被車仔大炒0-5，或者大家會好意外明明出名防守穩、反擊好嘅韋斯咸，點解會搞成咁？Well，其實已經差咗好耐。
踏入 2024 年，今季一度能帶領韋斯咸爭四嘅 Moyes，表現斷崖式插水：由上半季可以成為今季聯賽唯一一隊可以作客酋長球場贏阿仙奴嘅球隊；到下半季連錫菲聯都贏唔到。
場面？
贏唔到同級對手之餘，以防守好見稱嘅 Moyes，失球數字甚至比般尼更差。接連被維拉 (1-4)、富咸 (0-5)、阿仙奴 (0-6)、紐卡素 (3-4)、水晶宮 (2-5)、車路士 (0-5) 等對手攻入4球，而且今季重有剎科日對曼城一仗未踢……
除此之外，Moyes 帶嘅韋斯咸 2024年廢到連錫菲聯都贏唔到、般尼都贏唔到 (都係和 2-2)。下禮拜就睇吓莫耶斯主場對盧頓，可唔可以今季和晒三支升班馬。
在此同所有阿仙奴球迷講定 – 爭冠軍唔好旨意韋斯咸。相信到時又有一批球迷會支持要炒 Moyes。
望見呢啲咁恐怖嘅戰績，大家要記住係 Moyes 帶領韋斯咸失波失到咁。當一個以防守見長嘅教練，自己嘅強項都做唔好，又憑咩留得低呢？
換血？
著名評述員黃興桂曾經點評 Moyes：「蔗渣價錢，燒鵝味道。」當時 Moyes 喺愛華頓以低廉價錢組軍，卻一度能帶領愛華頓殺上頭四、且長期佔據上半版。愛華頓的歷史就當然要問 拖肥工廠 – Nil Satis Nisi Optimum。但 Moyes 嚟到韋斯咸，班主自當有唔太用錢，護級有凸嘅期望。
Moyes 喺韋斯咸？我哋未試過咁樣形容佢喎。
第一就先攞兩個中鋒嚟講：Sebastien Haller 同 Gianluigi Scamacca。本幫主曾經喺兩人加盟時分別點評，前者還算有寄望，但後者我就毫不客氣咁稱呢宗交易為 Scam。縱然二人而家喺唔同球隊都取得成功，但喺韋斯咸嘅時候，以失敗形容卻不為過。Haller 為 Pellegrini 嘅引援，Moyes 用唔掂賣走尚算講得過去，但 Scam 呢一單嘢，唔屌就對唔住我自己。
Haller 同 Scamacca 都係高大得嚟，腳法功夫頗為幼細嘅中鋒嚟。明知 Haller 不適合 Moyes 嘅踢法，但 Moyes 卻同意引入踢法類似嘅 Scamacca，唔係嘥錢咩？縱然 Scamacca 喺阿特蘭大近期越入越有，但佢喺韋斯咸一季聯賽僅入3球、下半季更直接因傷收咧，繼而在夏季離隊。2022年夏天3000萬引入，幸好有阿特蘭大以2500萬鎊接貨，才不致蝕大本。
要講起 Moyes 嘅兩大蝕本之作，就不得不提 Nikola Vlasic 同埋 Felipe Anderson。克羅地亞翼鋒 Vlasic 喺 2021年以 3000萬加盟，加盟後卻被 Moyes 投閒置散，一季後就以先借後賣嘅方式送往 Torino，賣價僅為 1000萬。至於巴西邊緣國腳 Felipe Anderson，有盤扭、肯防守，且踢法有森巴風味。Pellegrini 以 3800萬引入，但 Moyes 第二度簽約後竟然同佢鬧不和，最後更只以 300萬賣走，蝕個大本 (唔好同我講 amortisation，而家係講緊球員嘅價值遠遠唔止 300萬)。上述三位有質素嘅球員都身在意大利。
最後，就梗係要講 Moyes 契仔 Kalvin Phillips。幾次話想要，俾你追到啦，但一上場就犯錯失分，表現驚嚇。咁嘅表現都重要俾 500萬鎊曼城。
眼光差，用錢多，蝕錢更多。除此之外亦罕有提拔青訓，為球隊換血。近期韋斯咸唯一賺錢嘅飯 (Declan Rice)，都係由 Pellegrini 開光、提拔、琢磨後，Moyes 先有得再將佢加以使用。堆例子，都係想提返大家：Moyes 都唔係一個咁慳家嘅領隊。
見公海有眾多球迷鬧韋斯咸球迷同管理層唔應該炒 Moyes，話 Moyes 係功勛將帥，無道義可言。首先，你班白痴再話韋斯咸「炒」Moyes 嘅話，你都無咩智慧可言 – 話咗幾多次係約滿離隊？
戰績？
唔少外界球迷認為 Moyes 值得留任嘅原因，係 Moyes 為韋斯咸贏歐協聯冠軍。哈。
咁啦，有兩個疑問：
1. 冠軍數量同球隊質素唔一定相關。我鎚贏到歐戰冠軍，熱刺贏唔到，係咪就係韋斯咸嘅成績好過熱刺？誠然以冠軍計、以人品計，都應該啱嘅。不過客觀嚟講，睇聯賽排名，近5屆只得一屆韋斯咸埋單計數高過熱刺。雖然係滅自己威風，但都要承認客觀成績上幾難話韋斯咸好過熱刺。
2. 贏冠軍就係一切嘅話，咁點解會有人反 Wenger同埋 ten Hag？Wenger 帶阿仙奴不敗贏英超金盃，ten Hag 帶曼聯贏聯賽盃，何解亦落得被反嘅下場？幫大家溫故知新一下：Wenger 晚年淪為保四狂魔，球迷希望求變以求重奪英超；ten Hag 上屆贏完個聯賽盃之後，今季不進反退。不論獎盃含量再高，都唔代表個領隊自身無問題、球隊無問題。
3. 既然曼聯同阿仙奴都可以因為想求進步而換教練，點解韋斯咸唔得？
或者你哋認為韋斯咸咁細嘅球會，就應該安守本份。我哋唔係未試過，但係升班馬越升越廢、護級壓力越嚟越少嘅情況下，博嘅成本就越嚟越低，只要唔中 FFP 呢個地雷就得。(不過今屆升班馬係廢到中埋 FFP 都唔愁降班……Well…..)
錢又賺唔到、成績就無進步，兼且踢法毫無娛樂性。體嘢總編高生講過：「領隊睇三樣嘢：『場面、戰績、換血』」而家椰尻一樣都無，憑咩繼續留低呢？
