上medium睇都得，自己搵。題目未必人人有興趣，但我自覺寫得好。類似嘅嘢寫過，今次應該寫得最清楚。雖然用拜仁多蒙特做例，但入面解答晒好多球會財政嘅問題，好多門外漢係亂咁嚟。例如包括同你解，球會有乜收入，點計法，每樣佔幾多，受乜影響（你估真係賣波衫收1000銀件咩）。仲有球會有乜開支。仲有轉會費點計，點解1000萬買條友返嚟800萬賣都可以賺錢，點解車路士啲約要簽到咁長，點解幾億買條友返嚟都唔會即時蝕錢。
在德甲層面，會話你知點解拜仁長期獨大，就係因為多錢。但點解其他聯賽冇咁大嘅差距？當然有得解。點解拜仁轉播費多過多蒙特咁多？點解商業收入多咁多？點解比賽日收入都多咁多？全部有得解。仲有，多蒙特上季追貼拜仁，都有啲原因，但拜仁在德甲嘅皇朝/霸權，未來幾年都唔會變。因為做大事都係講錯。拜仁幾乎失落德甲，歐聯又兩季八強出局，但同時財政極好，必定會大手擴軍。當然就係哈利簡尼。唔得都仲會有個明星級中鋒。
兩篇文，上下集，5月尾球季完時寫。入面有少少嘢未update（例如文尼已走），但整體冇乜要改。點解嗰時唔貼上Facebook？咪話個Page禁咗。點解而家貼？因為，哈利簡尼可能差不多成事。我廢事又有啲傻仔話我馬後炮。呢篇文5月尾已寫（其實我3月同隔離台陳公傾，佢已經話好大機會）
＝＝＝＝＝＝＝＝＝
鬥到最後一輪，係拜仁廢定多蒙特勁？
拜仁捧唔捧盃都好，「皇朝/霸權/獨大」未來幾年都唔會變
拜仁收入高過多蒙特八成，點玩？
英超意甲西甲嘅差距，冇咁大，點解德甲一哥二哥收入爭咁遠？就好長嘅故事了。波飛平啦，轉播費平啦。
同樣係轉播費低波飛平，點解意甲又冇德甲呢啲情況？
睇睇拜仁同多蒙特嘅收入，嚟自乜？
比賽日收入，其實只佔兩間球會收入15%唔夠。
點解多蒙特入場人數多過拜仁，但拜仁比賽日收入高一截？
拜仁收嘅轉播收入，仲少過英超包尾嗰隊。
留意返，冇歐洲賽踢，都會有歐洲賽收入的。
你以為冇人買波衫，但拜仁嘅商業收入，全歐洲第二（估下邊間第一？）
1. 冇興趣德甲都好，呢篇文順手教埋你睇球會嘅財政。少少長，但睇咗佢，就可以出少啲醜。
2. 本屆德甲卒之煞科，拜仁11連冠。只睇結果嘅人會講「例行公事」，但其實最後兩輪賽事高潮迭起，特別係最後一場，峰迴路轉。但亦不見得多咗人關心。
鬥到最後一輪，係拜仁廢定多蒙特勁？
3. 好同意劉舜文講，兩隊都冇乜霸氣，季尾鬥失分。拜仁埋單71分，11連冠中，今季最低分。之前10冠最低都有77分，而2011/12拎73分都要亞軍。
4. 多蒙特一樣71分，近10屆都只係得3屆有7字頭。同自己比，表現算係不錯。可惜最後一場失分。
拜仁捧唔捧盃都好，「皇朝/霸權/獨大」未來幾年都唔會變。
5. 呢篇文大半係一早寫定。即使拜仁捧唔到盃，德甲「拜仁皇朝」「拜仁霸權」「拜仁獨大」，未來幾年依然都會存在。因為背後有好多深層次嘅問題，唔係拜仁一季失冠（假設）就會變。拜仁呢輪11連冠之前，咪就係多蒙特捧咗兩次盃。
6. 至於杜曹（聽聞可能又會走）同拿高士文等等，舊文已經寫咗，呢度不重覆。
7. TLDR：拜仁收入多過多蒙特八成，呢種差距，英超西甲意甲唔會有。但點解有咁嘅差距？另外，多蒙特近年人工出得多咗（雖然銀碼仲係遠低過拜仁），亦加埋拜仁唔多爭氣，多蒙特先追得貼拜仁。不過拜仁財力始終強好多，大把capacity增兵。肯定會做。
拜仁收入高過多蒙特八成，點玩？
8. 拜仁在德甲嘅優勢，係必然嘅。因為做大事，都係銀紙，銀紙同銀紙。有錢就搵到好球員，冇錢嘅我畀你發掘到新人或買到平貨（越嚟越難），佢都係會走。啲小朋友可以慢慢拗例外，鄧小平係煙鏟都好長命，但我講普遍性。歐聯近N年，唔好話捧到盃，入到決賽嘅都全部係收入頭十嘅富豪球會。今年國米已經係少有嘅例外，但都排十頭。之前馬體會多蒙特都差不多。如果講聯賽，更加唔使講。只有N年一遇嘅李斯特城咯，頂多加埋拿坡里。
9. 好簡單，睇下拜仁同多蒙特財力爭幾遠。睇圖，拜仁收入高過多蒙特八成以上。而呢個情況都持續咗好多年，係結構性嘅。咁但，廿年前個分野就冇咁大。
10. 仲有，你亦可以睇到，多蒙特拎德甲嗰兩年，拜仁嘅收入一樣遠高於多蒙特，差距甚至比而家更大。咁你可以話當年高普真係勁 — 同埋，當然之後拜仁就搶走多蒙特啲主力了（你見近年多蒙特就賣去英超多，唔知係唔想益拜仁，定拜仁度縮，定外國球會之前未識貨，定啲球員未夠班）
11. 順帶一提，多蒙特收入同拜仁爭得遠，但同德甲第三大勢力（成日變）嘅收入比，又係爭一截。呢啲真係結構性問題
英超意甲西甲嘅差距，冇咁大。
12. 拜仁嘅收入，高收入第二嘅多蒙特七八成起碼。呢種情況，在英超西甲意甲係冇嘅。英超不用講，啲收入好接近，咁雖然有時都有啲富貴球會甩轆，例如今季車路士或早幾季曼聯，但我地講普遍性。西甲皇馬巴塞收入一般都係10%距離以內（巴塞點玩到負資產就另一故事）。同英超西甲比，意甲頭二就爭得遠啲，但都冇德甲咁遠，而且叫做有三頭馬車。可能因為咁畀拿坡里漁人得利（而拿坡里就真係難得了）
13. 唯一比德甲誇張嘅？當然係法甲。PSG收入係第二位（多數係里昂）幾倍。其實唔使點踢啦。
點解德甲一哥二哥收入爭咁遠？就好長嘅故事了。波飛平啦，轉播費平啦。
14. 點解德甲會有呢啲問題呢？就真係好多深層次問題，有啲仲係互為因果。首先係德甲轉播費平，拜仁收嘅德甲轉播費，不及英超包尾嗰隊。咁仲有，德甲入場費平，場場坐七八萬人都冇乜錢收。所以球會難靠球迷，只能靠商業收入，而呢方面拜仁有好多先天後天優勢。
15. 當然仲有德國社會近年相對左傾（你冇睇錯），相對崇尚平等，相對仇富。波飛要平，熱狗賣貴啲都畀人鬧，少亞洲客，50+1有好強民意支持，抗拒老細足球中東佬大陸佬俄佬美國佬，唔要私募基金，呢啲都係原因。而偏偏歐洲足球近十幾廿年係變成金錢遊戲。在德甲，你唔會見到好似曼城紐卡素狼隊呢啲咁忽然富貴。
16. 至於你話「年年嗰隊贏冇乜人睇」，我覺得係相當次要。今年德甲鬥到最後一日啦，你見好多人關心咩？況且，由始到終德甲轉播費佔球會收入都係好少。
同樣係轉播費低波飛平，點解意甲又冇德甲呢啲情況？
17. 不過話說回頭，「德甲冇人睇」嚟講，都睇你點定義。固然係winner take all，你睇得英超就冇時間睇德甲。不過，德甲嘅轉播費，都係歐洲排第三，只落後於英超西甲。
18. 可能你問，既然意甲轉播費仲少過德甲（唔係爭好多），做乜意甲又唔見有德甲呢啲頭兩位爭咁遠嘅情況？除咗三頭馬車歷史因素外，當然亦因為意甲以前就有老細足球，亦都相對地幾歡迎外國投資者，有美資私募基金入股，甚至古靈精怪嘅班主。德甲係冇呢啲嘢的。
19. 上面呢啲好多係社會文化問題，一來悶，二來我又唔係德國人，未必細講。但下面講數字，就會再講到。我專長都係講返啲數字，即係錢。
睇睇拜仁同多蒙特嘅收入，嚟自乜？
20. 呢個圖，自己save低佢吧。拜仁同多蒙特2021/22盤數，順手我同你解下到底球會嘅數點睇，有乜收入有乜開支。其他歐洲球會都係咁上下，間間數字同比重會唔同，但items差不多都係嗰啲，因為啲「業務」差不多全部一樣。
21. 上面講過，拜仁嘅收入，高過多蒙特八成。咁到底球會有乜收入？你大約都估到，但實際上分佈係點？拜仁在邊個方面領先多蒙特？答案係，「所有方面」
比賽日收入，其實只佔兩間球會收入15%唔夠。
22. 首先，最不重要嘅，比賽日收入，計埋歐洲賽主場。除咗門票，仲包埋你入場食大蝦三文治（Roy Keane名物）嘅開支，甚至包埋你住球場酒店。當然好多老一輩球迷會懷念當年嘅「社區足球」，睇完波見到顧錦輝坐你隔離枱飲茶咁。但世界真係唔同了。
23. 睇數字，你會見到，比賽日收入，微不足道，真係唔好以為啲入場球迷係最大支柱。部份亦因為疫情，2021球季開頭仲有啲限制，遊客又未到。但，即使疫情前，拜仁比賽日收入都只係9000萬，多蒙特6000萬。當時嘅比賽日收入，佔佢地收入都唔夠15%。亦都所以，你見到疫情時，閉門都唔緊要，有影響但未死得人。但老虎蟹一定要踢返，播電視。
24. 英超嘅比賽日收入，就會高一截嘅，阿仙奴嘅比賽日收入佔總收入25%（飛貴，球迷又富貴）。但你話德甲冇入入場睇？拜仁多蒙特差不多場場爆，坐七八萬人。不過，德甲嘅飛平好多。
點解多蒙特入場人數多過拜仁，但拜仁比賽日收入高一截？
25. 呢個亦解釋埋，點解講入場人數，多蒙特仲多過拜仁，但拜仁比賽日收入高多蒙特一截（雖然不太重要）。拜仁波飛貴啲，啲球迷又富貴啲，啤酒都貴啲（有啲亞洲球迷，例如我）。
拜仁收嘅轉播收入，仲少過英超包尾嗰隊。
26. 好啦，第二樣好重要嘅嘢。轉播。對德甲嚟講，就冇英超西甲咁重要（雖然都重要），因為德甲轉播費平。上面講過，英超包尾嗰堆，分嘅錢仲多過拜仁在德甲分到嘅錢。所以對啲英超中型班嚟講，轉播收入可以佔總收入六七成。拜仁就三成左右，多蒙特四成。
27. 補充嘅係，好多人唔知，呢個轉播費，計埋歐洲賽收入。唔止轉播，仲有其他嘢（但唔包主場門票同熱狗，呢啲計入比賽日收入）。咁除咗轉播同埋門票熱狗，仲有乜？
留意返，冇歐洲賽踢，都會有歐洲賽收入的。
28. 歐洲賽，除咗電視外，仲有好多錢分。有得參加已經分一舊。每贏一場又有錢，晉級又有錢。唔止，食「系數」都有錢收。即係乜？即係每間球會有個歐洲足協系數，睇系數分錢，所以唔好以為啲系數只係啲數撚煩膠諗嘅無聊嘢 — 實際上，即係你見到啲球會冇踢歐洲賽，但都照有歐洲賽收入，「例如下季嘅車路士」。唔好睇少呢舊錢，有啲歐洲賽邊緣份子，開支大，但唔係屆屆歐洲賽，就靠呢靠嘢幫補。
29. 呢度不妨話你知，德甲嘅轉播費，拜仁同多蒙特分到嘅，分別不大。9000萬vs 8000萬。咁分別在邊？就係歐洲賽。拜仁雖然上季八強出局（今季都係），但分組全勝（今季都係），加上系數極高（近年唔係第一就第二），分好多錢的。
你以為冇人買波衫，但拜仁嘅商業收入，全歐洲第二（估下邊間第一？）
30. 然後，係商業收入。拜仁冇上市，多蒙特有。但拜仁係一間極之識做生意嘅公司。商業收入嚟自乜？好多嘢，但並唔係啲人以為咩「美斯加盟PSG賣波衫都賺返個轉會費」，一件波衫一千蚊，球會只係分一百幾，甚至更少，主要係Adidas Nike之類賺。順帶一提，Nike一年500億美金收入，Adidas一年200億多啲，而最富有嘅球會都只係70億左右（更唔好講純利）。
31. 你以為少人捧拜仁，但唔代表佢商業收入低。事實上，拜仁嘅商業收入，全歐洲第二。高過晒所有英超西甲球會。第一邊間？PSG。你懂的。
32. 拜仁嘅商業收入，嚟自德國大企業嘅贊助。Adidas，Audi，安聯（球場嘛），德意志電訊（波衫），近年仲有卡塔爾航空。而頭三間亦係拜仁嘅股東。多蒙特嘅玩法其實都差不多，但啲股東冇咁巴閉咁解，Puma，Evonik，Signal Iduna，所以亦冇咁多錢。況且，慕尼黑係個相當商業嘅城市，亦多遊客，多蒙特就係工業城市，企業同埋受眾都唔同。再加上，拜仁近乎係唯一一間有「Global Fanbase」嘅德甲球會（呢方面可能係雞同蛋，成功自然有人捧）。在商業呢方面，拜仁領先多蒙特成個幾開。
33. 總結：德甲門票收入少（平飛），廣播費又相對低，所以都好睇呢啲商業收入。拜仁在呢方面，就天時地利人和（在漢尼斯年代呢啲嘢突飛猛進的）
34. 下一篇，講埋啲開支，同埋你最關心嘅「買人賣人」，仲有未來幾年嘅發展。
