延續第三章「回傳唔畀用手？輕鬆」，上一集講到 Frans Hoek 點樣令到阿積士嘅守門員完全唔怕 1992 年新增嘅「回傳球例」，從而令到阿積士再次成為歐聯冠軍。
第四章就講到，Frans Hoek 嘅教導方式其實都唔係人人鍾意。其中一個最好嘅例子就係佢跟隨雲高爾去到曼聯嘅時候，迪基亞並唔享受同 Frans Hoek 合作嘅日子。
－－－－
第四章「迪基亞的質疑」
雖然之前講到 Frans Hoek 嘅訓練方式像真得嚟又有趣，但其實都有人抗拒佢呢一套理論。
「啲人一開始覺得我咁樣練波係痴線嘅。」而呢件事相信佢自己都知道係無法避免。但當 Frans Hoek 成為喺荷蘭、西班牙以及德國班霸球隊嘅成員之一，佢呢種要令到守門員要跳出 Comfort Zone 嘅訓練方式已經變得街知巷聞。
「有啲人就係唔想離開 Comfort Zone。如果我要佢地跳出嚟，佢地就會好唔舒服，所以佢地唔想咁做。但我成個人生就係不停地跳出 Comfort Zone，因為咁先可以進步，而且係唯一一個辦法。」
曾經有報導指迪基亞以及其他曼聯嘅守門員喺雲高爾執教嘅時候，對 Frans Hoek 嘅訓練方式非常不滿，而佢都指確有其事。
「當你成個職業生涯都係做緊同一樣嘢，而呢樣嘢令到你成為曼聯嘅守門員，而我嘗試令你唔好做呢樣嘢，你一定會質疑我做緊乜同埋點解我要咁做。」
「但我根本唔會因為驚你嘅質疑而唔去做一啲我認為幫到守門員進步嘅事。我唔會將守門員獨立咁睇，我係用成隊波嘅角度出發，因為我地根本唔應該用其他角度去睇。守門員同其他場區球員嘅關係對於球隊嘅表現係非常之重要。」
「如果我想踩單車叻啲，我就要去踩單車。如果我想做個好嘅跑手，我就要去跑。如果我想做個好嘅守門員，就自然要同自己嘅隊友一齊面對對手嘅挑戰，因為現實比賽就係咁。雖然可能對唔少人嚟講呢個方法係非主流，但我認為守門員訓練只有呢個方法可行。」
「我覺得咁樣練波係好合理。因為足球一路改變緊，所以我都需要跟住改變。現代足球對守門員嘅要求愈嚟愈高，咁我地應該點樣去令守門員習慣要同場區球員合作多啲呢件事？」
「如果叫我諗返以前喺阿積士教波嘅時候，呢12年內大概有一半時間係進行守門員獨立訓練，另一半就係同埋場區一齊練習。因為當時我認為獨立訓練仍然重要，但慢慢我都改變到變成 7 成時間係同場區練習，得返 3 成時間係進行獨立訓練。」
「喺曼聯嘅時候，我改變到有 8 至 9 成時間守門員係同場區一齊練習，只有 1 至 2 成係獨立訓練。我可以話你知嗰陣班守門員係好唔鍾意呢個訓練方式。因為同佢地認知嘅訓練太大分別。偏偏我係一個好硬頸嘅人，而我認為只有呢個方法可以真正幫助到守門員進步。其實獨立訓練唔單止未必幫助到守門員，有時仲會令到佢地退步。」
－－－－
練波反而會退步？點解會咁？Frans Hoek 嘅解釋其實非常之有道理。
「你諗下獨立訓練，成日都係得同一個球員射波。真正比賽入面幾時會係咁？當練波嘅時候次次都係同一個助教射向守門員，練完一次之後都知道曬佢會點射，根本就無驚喜，完全無變數。」
「唔單止係咁，如果講緊一場比賽，我仲要留意埋班隊友點樣防守同進攻。所以守門員係需要同其他隊友合作同埋有閱讀球賽嘅能力。」
「我喺巴塞嘅時候，點解會敢出當時仲係好後生嘅域陀華迪斯 (Victor Valdes) 同連拿 (Pepe Reina) 做正選，就係因為我知道佢地由細到大都同場區球員一齊訓練。變相佢地唯一一樣嘢要令我擔心嘅，就係佢地能唔能夠應付喺一個有十萬個觀眾嘅球場入面比賽嘅壓力。」
「大家成日都會聽到，守門員好似比起場區球員成熟得遲。點解？係因為佢地練波嘅時候淨係做獨立訓練根本就無進步，唯一令佢地進步嘅時候就係踢真正嘅比賽。所以當守門員踢到 30 歲嘅時候，佢地已經踢咗 10 年波，終於有 400 場比賽嘅經驗。」
「如果我地可以將比賽嘅情況引入訓練當中，令守門員能夠喺生涯初期已經可以面對到比賽會遇到嘅難題，咁變相佢地就可以更加早達到自己生崖嘅高峰。」
「雲達沙當年只係 22 歲已經成為球隊正選，域陀華迪斯就 20 歲，連拿同樣係 20歲。只要用上適合嘅方法令到班守門員盡早了解比賽入面會發生咩事，年紀輕輕就做正選絕對唔係一啲難以置信嘅事。」
「我從來都唔理任何嘅阻力。因為呢件事唔係關於我，而係我想其他人都要盡快清醒，要快啲知道點樣練波先真係 Work，令佢地反思。我嘅工作係提供最好嘅訓練畀一班守門員，所以我嘅思想一定要夠開放。如果你唔同意嘅，你示範一次你嘅方法畀我睇。如果有人有唔同嘅諗法，非常之好，但你一定要解釋到點解。」
第四章完，下回待續。
資訊浩瀚；東張西望。
竭盡所能；深入求真。
企高一格；全新體法。