善。2–2打和冠忠南區之後，傑志更加係暴露咗佢哋亞冠陣容上幾個嚴重嘅問題。
以往所謂傑志陣容深厚，其實係基於兩個前提：(1) 球隊嘅「本地球員」多，包括林柱機、林恩許同林志堅三位球員；(2) 以往球隊踢4–3–3，能夠兼任前場不同位置嘅球員多。但係轉用3–4–3之後、加埋用亞冠嘅標準去睇傑志嘅陣容，其實慘烈嘅狀況不比舊年嘅東方龍獅壯觀：
首先論前線，傑志可以喺3–4–3踢前線嘅球員的確相當多。唔計轉任左翼衛嘅費蘭度，除咗外援嘅科蘭之外，本地幾名歸化球員辛祖、艾力士、佐迪、安基斯、保連奴，甚至土炮嘅林嘉緯同鄭展龍都可以負責前線進攻嘅工作。喺科蘭加盟之後，傑志有可能會排出類似3–4–1–2嘅陣式，以科蘭喺進攻中場較炮，由辛祖、艾力士等人喺最前線搶攻。
前線好似好多人，咁中場呢？正常嚟計，正選兩個中場中會係黃洋同華杜斯。但係萬一兩個中場有咩受傷停賽，後備呢？林嘉緯？踢三中場都仲可以專注進攻，踢3–4–3嘅中場，以佢嘅踢法同體能，覆蓋範圍未必會咁全面；近年有踢防中李毅凱或者喺防守上可以幫到手，但係進攻方面始終不敢樂觀。然後呢？巴拉克定史雲斯頓？
翼衛人選就更精彩。左路用費蘭度應該係唔使諗，不過對比起舊年嘅狀態，其實佢突破同傳中嘅質素都有啲下滑，但係作為傑志嘅其中一個主要進攻瓣數，揀佢做外援都走唔甩。但係後備呢？先唔講丹尼已經36歲，朱志光會諗住搵佢踢左翼衛定中堅？平時用開林志堅或者林恩許嘅右翼衛，近期改由保連奴擔任，不過效果麻麻，位置感唔好，進攻上嘅貢獻都唔算多。(當然某程度係因為傑志主要依靠費蘭度嘅左路側擊) 後備理論上仲有唐建文同盧均宜，但係見朱志光寧願用佐迪踢右翼衛，大家都係唔好有太多幻想。
中堅有列斯奧、艾里奧，甚至丹尼、李毅凱、唐建文，亞援金奉珍都係中堅，牌面計傑志都幾穩陣，不過隱憂其實都幾大。當兩個翼衛經常壓上前助攻嘅時候，對手嘅反擊其實對傑志嘅三人防線構成沉重嘅壓力，當艾里奧喺亞冠盃分組賽初段都仲未可以復出，由丹尼、列斯奧領軍嘅老人防線，其實喺本地賽事都未必可以好穩固，特別係35歲嘅列斯奧，穩定性已經大不如前；踢3–4–3中間嗰個中堅表現更加係強差人意，上場對冠忠南區輸嘅兩球，佢都有責任。後備嘅幾位本地球員唔常用，要操返作戰嘅狀態亦需要時間；即使亞援名額用上金奉珍，都唔代表後防穩穩陣陣。
傑志今屆亞冠盃嘅組軍工作其實基本上已經完成。然而，教練朱志光係咪要堅持3–4–3嘅佈陣，同埋現有嘅陣容 (包括外援人選) 去迎戰亞冠盃，無可否認係值得商榷。上到亞冠盃戰場，如果傑志都仲係得呢套打法，坦白講，真係唔會樂觀得去邊。
(圖片來源：香港01、UPower)
