【拖路士豪賭】點解車仔嘅約會咁~~~長嘅｜李聲揚
長到好似我篇文咁，玩乜？簽件烏克蘭仔畀8年約，你見過未？仲有兩件7年約。點解？因為莫財！條數太難睇，搞唔掂。講到尾，都係後人埋單，我死後，話撚知佢洪水滔天。一場豪賭，得就得，唔得就返順德。
畀埋個content table 你：1-7 開場。8-19 溫書，講返會計101，球員轉會費點處理。20-27 點解車仔要開長約。28-36 球會畀長約嘅另一好處。37-39 呢場豪賭嘅關鍵。40-43 其他有機會出現嘅趨勢。
1. 之前話有100個人like就寫，而家找數。呢類文係有趣嘅，可惜我要開飯，而呢類文唔會幫到Patreon。所以真係為興趣，兼且為分享，傳授下知識咋。咁如果冇人睇，就冇意思。但既然有人睇，就寫。特別表揚有讀者話之前寫巴塞好睇，咁耐你都記得，抵我寫多篇。
2. 我既不捧車，也不反車。實情我少睇英超，而家甚至德甲都冇乜睇（亦冇得睇）。不過冇所謂，反正唔係講波，係講錢。
3. 就我理解嘅情況，俄烏戰爭後，阿巴莫域治唯有退出，美國佬接手。此人風評似乎認真麻麻，之前提出「英超南北部明星賽」，畀各界恥笑，「條友真係唔識架喎！」。另外，之前幫車仔拎歐聯嘅杜曹在歐聯第一場輸波後，就即時被炒，換咗新人，似乎杜曹早早已經同美國佬唔妥。我當然支持杜曹（我捧德國嘛），但見新帥上任，好似開頭幾好，歐聯首名出線。但去到聯賽，冇耐就開始走樣，而家落到第十，似乎歐聯位都有啲窄。以上就係我理解嘅，錯都冇乜關，唔係講波，係講錢，旨在畀啲比我更唔熟嘅人知情況。
4. 好啦，車路士今季，絶對係大手筆，買人好重手，好似話4億英鎊，史上冇一隊一季使咁多錢。但如上面講，成績就認真麻麻。轉會費固然比得多，但人工亦畀得好重手。呢啲大家都可能知。
5. 但，最令人「奇怪」嘅，係合約長度，啲約簽到好長。烏克蘭仔簽8年幾嘅約，另外仲有兩件7年約。又，睇Financial Times先知，原來MLB啲約可以簽到12年，長知識。但當然同足球係兩回事，唔知美國佬又係咪當MLB咁玩了。
6. 好啦，簽長約，有乜問題？有啲普通人都識答，啲高薪友到時賴死唔走呀，簽咗水貨你甩唔到身呀解約又賠死你呀之類。咁你可以話，扯，我計掂數咪得，年期長啲，但人工低啲，可能賠錢條總數一樣之嘛。不過兩樣嘢。第一，「車路士」「人工低啲」，似乎唔應該放到埋一齊。第二，係咁爽嘅，人人一早做啦，你美國佬發現新大陸咩。即係嚟到問「點解唔可以有英超南北部明星賽」咁—當然，大膽可能係好事，人做你唔做，夠勇，魯迅話頭，總有第一個人去食醬油蟹，但就睇下有乜風險了。
7. 球會畀長約有乜問題，上面講咗。但對球會有乜著數？就要解一解。
＝＝＝＝＝＝＝＝＝＝＝＝＝
8. 講落去之前，首先溫習少少，球會財政101，第7至18段，你可以成段save低。關於「轉會費」同「球員」點處理。識嘅可以skip，直去19段。我寫過多次，但亦唔介意每次由頭寫起，自己都總可以精益求精。最好你有中四嘅會計101程度，冇亦冇壞，我是個好老師。
9. 你同我，一般打工仔，就唔係公司嘅「資產」—公司爛部電腦，好快有人畀部新嘅你；你走咗條馬仔，分分鐘永世情唔返。公司要掉一部電腦換一部電腦，都好多手續，但炒一個人，快手過清垃圾。
10. 不過球星唔同，球星就真係等同球會嘅「資產」。你老哥唔會出現在公司嘅Balance sheet上面，但球星會！
11. 對球會嚟講，球員就真係好似工廠買部機咁。轉會費，就係你買機嘅錢（人工另一樣嘢）。呢度講嘅重點係：折舊！
12. 你要記住，我買部機，100萬，但唔會嗰年就扣100萬嘅「開支」落你本數薄，因為你部機用好多年。10年折舊嘅，咪每年扣10萬，亦好合理。
13. 同樣地，球員買返嚟，差不多咁玩法。雖然唔叫折舊（Depreciation），叫「攤銷」，但差不多一樣。2億買個尼馬返嚟，咁唔會一年食晒落去嘅，咪攤幾年。
14. 但攤幾多年？呢度就有趣啦。機器嘅，問會計師，有指引的，你總不能買部iPhone攤30年。球員嘅，簡單，「壽命」幾長？就係張約咁長。到時簽過就等於買部新，走咗嘅就已經唔關你事。
15. 順手一講，都有啲人留意到，球員交易，唔使一次過畀現水。可以分好多期。但，你一炮過定分四期，對以上嘅嘢，係完全冇影響。以上嘅係會計嘅開支，賺蝕，無論你一炮定分四期，都係一樣 — 但當然，分期定一炮過，對你球會嘅cash flow就有唔同。Cashflow vs accounting revenue/expenses，都係中四會計嘢。我講真的，雖然我唔鍾意呢個科目，但真係應該必修。
16. 順帶一提，上面例子部機，100萬，攤10年。去到第5年年尾賣走，咁點？睇你賣幾錢。同埋留意，你部嘢，係折到剩返50萬（第5年年尾嘛）。咁你賣得10萬，你咪「蝕」40萬，即年就埋計計賺蝕。你賣到70萬，你咪「賺」10萬，也是即年計賺蝕 — 留意，並唔係我100萬買，70萬賣，就「蝕」咗30萬。文雅啲嘅講法，你有用咗部機5年。粗俗啲嘅講法，「我有畀你屌架！」
17. 球員買賣，亦係差不多。遲下我會重寫返個經典例子，祖雲達斯同巴塞「交換」Miralem Pjanić同Arthur Melo嗰單嘢，完全係財技， 無中生有變盈利出嚟，天才。但，邊有無中生有？其實係後人埋單。不過，我走後，話撚知你巨浪滔天。
18. 咁你當然見到巴塞後來咩情況，亦見到祖雲達斯大地震，扣分。留意，唔係「因為」呢單嘢搞到巴塞財困，或祖雲達斯違法。呢一單嘢應該係合法嘅，只係呢單嘢畀你見到，兩間球會當時已經山窮水盡，要諗埋啲咁嘅橋。幫得一時，幫唔得一世。
19. 車路士嘅情況，似乎都有若干相似。當然結局未必一樣。
＝＝＝＝＝＝＝＝＝＝
20. 睇完上面講球員轉會費點處理，你應該好明白，點解車路士簽咁長嘅約——因為，長命數長命填！攤長嚟玩！不如改名做「拖路士」。
21. 條數好易計，我簽件尼馬返嚟，兩億，如果佢簽兩年約，每年一億，好惡啃。但如果簽十年約，一年兩千萬，易啃好多嘛！（人工就另一個問題，佢老哥會唔會同你癲亦係另一個問題）
22. 點解車路士要攤長嚟玩？當然同祖雲達斯同巴塞差不多，因為莫財！留意，莫財有好多意思。呢度唔係討論cash flow 上嘅（好似剛剛舉債借咗錢），而係講你會計賺蝕上嘅「莫財」。
23. 再講白啲，啲約唔拖長啲，「會蝕到仆街架」。蝕到仆街又點？就真係有問題的，雖然好多人都認為FFP（Financial Fair Play）多餘，又或者認為係紙老虎 — 但真係唔係，否則唔使搞咁多嘢。你球會年年蝕大錢，係真係有問題的。你話中東國家機器天價贊助PSG 曼城之類，做都做到條數賺，你可以咁講，但好歹都要「做」條數出嚟，咪話畀你知，真係唔係完全紙老虎。況且，唔係間間球會有中東佬。
24. 咁但，好明顯睇到，數字遊戲啫，其實都係咁多公，只係攤長嚟玩。亦即係，預支埋後人啲嘢。美國佬一人拍拍籮柚走咗都好，甚至車路士touch wood變咗中下游都好 — 你之後年年都要硬食烏克蘭仔啲開支，除非佢走啦。
25. 但其實，又諗下，正因為張約攤得長，烏克蘭仔兩年後，都只係折舊咗2/7左右嘅「身價」。你到時賣出去，好可能都係「蝕錢」—到時一樣你要硬食一舊 loss（順帶一提，呢個係巴塞搞一輪先甩到Miralem Pjanić嘅原因，一賣就蝕到趴的）。相反，假設佢三年約，兩年後烏克蘭仔走人，已剩返1/3「身價」，到時同樣轉會費（同七年約相比），「賺錢」就易啲。
26. 所以，都係嗰句，「我死之後，哪管洪水滔天」。
27. 當然你正面啲睇，英超轉播費仲係升緊，球會估值其實一路有升冇跌（你睇曼聯？有機會再講）。亦話唔定，之後除笨有精，七年後轉播費勁升，收入大升，到時烏克蘭仔啲數，小菜一碟。係有咁可能的。不過，呢個都不改個玩法係透支將來嘅一場豪賭。況且，我係有啲懷疑啲轉播費可以再升幾多嘅。你一個月肯唔肯畀一千蚊睇英超？我就唔會了。但呢啲只係我嘅離題個人猜測。
＝＝＝＝＝＝＝＝
28. 對球會嚟講，畀長約嘅另一好處，就係可以「鎖定」球員嘅人工（我係有啲懷疑呢個好處嘅）。
29. 好簡單，同問財仔或銀行借錢交稅差多，一般個息口定死咗（供樓就浮息嘛）。咁就係債主同債仔鬥智啦。如果之後係咁加息，債仔咪著數咗，平價鎖定。但如果之後係咁減息，咪債主著數，一早鎖咗你。（有冇留意，銀行做定期好少畀你做幾年？就係唔想畀你鎖死，而家全部減晒定存息口了）。
30. 咁你話，球員啲人工，照計一定升喎。應該係丫，呢個亦係啲人用「長約」鎖定嘅理由。
31. 但你諗真啲，咪又係一條數。好似你老細話一次過加你人工，以後十年你都拎一個數，你咪計下咯。你而家拎一皮，咁大家都會當你之後係升，但幾多？今日一個數幾多鎖定先有著數？都難計。睇下邊個計得叻「咁但我估大家對美國佬嘅眼光都有啲保留」
32. 你識諗，球員就唔識咩。你一次鎖我七年，我如果覺得自己有料嘅，梗係叫到高一高。可能我錯，但我有啲懷疑，「肯簽七年約嗰啲都係水貨」。
33. 不過，在球會嚟講，就真係有certainty（雖然，一定要出糧畀水魚，都係certainty），至少嗰幾條友你唔使擔心佢要加人工。可能真係畀多咗，但至少肯定咗個數。
34. 當中亦涉及一樣嘢：車路士而家嘅人工，已經畀得好高。點高？好簡單，咪睇wage to revenue，人工佔收入幾多。車路士超過70%，英超迫悉匙之中最高。「但戰績呢？」
35. 正因為人工已經好高，你可以話車路士都冇乜選擇。鎖定幾條友，甚至鎖定多啲友，至少有數計到，唔好踩過界———然後轉播收入慢慢升，你個wage to revenue，就會低返低啲
36. （而好似唔少英冠隊，wage to revenue係超過100%的，即係間間都做到爛，蝕住做。點解？因為得就得，唔得返順德，人人軍備競賽搏到盡。升到上英超，收入多N倍。升唔到嘅？爆煲咯，等後人埋單。好似近年都有啲嘢做緊，去拉近返個平衡，英超啲錢分啲落英冠度）
＝＝＝＝＝＝＝＝＝＝＝＝
37. 其實講到尾，呢個豪賭成唔成功，好睇一樣嘢：你簽啲友對唔對辦。一來我唔熟，二來都言之尚早。不過暫時睇，美國佬買人嘅眼光，麻麻地咋喎。「但又鍾意管」。
38. 知唔知似邊個？正係巴塞前會長Bartomeu。呢條友正係擺明唔識，但又要自己話事。唔識嘅好心搵個識架啦，但佢又炒咗蘇比沙列特。球員及蟹，唔識莫買。Bartomeu當年堪稱轉會市場大水魚，當中故事，舊文寫過。
39. 咁，都唔緊要嘅，「巴塞咪又西甲榜首」。又，巴塞早早就「負資產」，資不抵債。咁但，銀行又唔會清佢盤嘅，之後西甲轉播費會不停升嘛，又會有歐超聯嘛，怕且係。
＝＝＝＝＝＝＝＝＝＝＝＝＝＝＝＝
40. 最後離題一講，但，雖然我本人反對，不過「歐超聯」呢個東西，應該係必然結局，只係上次嘅形式太輕率。同樣地，其實歐洲足球，應該都係會「北美化」。大聯盟，wage cap。就唔再係以前人人鬥燒錢嘅年代。你見而家買嘅，多數都唔係暴發戶或中東佬大陸佬油王，而係商人，甚至基金。就真係會推到個遊戲唔同了。
41. 而另一個重點，亦真係睇大家，到底會為支持嘅球隊付出幾錢。我以前寫過篇文，寫得唔太好，反應亦冷淡。但你真係諗下，其實你一年付出嘅錢，有幾多？好可能比你想像中少。你一個月幾舊水嘅電視費，有幾多去咗間球會？
42. 你嗰幾舊水，要扣好多嘢喎。李澤楷（股東）要食你一舊，冷氣房啲高層要分你一舊，去到台都好，講波佬又分你一舊（嘻）。然後？仲要好多個台嘛，只係體育都好多運動，只計足球都幾個聯賽—只計英超都廿隊！你嗰幾百蚊，有冇十蚊分到去？
43. 其實條數掉轉睇就睇到，你睇一隊球會，一年幾錢收入。再睇下有幾多「球迷」，咪計到每人用咗幾錢。應該比你想像中少好多。雖然，咩叫「球迷」，都幾難定義。曼聯有幾多球迷？都答你唔到。球迷會有幾多人答到你，IG幾多like答到你，電視幾多人訂答到你，幾多人入場答到你 — 但可能有啲陪有錢仔入場嘅女，越位都唔知係乜，邊隊打邊隊都唔知，但一樣貢獻咗唔少錢。
