相信大部分嘅球迷，都只會集中留意愛隊嘅球員或者主教練，較少留意其他嘅職員，但對現今世代嘅守門員嚟講，守門員教練嘅重要性可以話係舉足輕重。
Sky Sports 記者 Adam Bate 早前就做為咗 Frans Hoek 呢位被稱為「守門員教父」嘅前阿積士、巴塞隆拿、拜仁慕尼黑、曼聯以及現任荷蘭國家隊守門員教練嘅人物專題。襯住世界盃即將來臨，花咗少少時間翻譯咗呢篇專題，等大家可以喺世界盃前對守門員以及守門員教練有更深嘅認識。
睇完呢篇專題真心大開眼界，特別對做緊教練嘅我絕對係發人深省。我相信大家睇完呢篇專題之後，以後會對守門員教練呢個位置完全改觀。由於篇幅有限，所以將會將內容節錄並分為五章分開五日推出，希望大家可以更加容易欣賞當中嘅內容。
五章主題分別如下：
第一章「守門員教父的由來」
第二章「告魯夫的賞識」
第三章「回傳唔畀用手？輕鬆」
第四章「迪基亞的質疑」
第五章「薩爾瓦多奇蹟」
譯文來源：Sky Sports
（編按：本篇譯文轉載自「守門員日常-Goalie Daily」Facebook專頁）
－－－－
第一章「守門員教父的由來」
Frans Hoek 絕對係一位守門員界嘅傳奇人物。呢位前阿積士、巴塞隆拿、拜仁慕尼黑以及曼聯嘅守門員教練，一直都係告魯夫 (Johan Cruyff) 以及雲高爾 (Louis van Gaal) 非常信任嘅左右手。
你可能最熟悉 Frans Hoek 嘅事件，就係 2014 年世界盃八強賽事入面向雲高爾建議換入告爾 (Tim Krul) 去為荷蘭國家隊守十二碼。
Frans Hoek 可以話係發掘守門員另一面嘅先驅者，佢係 22 歲嘅時候已經出過一篇同守門員有關嘅論文。當時佢仲踢緊荷甲球隊禾寧丹（FC Volendam），就係呢個時候荷蘭名宿告魯夫正式開始接觸佢，聽下佢對守門員呢個位置嘅一啲獨特見解。從此之後，告魯夫同 Frans Hoek 呢位水平思考者就塑造咗守門員呢個位置嘅未來發展。
喺呢篇訪問入面，Frans Hoek 會解釋清楚自己一路以嚟嘅心路歷程。佢會講到當年教曼聯嘅時候遇到嘅阻力，同時點解當時呢件事並無影響到佢。
Frans Hoek 仍然係一位勇於嘗試新概念嘅人，就算 FIFA 話要推一條新例唔畀守門員用手，佢都一定會堅持到底唔會畀呢件事發生。
以下就係 Frans Hoek 嘅傑出故事。
－－－－
Frans Hoek 細細個並唔係踢波先，而係學柔道先。佢由四歲開始已經學打功夫，而柔道令到 Frans Hoek 喺做守門員方面與眾不同。
「正正就係因為我識得柔道，所以我乜都唔怕。我可以係條街到跌嚟趺去，飛嚟飛去都唔會整親，因為我識得點樣落地唔會受傷。對我嚟講，守龍同柔道非常相似。」
未夠 14 歲 Frans Hoek 已經係一隊成人足球隊入面嘅守門。佢話當時自己連條橫楣都掂唔到，但因為佢與眾不同嘅守龍方式令到球隊信任佢，將守門員呢個位置喺一隊守門員唔得閒出席比賽嘅時候交畀佢。
「我嘅表現點解咁令人驚嘆就係因為柔道，我完全唔驚要飛撲同埋面對單刀。而呢件事好似好引人注目之餘啲人都好欣賞我。」
由佢當時決定要選擇以「守門員」作為佢份論文嘅題材開始，佢嘅生命從此一百八十度改變，不過佢同時發現到一個問題：「我本身諗住守開龍所以寫返守門員嘅論文好合理。但當我要做資料搜集嘅時候，我發覺根本完全無同守門員相關嘅資料可以參考，真係大鑊。」
「我唯有自己做研究，嗰陣又未有得上網，唯有搵報紙睇下啲訪問，問下報館拎啲相片，收集下唔同守門員嘅意見，教練講過嘅嘢，當時就係咁樣開始。」
當佢完成咗呢份論文之後，佢正式發佈咗史上第一份同守門員有關嘅研究報告。
「當時呢份報告非常獨特，全份論文都係我一手一腳砌出嚟。我純粹嘗試用自己嘅諗法去解釋守門員呢個位置。而當時所有人都覺得呢份嘢正，有好多教練都借嚟睇，仲有唔少人問我相關嘅意見，但唔好忘記，我當時只有22歲。嗰陣我唔係一個守門員教練，只係一位球員，同埋嗰陣根本未有守門員教練呢個位置，練波都只會搵一個助教去對住個守門員射下波就算。」
第一章完，下回待續…
資訊浩瀚；東張西望。
竭盡所能；深入求真。
企高一格；全新體法。