［技術文］足球會到底點營運？有乜收入開支？睇下拜仁點解多錢過多蒙特咁多（下）｜李聲揚
段前言同上集一樣，睇過可飛。
上medium睇都得，自己搵。題目未必人人有興趣，但我自覺寫得好。類似嘅嘢寫過，今次應該寫得最清楚。雖然用拜仁多蒙特做例，但入面解答晒好多球會財政嘅問題，好多門外漢係亂咁嚟。例如包括同你解，球會有乜收入，點計法，每樣佔幾多，受乜影響（你估真係賣波衫收1000銀件咩）。仲有球會有乜開支。仲有轉會費點計，點解1000萬買條友返嚟800萬賣都可以賺錢，點解車路士啲約要簽到咁長，點解幾億買條友返嚟都唔會即時蝕錢。
在德甲層面，會話你知點解拜仁長期獨大，就係因為多錢。但點解其他聯賽冇咁大嘅差距？當然有得解。點解拜仁轉播費多過多蒙特咁多？點解商業收入多咁多？點解比賽日收入都多咁多？全部有得解。仲有，多蒙特上季追貼拜仁，都有啲原因，但拜仁在德甲嘅皇朝/霸權，未來幾年都唔會變。因為做大事都係講錯。拜仁幾乎失落德甲，歐聯又兩季八強出局，但同時財政極好，必定會大手擴軍。當然就係哈利簡尼。唔得都仲會有個明星級中鋒。
兩篇文，上下集，5月尾球季完時寫。入面有少少嘢未update（例如文尼已走），但整體冇乜要改。點解嗰時唔貼上Facebook？咪話個Page禁咗。點解而家貼？因為，哈利簡尼可能差不多成事。我廢事又有啲傻仔話我馬後炮。呢篇文5月尾已寫（其實我3月同隔離台陳公傾，佢已經話好大機會）
＝＝＝＝＝＝＝＝＝
拜仁收入高多蒙特八成，但人工開支只係多五成。代表乜？另一角度睇：拜仁人工開支佔收入五成幾，多蒙特六成幾。買人賣入點計數？又快手解多次。留意，全部唔計入「收入」。買個6000萬嘅人，就唔係一年打晒6000萬開支。但賣人就一次入晒。
1000萬買條友返嚟，800萬放，唔一定係蝕錢，可能有賺。多蒙特嘅轉會收益，就多拜仁好多了。亦係靠呢啲先勉強少蝕。拜仁過去30年，冇一年輸錢。多蒙特之前就有幾年輸錢，但唔多。拜仁一年只係交400萬歐元稅，應該少過紐亞一年交嘅稅
點解多蒙特要放主力？實在迫不得已。
後續：拜仁一定會洗更多錢。
哈利簡尼，華荷域，應該是但一個？
拜仁今夏，應該必定有重磅中鋒加盟（編按：本文刊出之時，哈利簡尼已加盟拜仁）
上篇講咗，球會嘅收入三味——比賽日，電視轉播，商業。德甲雖然多人入場，但波飛平，比賽日收入有限。轉播費亦都唔及英超同西甲。所以商業收入就好重要，而呢方面拜仁有天時地利人和。
［技術文］足球會到底點營運？有乜收入開支？睇下拜仁點解多錢過多蒙特咁多（上）
鬥到最後一輪，係拜仁廢定多蒙特勁？
TLDR：拜仁近年財政上相當保守，變相亦有大量空間擴軍。連續兩季歐聯八強出局，今季德甲幾乎出事。肯定會大手做嘢，應該有個明星中鋒加盟。華荷域都可能未夠爆，不如就哈利簡尼啦。
拜仁收入高多蒙特八成，但人工開支只係多五成。代表乜？
2. 好啦，然後球會嘅開支，主要就係球員人工（應該包埋啲教練團隊）。可以留意嘅係，呢方面，拜仁開支「只係」高多蒙特五成。留意，收入高八成喎。一方面拜仁係相當審慎嘅，另一方面多蒙特亦都相對畀到幾高人工，去追趕拜仁。固然冇可能追到銀碼接近，但都貼啲。
另一角度睇：拜仁人工開支佔收入五成幾，多蒙特六成幾。
3. 睇一樣嘢：人工佔收入幾多（wage to revenue）。拜仁五成幾，多蒙特六成幾。所以多蒙特係相對進取嘅。當然，呢啲水平，同其他聯賽相比，仲係偏低。英超嘅，細會玩到九成甚至過百都得！皇馬巴塞亦去到七八成。亦因為咁你見德甲球會嘅財政整體健康好多。當然亦有人演繹為孤撚寒冇球星唔撚睇。
4. 咁呢啲亦都解釋到，點解德甲啲球員會走晒。其他聯賽嘅球會，好多收入多過德甲大會之餘，仲要畀好大份出嚟做人工。蝕錢？唔知喎，可能有人填洞，可能老破算數（順帶一提，歐洲足協嘅FFP Financial Fair Play就係針對呢樣嘢。好多人有誤解，亦有唔少爭議，亦有人覺得無牙老虎，執法不工。但點都唔係可以當佢透明）
5. 收入減開支，有個EBITDA，扣除其他麻煩嘢前嘅東西。你見，拜仁係多蒙特好多倍。但之後又有其他嘢睇。
買人賣入點計數？又快手解多次。留意，全部唔計入「收入」
6. 首先，唔少人關心嘅，「買人賣人」，完全唔會計入去上面嘅「收入」，平時你睇啲報導講球會收入排名，都唔會計呢啲。
7. 同好多人想當然以為嘅唔同，亦同你打機嘅計法唔同。你打機一般係cash basis，但現實世界睇數一定係accounting basis．就肯定唔係我500萬買個人就500萬開支
買個6000萬嘅人，就唔係一年打晒6000萬開支。但賣人就一次入晒。
8. 有關轉會費點處理，寫過多次，快手同你溫一次。識初級會計嘅，咁話你知，同買部機器嘅做法差不多。重點：買人嘅「成本」，唔會第一年打晒做開支，會分開幾年，多數係合約年期。就將個成本每年攤開，每年扣開支（所以你明點解車路士買人簽埋啲七八年嘅約了，攤開嚟，唔會咁快隊爆條數，但只係透支未來。無論如何，證明FFP都唔係可以唔理的）。
9. 至於賣人？就即時計埋單賺蝕，一年打晒入去。但唔係同你個「成本」計，係計你個球員嘅「剩餘價值」計。
1000萬買條友返嚟，800萬放，唔一定係蝕錢，可能有賺。
10. 例如：我1000萬買個球員返嚟，5年約。第一年嘅「成本」，只係200萬打咗落去盤數，然後第二年又打200萬落去。好啦，兩年後，有人800萬買。咁即時有嘢收入入數。但，唔係「1000萬買800萬沽所以蝕錢」，全錯。你個球員，畀你攤咗兩年，「剩餘價值」係600萬。所以你800萬賣出去，就賺200萬。嗰年呢舊利潤就係200萬。
11. 你見到，「攤銷」都係一個開支。不過兩隊都相對唔太大，因為冇乜貴價買人的，拜仁都仲有8000先生L靴南迪斯，多蒙特更少。
12. 至於折舊，不解了，球員唔會折舊，死物先折舊，主要係球場。
13. 計到呢度，拜仁仲有少少錢賺，多蒙特蝕9000萬。
多蒙特嘅轉會收益，就多拜仁好多了。亦係靠呢啲先勉強少蝕。
14. 不過，之後計埋球員買賣嘅收益，呢部份多蒙特就多好多了。你估都估到。再講一次，呢啲收益唔計入最頂嘅「收入」的。所以你見球會「收入」，唔會一兩年間波動得好勁。
15. 拜仁係極少賣球員嘅收益，你諗真啲，有邊個賣出去收到多錢？史上賣得最貴，就係利雲度夫斯基，都只係4000萬。但未在呢盤數反映，呢盤數係21/22。
16. 相對地，多蒙特就多好多賣人收益，近乎年年有大數。今次呢盤數入面，貢獻者應該係辛祖。賀蘭？未計入去，下一盤（22/23）啦。再之後？應該仲有比寧咸。之前？奧巴美揚 米希達恩 丹比利 佩利斯 葛斯等等都貢獻唔少。拜仁過去30年，冇一年輸錢。多蒙特之前就有幾年輸錢，但唔多。
17. 計埋球員買賣後，拜仁叫做有微利。多蒙特輸3000萬。事實拜仁過去30年冇一年輸錢！好誇張。你諗下過去30年經歷911 雷曼煲爆 歐債危機甚至疫情，即使for profit嘅企業都極少可以30年冇一年輸錢。
18. 至於多蒙特，近幾季輸錢，但金額唔多（點解冇違反FFP？因為疫情下有豁免咗，合理嘅），而之前十年都有錢賺。同廿年前搞到幾乎爆煲要問拜仁借錢（然後畀拜仁講足一世），就大大改善了。不過，因為蝕住做，照計都接近「極限」，好難再出多啲糧，或者重手買人。
19. 多蒙特財政情況情況同拜仁比仲係爭得遠，仲要一般係拜仁每年拉得更開 — 收入多過你，盈餘又多過你。拜仁一年只係交400萬歐元稅，應該少過紐亞一年交嘅稅。
20. 留意下，兩間球會嘅利息開支都好細，負債低（拜仁直頭係淨現金的）。仲有，拜仁只係交400萬歐元稅，多蒙特更少。
21. 聽落幾好笑，因為你諗真啲，一個球員交嘅稅，仲多過成間會。例如紐亞就2000萬歐年薪，照計點都唔止交400萬稅。但諗真啲，合理嘅，球會冇乜錢賺的。
點解多蒙特要放主力？實在迫不得已。
22. 總結返：拜仁收入實在高過多蒙特太多。所以即使多蒙特用更高嘅比例去出人工，但銀碼都仲同拜仁爭一截。而多蒙特嘅「核心業務」就要輸錢。
23. 所以你亦明白，多蒙特真係點解年年要賣人。其實唔少英超以外嘅球會都只能咁玩。球迷會責怪球會賣走主力，但首先球會唔賣球員都未必肯留（新工人工高好多喎），亦可能合約有條款。另外亦係靠啲賣人嘅收益，先頂得住可以出相對高啲人工畀啲唔走嘅人，再加上走咗嘅人亦會騰出啲薪酬空間。
24. 當會方想留球員都想，咁但，點都要多蒙特嘅人工match到對手啦？呢度都己經係一個問號，蝕住錢，仲有幾多空間加人工？就算加到，唔好忘記，冇咗舊轉會收益喎，都難啲填到條數打和。
25. 所以，就真係冇乜其他選擇。因為「本業」已經蝕住做，要靠賣球員嘅收益幫補先填得返條數（雖然可以估計未來兩年會OK靚，有賀蘭同比寧咸嘅數入帳）。而部份球迷都明白，球員約滿走嘅，球會更加近乎一無所有。
後續：拜仁一定會洗更多錢。
26. 後續嘅係：拜仁一定會洗更多錢！呢個結論亦係一早寫定，拜仁拎唔拎到德甲都一樣。
27. 原因好簡單，因為有capacity！上面多次提到，拜仁wage to revenue 比例極低，大有空間擴軍。今屆畀人追到咁貼，加上兩年歐聯八強出局。而家疫情又過埋，高層又大地震，新官上任係時候做嘢啦。
28. 因為財政狀況好，淨現金，除咗薪酬空間有，亦都會有空間去買球員。雖然似乎拜仁極力希望唔好有任何一年蝕錢，但唔好忘記，利雲度夫斯基走人，都令拜仁有啲進帳。仲有，隨住簡尼以及沙利咸美錫被炒，杜曹都未必繼續玩，都好可能會有啲球員走（烏柏美簡奴？哥列斯卡？文尼？），照計亦有啲空間騰出嚟
哈利簡尼，華荷域，應該是但一個？
29. 然後所有人都知，拜仁要搵個中鋒。一路都傳係會斟熱刺嘅哈利簡尼，相信capacity都食得落，人工照計都畀得到。反而熱刺要幾錢，同埋哈利簡尼肯唔肯嚟，先係最大問題。
30. 另外最新聽到，諗縮數嘅拜仁，亦有興趣斟祖雲達斯嘅華荷域。咁當然係因為祖雲達斯冇歐聯踢。人工照計亦畀得起，不過分分鐘仲貴過哈利簡尼（後生嘛），但同時間因為後生，份約又拖長啲，每年攤銷嘅數唔會太大。但當然會唔會嚟到拜仁死火，都有啲變數（照計唔會嘅），講「即食」程度同哈利簡尼爭得遠。
31. 最後亦有傳拜仁傾曼城嘅Álvarez，但我估傾唔埋欄啦。拜仁今夏，應該必定有重磅中鋒加盟
32. 無論如何，哈利簡尼同華荷域都有人爭，曼聯亦想傾呢兩件。好可能最後一個去曼聯，一個去拜仁。
33. 當然，隨住簡尼同沙利咸美錫被炒，杜曹又唔知玩唔玩，以上呢幾個係咪仲係目標，都冇人知。但拜仁會大力增兵，應該幾肯定。
34. 我自己估，拜仁真係應該會搵個重量級嘅中鋒，甚至係比華荷域更加明星級。應該會打破轉會費紀錄，講緊過億歐元。人工亦會破紀錄。
35. 因為拜仁冇咗利雲度夫斯基嘅影響，顯而易見。今季成績認真麻麻，既然有capacity，點會唔做嘢？江湖傳聞，之前因為出手太低，所以簽唔到賀蘭，而家當然後悔中。
