英超南北明星賽？「條友真係唔識架喎」｜李聲揚

All Star？即係麥巴比同夏蘭特猜垃圾？Financial Times都有寫。
「條友真係唔識架喎」。但，真係咁簡單？不如問下自己，點解會睇NBA明星賽？睇超級球星拍檔，C朗同美斯同隊，幾咁過癮（應該唔係）。又或者，睇3分賽，「睇美斯射九宮格，好過癮」「睇尼馬扭插花扭雪糕筒，好過癮」（明顯唔係）。又或者，「搞咗自然有人睇」？最初啲友都話年年歐聯都係嗰幾隊，好悶。

TLDR：球員球會敵對就小事，有錢齊齊搵。賽期亦唔係克服唔到。真正煩嘅係，美式四大聯賽，大聯盟，salary cap，cartel利益集團，球員集體議價，仲要係一個國家玩晒，亦都唔存在無限錢嘅中東佬。歐洲球會就Losers game，鬥燒錢，肥晒球員，完全唔同生態。仲有最難搞，足球同籃球本質好唔同，觀眾想睇嘅似乎係「競爭性」，唔係「技巧」。另外，下篇文講，最後都會係歐超聯之類，即係NBA化，可能十幾廿年啦，但大勢所趨。不過明星賽真係窄啲。

＝＝＝
1. 小勞蘇突破盲腸話頭：扯，「英超咪已經係All Star，國家隊，世界盃歐洲國家盃歐國聯先係常規賽」
2. 會寫兩篇文，第一篇先講「英超明星賽」，第二篇講「歐洲足球美國化」。講明先，足球我都仲可以話「有睇」，但NBA我N年冇睇，其他三大更加從來唔睇，大把人熟過我，但不必執著於細節。
＝＝＝＝＝＝＝
3. 車路士新班主（其實成個財團）位老美，風評麻麻。季初狂買人，被人串佢以為打緊機。另外又當咗沙拿同迪布尼係車仔青訓（係喎，你啲網友都熟過佢，但做乜唔係你做班主？）。然後忽然炒咗杜曹，坊間亦普遍唔同意。不過最精彩都係最新佢提出，「做乜英超冇All Star明星賽」「做乜唔整南部對北部」。
4. 教練方面，高普同哥迪奧拿都簡單回應，「好呀，搵到時間話我知」。高普好似仲問記者，「佢真係咁講？」。明顯就暗串「條友真係唔識架喎」。不過你見眾球會冇乜出聲，睇定啲。
5. 至於球迷，似乎一面倒恥笑。除咗講「賽期仲唔夠密？想玩死人？」外，亦好多話呢位美國佬真係唔識，「當NBA咩」。係喎，佢就係當NBA。
6. 因為某啲原因，足球係相當守舊嘅運動，目測但凡有新嘢，評論都係反對多。好多人話明星賽「完全唔work」，但我會想深入啲全面啲睇。最初講VAR，都係反對聲音多，覺得阻住賽事節奏，而家咪又係咁行（而我本人仲係好唔習慣）。我都覺得明星賽短期內唔會work，但大勢係會向嗰邊發展。下篇會講，會慢慢美國化。
7. 坊間講唔work嘅原因，有啲未必真。有啲係因為美國歐洲國情不同文化不同，但文化要變唔難。有啲因為賽事架構唔同（大聯盟，十分重要），亦有機會變。但我亦睇到有啲根本上嘅原因，足球就真係唔同籃球，就難啲搞。
＝＝
8. 大家熟過我，但快手講，NBA All Star原本主菜就東岸對西岸明星表演友誼波，打後改變唔少，成為All Star Weekend，有入樽賽，3分賽，新人賽，名人賽（非籃球員嚟打籃球），G League（即係英冠嚟踢？），障礙賽咁（我諗起打FIFA嘅tutorial），當然仲有高潮嘅明星賽，而家變咗C朗隊對美斯隊咁，我諗起TVB台慶。
9. 除此以外，仲有埋唱歌跳舞表演咁，嘉年華。車仔班主話，喂，好搵錢架，又帶動當地經濟。背後當然亦因為美國嘅名人文化。
10. 照抄得唔得？似乎都係唔得。但點解唔得？
11. 首先講兩個我覺得唔太強嘅理由。第一係rivalry．有人質疑成班敵對球會嘅球員，點一齊聯隊？我就覺得完全唔成問題。好聽就球員專業，難聽就有錢齊齊搵。咁國家隊都係咁一齊架啦，皇馬巴塞掟晒豬頭都係咁合作。
12. 我亦都懷疑，新一代足球迷，係冇咁講呢啲嘢的。商業化，全球化嘛，脫離晒社區，仲邊有咁多意識形態，邊撚有「代表工人vs代表有錢人」？個撚個落場嘅都富豪，娛樂班窮撚。
13. 況且，NBA明星賽，入選啲友額外有錢收，幾和味。表現出色（包括啲3分賽之類），新人可以成名打大會，唔係頂級球星亦有機會出名，商業利益大把。錢從何來？咪大聯盟，呢點十分重要，係好多嘢嘅核心原因。
14. 扯開講，可能我錯，但我觀乎NBA，rivalry意識同歐洲足球爭好遠（係細個睇熱火同紐約人成日開拖咯，鬼見愁莫寧年代）。背後亦可能因為大聯盟，鐵打的衙門流水的官，同歐洲球會啲恩恩怨怨兩回事。
15. 我冇統計，但目測NBA啲轉會，多過足球好多？我成日都搞唔清啲友係打邊隊，當然可能只係我唔熟，睇下有冇人有數字。但我相信因為啲球員走嚟走去，更加少rivalry．今日敵人聽日隊友，今日你捧呢三巨頭，下年一齊去咗隔離隊，咁你點算？
＝＝＝
16. 第二樣係賽期，NBA打明星賽時，常規賽就休息，但歐洲球會而家已經不停踢。呢個大家都知。但有冇得解決？真係塞一場明星賽都咁難？未必。有錢鬼推磨，再唔係遲早就飛甩啲細球會，歐超聯2.0之類（時間問題），歐聯或歐國盃世界盃都飛起。甚至係英超變NBA，「歐聯咪Euro Basket」，當然唔會係一朝一夕。
17. 你見大球會或多或少都想咁，雖然不停講咩「英超場場好激烈」，但大會都係想甩低啲細球會，唔好踢咁多利物浦對般尼茅夫或拜仁對波琴，咁咪慳返時間。當然呢啲涉及嘅利益有排搞。而熟歷史都知，最初英超成立，亦因為啲富貴球會，唔想同細球會分餅。
＝＝＝＝＝
18. 真正核心問題，亦有人提過，就真係架構唔同。美式四大運動，全部大聯盟，球員只係同聯盟簽。富豪可以做班主，但本質係cartel利益集團，齊齊salary cap，唔要軍備競賽，齊齊有錢搵。同歐洲球會鬥燒錢，人人冇錢賺，係兩回事（話時話，NBA冇天價「轉會費」呢回事吧？）
19. 亦因為球員同聯盟集體談判，所以先有頭先講嘅，明星賽有錢收之類嘅東西。足球嘅，大家各自為政啦，睬你有味，傷咗點算？
＝＝＝＝＝＝
20. 但仲有一個少人講，而我覺得好關鍵嘅問題：運動性質完全唔同。可能我錯，但即管提出下。
21. 竊以為，足球對觀眾嘅吸引力，嚟自「競爭性」。聽落阿媽係女人，照計所有隊際活動都係。但我指嘅係，足球觀眾更重視「競爭性」，多過「可觀性」或「技術」。或者話個「可觀性」就嚟自「競爭性」。講咁玄，下面畀例子你——
22. 問一問自己，NBA明星賽，有乜好睇？我自己興趣麻麻，但問朋友，不外乎都係「見到啲巨星一齊合作表演」（明星賽例牌不太設防），睇精彩配合。又或者睇3分賽入樽賽啲神乎奇技，各種創意。
23. 但，去到足球，係咪咁？好似唔係喎！睇巨星合作？你偶然睇慈善賽，紀念賽都會見到。美斯妙傳C朗然後搏到罰球，迪布尼斬波夏蘭特伏兵遠柱頂入（你以前睇皇馬銀河艦隊都差不多係咁）。
24. 但好好睇咩？似乎唔係咁好睇。最多你花邊新聞睇下，上YouTube望下。但你唔會捱夜去睇，更加唔會睇到好緊張。因為你知道，太公波之嘛，紐亞同你博命飛身去救咩
25. 另外我亦都懷疑（可能錯），足球係更加講究「配合」同「整體平衡」。即係又係當打機咁，假想實驗，曼城（是但）vs全世界，我畀你全世界任揀11個非曼城球員出嚟，即日成軍冇夾過，未必踢得贏呢隊曼城。但我估其他運動就未必係咁，NBA 嘅All Star Team，應該真打都係好屈機嘅。如果無薪酬上限任你砌一隊，應該玩晒。「即係夢幻隊」（不過都輸波，所以可能我錯）。所以足球唔啦更嘅人放埋一隊，未必好睇。
＝＝＝
26. 再多個例子。你睇利物浦大炒般尼茅夫，或者拜仁大炒波琴。除咗利物浦或拜仁迷外，有邊個睇得過癮？冇乜，甚至兩隊球迷都唔多過癮。睇一場OK，睇幾場就悶。那怕呢啲波，你見到啲前鋒表演腳決，百步穿揚，但都係悶。
27. 相反，你睇利物浦對拜仁，可能兩邊都封到大家發揮唔到，最後只係一個犯錯，甚至一個門前混戰波子機入球定勝負，但好多人睇得好緊張。我用呢啲例子，去證明觀眾真係睇「緊張」「競爭」，多過睇「技術」。呢個當然同足球本質係low scoring game有關。一兩球就定生死。
28. 足球嘅高潮，相當奇怪，往往係非足球迷要啲時間先理解到。「像極了人生」「亦都好似溝女」。入波固然過癮，但入唔到波嗰下更過癮！個高潮就係嚟自爭啲入到但入唔到！下下入就唔過癮。亦即係「妻不如妾妾不如偷偷不如偷不到」。成場波0-0固然會令人失望，但例如場波2-1都好，啲觀眾可以有十次八次高潮。而你NBA 150-140，唔會有幾百次高潮嘛。又或者你真係幾百次高潮，但係細小而密集。足球就一場整兩下勁嘢畀你。本質唔同的。
＝＝＝
29. 明星賽，睇佐敦同馬龍同隊（我知唔同岸！）過癮，正如睇夢幻隊過癮。睇足球，太公波C朗拍美斯，唔過癮的，除非真係同一間會做隊友打真軍！
30. 而All Start Weekend其他嘢，搬去足球，問題更大。你睇NBA入樽賽3分賽，OK好睇的。但換做足球呢？聽落都無聊。點玩？睇C朗叉起條腰然後射上看台指定一格？睇美斯順住次序射九宮格？睇中村俊輔射波入巴士？其實係幾悶的。你睇一次YouTube就得。你試下成晚睇廿條友射罰球比賽？

31. 同樣地，係咪放堆雪糕或者假人（都係諗起打機）睇洛賓表演洛賓的軌跡x10？睇丹尼臣插花大賽？睇李蔡利臣表演的波？定睇下幾多人可以禁區外射入紐亞（成日都有）？唔好玩的。
32. 定係打one on one？睇下恩沙基楔越位楔得快，定尼斯達扯佢件衫扯得快？（出賣年紀了）。唔好玩的。而MLS以前就真係唔射十二碼，玩one on one單挑龍門，真係美式文化，雖然我覺得呢個都算過癮
33. 我認為呢個真係個運動嘅本質不同，冇得搞，除非你將成個運動規則大變。又或者我嘅理解錯？包裝得好睇射罰球都好好睇？歡迎討論。
＝＝＝
34. 仲有啲枝節嘢，就唔講咁詳細。例如你睇「名人賽」之類，背後係美國嘅celebrity culture。英國都OK有，但冇咁誇張。歐洲就唔多興呢味。舒密加以前都耐唔耐落場踢（忽然有啲唏噓），Nowitzki都落場踢，但同NBA All Star Weekend實在兩回事（而其實我唔知非籃球員名人打籃球到底有冇人睇？好似近年先有呢味嘢）
35. 老美心目中，當然係嘉年華，亦為當地旅遊帶嚟唔少收益。但在英國歐洲，又係咪同一回事？你美國幾億人，當然支持得起。但在英國搞又如何？我香港飛過去睇美斯同C朗踢太公波？
36. 英超嘅主要收入，係電視廣播，而唔係入場嘅門票或買大蝦三文治。海外轉播費用，亦超過咗本地，將來只會越拉越遠。我相信NBA嘅生態，又係完全唔同。
＝＝＝＝＝＝＝＝
37. 講住咁多，但sum up：球員球會敵對呢啲小事，有錢齊齊搵。賽期我亦唔認為克服唔到。真正煩嘅係，美式四大聯賽，大聯盟，salary cap，cartel，球員集體議價，仲要係一個國家玩晒，亦都唔存在咩中東佬班主之類。歐洲球會就Losers game，鬥燒錢，肥晒球員，完全唔同。仲有最後嘅，當然係足球同籃球本身嘅不同。
38. 賽期敵對或文化呢啲，要搞好快搞到。足球籃球本質嘅不同，就除非你翻天覆地咁改革，但都幾難。不過「大聯盟」blah blah blah，我估大家唔使太耐（十幾廿年？）就會見到。幾明顯係走向「美國化」的。Like it or not，大勢係咁行。「除非解放軍打殘美國」，下篇解。

君子馬蘭頭 - Ivan Li 李聲揚