人物專題 － Frans Hoek 第二章「告魯夫的賞識」｜守門員日常 – Goalie Daily
延續第一章「守門員教父的由來」，之前講到 Frans Hoek 呢位被稱為「守門員教父」嘅守門員教練點樣喺未有互聯網嘅時代，以 22 歲之齡完成咗史上第一份以守門員為題材嘅論文。
第二章將會講到佢點樣同告魯夫開始合作，以及當時作為國內第一位守門員教練遇到嘅難題，以及佢點樣嘗試因應球隊嘅需要而將自己嘅訓練方式改變。
（第一篇鏈結）
－－－－
第二章「告魯夫的賞識」
「我都仲有當時份論文喺手。」
過往 40 年有無數位球圈人仕閱讀過 Frans Hoek 嘅呢份論文，不過無一個人嘅份量比起上一位當時效力緊飛燕諾嘅荷蘭名宿，告魯夫。
當時 Frans Hoek 只係 27 歲，告魯夫聯絡佢嘅時候，Frans Hoek 仲踢緊荷甲球隊禾寧丹（FC Volendam）。
「當時告魯夫主動聯絡我，話佢睇咗我本書而且覺得好正。當時我真係覺得難以置信，呢番說話竟然出自於大名鼎鼎嘅告魯夫。不過當時並無咩特別事發生住，因為當季我受傷而告魯夫下一季返咗去阿積士成為佢地嘅領隊。」
「之後有次我踢完比賽，告魯夫打比我。初初我以為有人玩嘢扮佢，點知真係告魯夫搵我。佢同我講佢一直都好鐘意同唔同嘅專家合作，而佢覺得我就係一位守門員專家。當時係 1985 年 10 月，佢叫我去搵佢面對面傾下點合作，而我當然有赴約。」
「邊個會拒絕阿積士？我一定唔會囉。仲要係告魯夫，更加唔會 say no。佢真係一位非常優秀嘅人，亦都好友善，但幾友善都好佢始終都係告魯夫，所以我當時真係好興奮。我當時應該最少都係荷蘭國內第一位守門員專屬教練，隨時可能連其他地方都未有呢個位置。」
－－－－
告魯夫雖然好清楚佢好需要 Frans Hoek 嘅幫忙，但其實都唔係好知要佢點幫。不過其實連 Frans Hoek 自己都唔係好清楚自己嘅角色要做啲乜。
Frans Hoek 除咗寫佢篇論文之外，亦都係一個稍有名氣嘅守門員，荷蘭名宿尹布基倫 (Hans van Breukelen) 亦都係佢嘅研究對象之一。Frans Hoek 同時擁有體育學士學位以及教練牌照，亦都負責過一啲訓練營，仲開過班教授守門員相關嘅知識。但佢嚟到阿積士作為一位守門員教練，每日對住班球員，情況變得完全唔同。
「我真心唔知應該點。就好似一路望住未來向前行，但既唔知身後有咩追趕緊，亦唔知前面有啲咩迎接緊我。」
所以一開始佢就做一啲佢當時認為係正確嘅事，就係不停對住班守門員射波。
「點解我咁做？因為我當時唔敢離開 Comfort Zone。嗰陣阿積士有雲巴士頓、列卡特等等嘅大球星，而我只係一位小薯。當時我只係得 28 歲，仲要來自一間細球會，仲要
上季先對過呢班球星，突然間我就變咗要帶住佢地幾位守門員喺球場嘅另一邊進行獨立訓練。」
不過呢個訓練方法好快就改變咗。
莊布祿 (Jan Jongbloed) 係荷蘭國家隊 1974 年世界盃嘅正選守門員，全因佢夠主動離開自己嘅禁區做埋球隊嘅清道夫。當告魯夫喺 1985 年接手成為阿積士領隊嘅時候，佢選擇文素 (Stanley Menzo) 做正選門將都係因為類似嘅原因，因為告魯夫想佢可以幫手由後場開始組織攻勢。而 Frans Hoek 加盟無耐就發現到告魯夫對守門員有呢方面嘅要求。
「我去搵告魯夫傾計，佢同我講班守門員好鐘意我嘅訓練，但我同返佢講，我唔覺得自己做得好好。告魯夫問返我點解，我話當我睇返真實嘅比賽，文素根本唔知幾時應該出迎幾時應該褪後，我根本無畀足夠嘅機會佢訓練呢樣嘢。」
「我無安排一啲訓練要佢嘗試保護自己同防線中間嘅空位，又點可以期望佢落到比賽都識得做，而唯一比佢練習嘅機會就係直正嘅比賽？我地點先可以再做好啲？」
「我同告魯夫講，我需要幾個場區球員幫手。點知佢同我講嚟緊嘅星期四，佢會交曬所有球員畀我，我心諗『大_鑊』，因為如果我安排得唔好，我應該以後都唔使再做教練。我直頭驚到成個星期都瞓唔到覺。」
「我知道我一定要令到呢課訓練夠像真之餘，又要夠好玩，如果唔係實悶死班球員。我計劃好曬，用盡我嘅能力去解釋畀班球員聽。『比賽入面發生緊呢啲事，我地遇到呢啲問題，然後我地可以點樣改善』，我盡量令到前鋒、後衛同埋守門員都覺得今課訓練係過癮嘅。」
「當時講緊我只係喺阿積士教咗四個星期。」
第二章完，下回待續。
－－－－
資訊浩瀚；東張西望。
竭盡所能；深入求真。
企高一格；全新體法。
