阿積士冇歐聯踢：收入大跌，為禍深遠｜李聲揚
一年200m收入，水晶宮法蘭克福咁上下，但仲係飛燕諾同PSV double。
阿積士人工佔收入約50%——差不多全荷甲最低，似乎太保守了。計埋攤銷一年輸50–60m，只可以靠賣人去填；收入先200m ，但賣人執咗100m，先夠填。但冇歐聯點算？因為預計賣到人有得填，先畀到咁高人工屈機荷甲。但冇歐聯點算？63m嘅歐洲賽收入，跌到13m，甚至冇，點填？
冇歐聯踢，列強冇得睇辦，又知你莫財，一定壓價，就惡性循環。但點計都好，即使冇埋歐洲賽，阿積士財力都係冠絶荷甲，冇可能踢到咁。今屆冇歐聯，成個cycle就甩碌。不過放心，歐聯擴容！荷甲第三都有一席。
1. 數字嚟自阿積士年報（荷蘭文！），亦參考Swiss Ramble嘅Substack（好嘢嚟，建議你訂），但主要係我原創。文中嘅錢係歐元，m係100萬。
2. 荷甲阿積士，近期多麻煩。上屆荷甲得第三，今季冇歐聯踢，只有次一級嘅歐霸。今季歐霸三場都贏唔到，荷甲聯賽近期4連敗，輸埋畀榜尾球隊，而家排尾二！雖然踢少兩場，但依然好離譜。
3. 場外是非亦多，球迷騷亂，球員打對手球迷，管理層性騷擾女同事，轉會收回佣，乜都有，名宿雲達沙奧華馬斯亦都先後離任。
4. 阿積士22年先拎過荷甲冠軍，近年係歐聯常客，戰績相當好，19年仲打入四強。因乜極速下滑？
5. 主流講法係球會太過勢利，只睇錢，放走晒啲主力，今季又諗縮數，冇補充主力。
6. 係咪事實好難講，波我唔熟，但不如睇下錢，有數字易睇啲。況且阿積士作為小國聯賽班霸，盤數相當有趣，值得討論。
阿積士好賺錢！近乎歐洲球會史上紀錄
TLDR：阿積士一向都靠賣球員維持，以前係而家係將來都會係。災難就係上季開始，冇歐聯，對阿積士好大件事，惡性循環，今季縮數迫不得己。不過即使如此，以阿積士嘅財力，亦冇可能荷甲踢到今季咁（上季都係）。如果玩到下季又冇歐聯甚至冇歐洲賽，就更大嘅災難。
＝＝＝＝
7. 有關歐洲球會點營運，點睇啲數，同埋好多common misconception，我兩篇舊文有講，不重覆（上集，下集）
sportsyeah.hk/2023/08/articles/38973/
sportsyeah.hk/2023/08/articles/39062/
8. 呢度睇阿積士22/23（上季）同埋21/22（再上一季）嘅數，save低張圖吧。
9. 歐洲球會多數都蝕錢，有啲好甘，但阿積士係極少數賺錢嘅球會，而且係相當賺錢，上季嘅盈利近40m，近乎歐洲球會史上嘅紀錄。弔詭嘅係，因為搶人才，球會往往要在賺錢同戰績之間取捨，阿積士似乎就真係「太掛住賺錢」，主流講法話球會睇錢太重太度縮，似乎有一定道理。
10. 快手睇最重要嘅數字：收入。歐洲球會三味收入：比賽日，廣播（含歐洲賽），商業。阿積士嘅情況，三味收入佔比大約係25%，25%同50%。
11. 先睇比賽日收入，一般幾穩定（之前嗰年受疫情打擊）。留意兩樣嘢，首先，企業包廂嘅錢佔得多，首都阿姆斯特丹大球會嘛。另外，上屆阿積士只得4場歐洲賽主場，但收嘅錢等於17場荷甲，當然因為荷甲飛平。
12. 睇埋商業收入，呢舊錢最大，但亦相對穩定，唔會因為一兩季踢得差而大跌（多幾季就會）。循例講多次，你買件波衫100蚊，球會落袋可能10蚊都冇。而企業贊助先係大錢，呢方面阿積士先天優勢，首都大球會。
阿積士荷甲轉播收入，不及德甲包尾嗰隊三份一
13. 最值得細講係廣播收入，留意包埋歐洲賽各樣錢（門票以外）。你會見到廣播收入中，歐洲賽佔好大，本土賽佔好少。估都估到，荷甲轉播費平，海外唔太賣到錢，仲有留意荷蘭相對少人，所以本土都唔太賣到錢（德甲法甲就本土幫補到）。
14. 睇實數，阿積士本土轉播，佔佢地全部收入5%，收10m，已係全荷甲最多。有幾少？英超包尾嗰隊，都收100m．固然因為英超全世界多人睇，但即使德甲包尾嗰隊，都收差不多30m，係呢支荷甲班霸嘅3倍。
歐洲賽轉播收入佔阿積士收入兩成幾三成，你話冇咗大唔大件事？
15. 戲肉，就係歐洲賽呢45m（再講一次，未包門票），再上一季甚至去到63m．呢一個item，佔佢地收入兩成幾三成。一定要細講，亦畀讀者知道到底呢啲錢包咗乜，點計。
但阿積士歐洲賽轉播收入係荷甲轉播4倍至6倍，入面包咗乜？4樣嘢
16. 睇圖，歐洲賽轉播收入，分為四味。第一味就真係電視轉播，計法極複雜，下次解，但你見對阿積士嚟講極細數，另外三味先重要。第二味係獎金，計法煩但唔深，睇當屆戰績，每場贏波和波都有錢分，晉級又另計，即使6場輸晒出局都有舊大pool分錢。再前一季歐聯阿積士6戰全勝晉級，但上一季就第三轉踢歐霸然後即時出埋局，所以你見到兩季嘅獎金爭好多
17. 更重要嘅係第三四味。先講第三味，參加錢。呢舊錢你踢歐聯就有得分，輸晒6場都收足，隊隊都收咁多（上屆16m），對細球會嚟講好大舊錢。但留意，踢歐霸或歐協聯（第三級賽事）都有「參賽錢」，但少一大截（可能4m咁上下，歐聯係16m）。仲有，你連歐協都冇，就冇呢舊錢。所以你想像到，冇歐聯對阿積士好大件事，之後詳細計。
18. 最煩但可能最重要嘅一味，係「系數分錢」。大家照計聽過下「歐洲賽系數」，每個國家嘅聯賽有自己系數，每隊波又有，亦係睇贏波和波輸波去計。唔好以為只係數字遊戲，會關乎錢，即係關乎生死。詳細計法，極複雜，鍾意嘅自己睇。排名在呢度>。
19. 你要知嘅係，歐聯有一舊錢，係跟呢個系數分，你6場輸晒都照分，而強隊分得多。系數計足10年，睇過去10屆表現，所以一兩年走樣唔會極大影響。好重要嘅係：踢歐霸歐協的話，都有「跟系數分錢」，但分嘅錢少好多，因為個pool都細好多。仲有，如果你冇歐霸歐協的話，一個仙都冇。好大件事。
20. 睇實數，因為阿積士戰績好系數高，之前兩季踢歐聯，呢度都執近22m。比較下，系數最高嘅皇馬都只係分36m — 但皇馬成間會收入係阿積士幾倍。所以呢舊錢，對阿積士好重要。（至於荷甲飛燕諾同PSV，系數較低，今屆踢歐聯都都只係各分10m左右）
阿積士冇歐聯，雙重打擊。系數錢少一截，參賽錢又少一截
21. 好啦，今屆阿積士冇歐聯，得歐霸，兩重打擊。首先「參賽錢」，之前兩季16m，今季應得返4m左右，因為歐霸「參賽錢」少好多。另外，歐霸「系數錢」亦少咗一大截，應該得返5m咁上下，之前係22m．呢兩味，少咗成30m．總歐洲賽收入，可能去到得返13m，上一季係45m，再之前係63m
22. 呢度大大話話冇咗30–50m。留意返，阿積士一季先200m收入。你靠比賽日，荷甲廣播，商業收入，都冇乜可能變到出嚟。所以冇法，只能縮數。勒住買人，另外賣走啲友，賣人會有收益，同時亦減少人工開支。
＝＝＝＝＝＝＝
23. 講完收入，睇返其他。阿積士上季收入200m，差不多史上最高，直迫歐聯四強嗰年。但，同歐洲其他球會比呢？係英超水晶宮狼隊咁上下，或者賓菲加維拉利爾法蘭克福咁上下，歐洲排到近30，勉強入到Deloitte Money League（之後未必）。
一年200m收入，水晶宮法蘭克福咁上下，但仲係飛燕諾同PSV double
24. 值得一講係，荷甲另外兩強，飛燕諾同PSV，講緊收入100m上下，即係阿積士等於佢地double，有幾誇？誇張過拜仁在德甲嘅優勢，只有PSG在法甲嘅優勢可比。荷甲三巨頭打後嘅，50m收入不夠。所以以阿積士嘅財力，搞到冇歐聯踢，甚至今季咁成績，係十分離譜嘅。
25. 打後快講，人工開支跌咗，走咗啲貴人，而且上季踢得差，獎金亦少咗，照計今季人工開支會更少。阿積士100m嘅人工開支，在歐洲講緊係咩水平？大約係等於英超下游，諾域治列斯都不如，所以啲球星係一定走的。
阿積士人工佔收入約50% — 差不多全荷甲最低，似乎太保守了
26. 值得一講嘅係，阿積士嘅人工佔收入約50%，在歐洲固然係相當低嘅水平，但甚至在荷甲都係差不多最低，亦接近佢地史上最低 — 至少事後睇，似乎係太過度縮嘅。搞到冇歐聯甚至今季咁情況，得不償失
27. 去到呢個位，收入減走人工同其他開支，所謂嘅EBITDA，仲係正數，好難得，好少球會咁。問題係，仲有啲其他大數字。
28. 公司買部機械返嚟，要折舊。球會呢？球場當然要折舊，但對阿積士嚟講唔算大銀碼。重點係：球員呢？亦有類似嘅玩法。啲「轉會費」唔會一次計入開支，但會每年攤銷，100m買條友簽5年約，就每年攤20m開支，舊文解過。留意阿積士本身唔會成日高價買人（哪有錢？），但攤銷開支都唔細，都近60m。除非大手賣人，否則呢個開支冇得減。
29. 減埋球員攤銷，就當然要輸錢了，輸50–60M，差不多年年都係咁。好啦，都話阿積士一年先200m收入，收入點升都冇乜可能短期填到呢個數。
計埋攤銷一年輸50–60m，只可以靠賣人去填
30. 不過，荷甲大多數會都係咁（雖然銀碼冇阿積士咁大），應該話歐洲頂級豪門以外嘅都係咁。點樣填返變賺錢，或者至少唔好蝕太多（歐洲足協會罰的）？就係靠賣球員了。
31. 呢啲係荷葡甲，甚至德甲法甲意甲大多數球會嘅玩法，靠賣人去大會填數。在阿積士嘅況，亦係因為靠呢啲嘢，佢先畀到咁高人工（以荷甲水平計）。
32. 上一季，賣球員嘅收益，去到過100m，史上最大舊（留意常規收入只係200m一年）。賣咗安東尼，馬天尼斯同埋賀拿。但留意唔係話賣 100m就賺100m，亦唔係話40m買返嚟50m賣出去就賺10m。計法同公司買機械差不多，舊文解過，不重覆。
收入先200m ，但賣人執咗100m，先夠填。但冇歐聯點算？
33. 仲有留意，呢舊「球員買賣數」，並唔係「賣人收咗幾錢減買人用咗幾錢」，事實上根本係冇「買人」嘅開支。上面講咗，「買人」嘅開支係每年攤銷嘅。
34. 打後仲有利息，小事，阿積士並冇真係「債」，只係啲financial lease，會計嘢，可以不理。
因為預計賣到人有得填，先畀到咁高人工屈機荷甲。但冇歐聯點算？
35. 見到嘅係，阿積士賺近40m，差不多係歐洲球會史上紀錄。而除咗疫情嗰兩年外，阿積士差火多年年賺錢。不過同啲大聯賽唔同，荷甲多數會都唔使輸錢。但亦係因為靠賣人。亦因為佢地預計可以賣到人出去，先畀到咁高人工，否則單靠本身收入，維唔到皮，呢個就雞同蛋嘅問題了。
＝＝＝＝＝＝＝＝＝＝＝＝
36. 而家幫阿積士計下今季，或者出年嘅數。做個好粗略嘅估計
37. 今年冇歐聯，歐洲賽門票收入固然有打擊，但唔係重點。重點係我上面用咗好大篇幅講嘅，「廣播收入」。再提多次，歐霸嘅參加費少一截，「系數分錢」又少一截。
38. 呢度有埋我估阿積士今季踢歐霸會收到嘅錢，最終要睇佢地戰績（暫時三戰不勝排最尾……），但就當佢今季執13m咁上下，照計差不多，之前飛燕諾PSV歐霸一季都係咁上下收入。
39. 順手睇埋，「最壞情況」（怕且唔會嘅），如果今屆荷甲阿積士連歐協位都撈唔到一個。咁下季，呢啲歐洲廣播收入，當然變零（留意系數錢都冇得收）。仲有歐洲賽門票收入都變零
63m嘅歐洲賽收入，跌到13m，甚至冇，點填？
40. 煩氣講多次，前一季歐洲廣播收入63m，上季係45m，今季跌到13m，下季最壞情況跌到零（仲冇埋門票嗰10m）。一年先200m收入嘅阿積士，點填？就真係只能勒住買人，減人工（如果可以），賣走啲人，book啲收益，順手減低人工成本。
冇歐聯踢，列強冇得睇辦，又知你莫財，一定壓價。就惡性循環
41. 固然一路都係咁玩，但呢一兩季特別要重手做，甚至啲價唔靚都要賣。雪上加霜嘅係，你冇歐聯踢，列強冇得「睇辦」，又知你莫財，肯定出價都低啲。所以你見今夏賣嘅人（Kudus之類，23/24年嘅數會見到，上面未見），都普遍比較平，冇安東尼呢啲大嘢，相信下年夏天更加平。
42. 於是你估到了，惡性循環。冇歐聯收入少咗一大截，更加需要賣人填數 — 但冇歐聯更加賣唔到貴，都幾頭痕。
但點計都好，即使冇埋歐洲賽，阿積士財力都係冠絶荷甲，冇可能踢到咁
43. 聽落好廢，但，冇歐聯，真係好大件事。上年教嗰兩個，就罪該萬死了。Having said that，以阿積士咁嘅財力，即使冇晒歐洲賽收入，佢地收入同人工開支，都仲係領先飛燕諾PSV一大截。今季拎唔到個歐聯位，都係說不過去，所以，亦都已經有人落鑊。
44. 結論？阿積士一向都係講錢，一向都係賣主力填數，令到佢地可以出高人工，屈機荷甲，然後有歐聯嘅收入，再出高啲人工，再賣球員搵錢，一路係咁玩，將來都係，都唔到佢地揀。問題係，「上屆冇歐聯」，成個cycle就甩碌
45. 事後睇，其實阿積士財政仲係好好，根本唔使咁急縮皮賣人減人工。但球會亦唔係冇買人，質素麻麻就另一回事。不過都係嗰句，冇乜可能連荷甲歐聯位都拎唔到。
今屆冇歐聯，成個cycle就甩碌。不過放心，歐聯擴容！荷甲第三都有。
46. 不過好消息係乜？好消息係，歐聯擴大規模！上屆荷甲冠亞軍先有歐聯（冠軍直入分組賽，亞軍要外圍賽），阿積士拎個第三，災難嘅開始。但今屆呢？冠亞軍都有歐聯（冠軍直入分組，季軍外圍賽）。
47. 始終財力相差太遠，好難想像阿積士可以拎唔到頭三（雖然而家尾二）。亦即係話，重返歐聯在望。固然今季賣人收益相信會更低，又冇歐聯收入，對財政打擊都幾大。但只要重返歐聯，收返系數錢同參加錢，又有舞台畀豪門睇辦，自然可以重回正軌。
48. 所以，廢話都要講一句：冷氣軍師如我，就話你知，球員同埋教練嘅人工，應該好大部份要同拎唔拎到歐聯位掛勾，incentive是也 — 固然人地睬唔睬你係一回事。但在阿積士嘅情況，拎到歐聯位嘅，真係額外出50%花紅都抵畀。
