人物專題 － Frans Hoek 第三章「回傳唔畀用手？輕鬆」｜守門員日常 – Goalie Daily
延續第二章「守門員教父的由來」，上一集講到 Frans Hoek 接手成為阿積士守門員教練之後，由完全唔知點入手，慢慢發現佢到自己嘅訓練幫唔到班守門員踢告魯夫需要嘅戰術，所以佢開始嘗試用埋場區球員做守門員訓練。
第三章就講到，Frans Hoek 究竟點樣慢慢將守門員呢個角色改變，特別喺球例新增「禁止回傳用手」呢條條例之後，點解只係得阿積士嘅門將無受到影響。
（第一篇鏈結）
（第二篇鏈結）
－－－－
第三章「回傳唔畀用手？輕鬆」
守門員經常被人認為同其他場區球員與眾不同，甚至被忽視。不過告魯夫唔認同守門員應該被當作係「外人」，因為佢覺得球場上佢嘅球隊係十一個人拚搏緊，而唔係十個球員加一個。
「告魯夫有一套好獨特嘅諗法同行為。對我嚟講，佢嘅足球理論同我喺教練班學嘅嘢完全係南轅北轍，所以令我覺得好有趣。」
「不過其實我當年自己都係咁踢，我有閱讀比賽嘅能力同埋完全唔怕離開自己條白界線，所以我好快就明白同適應到告魯夫想守門員主動啲做埋清道夫以及幫手組織攻勢嘅諗法。」
「呢個打法對阿積士非常重要，因為當時隊波就係參照 1974 同 1978 世界盃荷蘭國家隊嘅踢法，當時防線亦都推得好上，變相球隊就需要一個與眾不同嘅守門員。」
「當時被稱為最好嘅守門員，例如舒米高同簡尼，個個都係大大份。但同時無乜邊個可以好好咁閱讀球賽嘅發展，同埋太過被動。而喺阿積士，我地需要一個好似莊布祿 (Jan Jongbloed) 咁主動嘅守門員。」
經過咁多年之後，Frans Hoek 終於可以見到佢同告魯夫嘅呢套守門員理論以及打法已經變得無處不在。自從 1992 年足球球例新增「回傳唔可以用手」呢條例之後，令到足球比賽進一步推向追求 Frans Hoek 心目中理想嘅守門員打法。而呢條球例推行三年之後，阿積士再一次成為歐聯冠軍。
「我好鍾意呢條例，雖然差唔多其他人全部都好憎，但我真心覺得好正，因為成件事就係差唔多跟住阿積士嘅打法而設咁，所以我地有好大嘅優勢。我地有控球權嗰陣，我地可以用埋守門員做控傳形成人數優勢。當對手有控球權嗰陣，對方回傳畀守門員之後都唔知可以點，變相我地同樣有優勢。」
「我好好彩，雖然唔係一秒變神仙，但我嘅一班守門員慢慢能夠將訓練嘅成果帶入比賽當中。而最有趣嘅部分係見證足球比賽一路發展同改變，相信大家都見到愈嚟愈多領隊憑住一啲特別嘅思維模式從而突圍。」
「你睇下高普，自從利物浦簽咗艾利臣之後佢就開始愈拎愈多冠軍。你再望下曼城，簽咗艾達臣之後同樣情況發生喺佢地身上。守門員比起大眾想像中其實係一個更加重要嘅位置。」
第三章完，下回待續。
資訊浩瀚；東張西望。
竭盡所能；深入求真。
企高一格；全新體法。
