在21/22年球季，拿高士文（Julian Nagelsmann）離隊轉投拜仁慕尼黑後，RB萊比錫聘請薩爾斯堡紅牛主教練馬殊（Jesse Marsch）擔任主帥，而今年夏天轉會窗，RB萊比錫亦都引入多名球員補充實力。換帥再加上多名引援，令外界對RB萊比錫成績有一定期望，但事與願違，直至12月5日，RB萊比錫係主帥馬殊帶領下，20場比賽只取得7勝4和9負，歐聯小組賽未能晉級，要轉戰歐霸盃，所以球會決定季中解雇主帥馬殊，並改由前莫斯科斯巴達主帥泰迪斯高（Domenico Tedesco）執教。
RB萊比錫半季成績不似預期，馬殊轉眼間亦轉往列斯聯挑戰自己。回顧半季，佢同萊比錫為何擦唔出火花？
1. 轉會
馬殊喺萊比錫執教失敗，某程度上同萊比錫嘅轉會決策有關。
上季季初RB萊比錫有3名主力球員離隊，分別係：烏柏美簡奴、高拿迪同沙比薩。高拿迪同烏柏美簡奴因為本身合約中有買斷條款，所以係利物浦同拜仁慕尼黑啟動買斷條款下，RB萊比錫必須出售依兩名球員。而沙比薩就因為合約將近完結，沙比薩又拒絕續約，所以RB萊比錫被迫出售沙比薩。
補充兵源方面，買斷兩名外借球員安祖連奴同軒歷治斯之外，RB萊比錫先購入加維迪奧同施馬勤，希望係烏柏美簡奴同高拿迪離隊後，補充中堅位置兵源。之後，再以€23m轉會費（總轉會費€35m）簽入法蘭克福前鋒安祖施華，希望提升球隊攻擊力。最後，RB萊比錫再由巴塞隆拿同阿積士簽入兩名年輕球員摩列巴同博比。
如果只留意轉會買賣，RB萊比錫貌似成功填補空缺，但事實並不如此。高拿迪同烏柏美簡奴屬於擁有推進、用球同上搶能力嘅中堅，但季初轉會窗所簽入嘅球員中，比較同烏柏美簡奴或者高拿迪條件相似嘅球員就只有施馬勤，而施馬勤同烏柏美簡奴弱點亦都相似，兩位中堅係狀態不足時候，會經常出現「標失波」問題，上半季有幾場比賽，施馬勤多次「標失波」，間接或直接令對手取得攻門，甚至入波，而依點亦都係今季球隊後防線表現不穩其中一個原因。至於基維迪奧，貌似都係填補兩位正選中堅離隊後嘅空缺，但筆者反而覺得基華迪奧嘅條件同隊中另一名後防球員夏斯頓堡更為相似，而夏斯頓堡上年夏天非常接近離隊，有傳加盟多蒙特，但最後因為傷患等問題而未能成事，所以更認為基華迪奧本來就係頂替夏斯頓堡，亦即代表係烏柏美簡奴同高拿迪離隊後，RB萊比錫只係成功購入施馬勤去頂替兩個中堅空缺。不過，RB萊比錫係季初轉會窗有嘗試簽入多一名中堅，據德國方面消息指，目標球員係禾夫斯堡中堅拿確斯（Maxence Lacroix），而拿確斯的確擁有推進、用球同上搶能力，但最後因為RB萊比錫出價太低，交易最後告吹。
中場方面，沙比薩離隊後，RB萊比錫由巴塞隆拿簽入摩列巴，但結果摩列巴無論係馬殊手下，抑或係泰迪斯高手下都缺乏出場時間，結果而言，摩列巴係一單失敗收購。不過，筆者一直覺得RB萊比錫係需要出售沙比薩，而出售沙比薩之後並唔需要補回一名中場球員，一來因為沙比薩同RB萊比錫嘅合約接近完結，二來RB萊比錫係中場有充足兵源，出售沙比薩並唔會對中場有好大影響，所以就算摩列巴係失敗收購，對球隊陣容深度都唔會有太大影響。
前線方面，添姆雲拿（Timo Werner，編按：如今已回巢）同舒希克（Patrik Schick）離隊後，球隊一直缺乏埋門把握力，上季簽入梳洛夫（Alexander Sørloth），結果不單只解決唔到把握力不足問題，甚至梳洛夫融入唔到球隊迫搶體系，最後今季梳洛夫要外借到皇家蘇斯達。有見及此，RB萊比錫夏天轉會窗破例開出€4m一年高薪由法蘭克福簽入葡萄牙前鋒安祖施華，可能有人質疑RB萊比錫為安祖施華開出高薪，但筆者認為雖然€4m年薪係偏高，但現今足球市場並唔多擁有一定把握力嘅前鋒，再加上RB萊比錫把握力不足係急切問題，開高薪簽入安祖施華係合理決定。兩季前，RB萊比錫因為唔希望支付舒希克外借合約中€26m買斷條款，最後選擇比舒希克係完結外借合約後離隊，結果之後RB萊比錫一直困擾係把握力不足問題，相信依次經驗令RB萊比錫願意係2021年夏天開出高薪購入安祖施華。另外，RB萊比錫亦都簽入阿積士年輕前鋒博比，而博比同摩列巴情況一樣，加盟後出場時間不足，可以認定為今季另一單RB萊比錫失敗收購。
如果要為RB萊比錫上季夏天轉會操作評分，筆者認為只得65分，原因首先係球會係兩名正選中堅離隊後，只係成功簽入一名同類型中堅，而係中前場，RB萊比錫簽入兩名年輕球員博比同摩列巴，但結果不受重用，雖然筆者覺得摩列巴失敗唔影響球隊陣容深度，但畢竟摩列巴轉會費要€16m，如果依筆轉會費放係購入另一位新中堅上，會更為適合。五位新收購球員，有兩位肯定係失敗收購，另外三位算合理收購，但仍然未見到出色表現，買人方面可以用「不濟」去形容。
賣人方面，只係以轉會費€16m將沙比薩售予拜仁，如此低價在不能接受，就算蘭歷克執掌RB萊比錫時期一樣經常賣人，但蘭歷克絕對唔會以低價轉售球員。另外，RB萊比錫一早準備簽入基維迪奧去頂替夏斯頓堡，但球會遲遲都未賣走夏斯頓堡，最後不但未能賣走夏斯頓堡，夏斯頓堡因傷長期無法上陣，結果未能離隊，亦影響到會方重整軍容。夏斯頓堡上陣成疑，徒使中堅少一名可用人選，所以萊比錫嘅賣人操作有欠理想。
時隔一季，萊比錫迎來添姆雲拿回巢，加上購入左閘拉姆（David Raum）、中場舒拉格（Xaver Schlager），夏斯頓堡喺今年6月同會方續約至2024年。賣人方面，亞當斯、博比、穆基利均已離隊，但中堅位置未見補強，僅只成功挽留基華迪奧（Josko Gvardiol）。同馬殊執教時相比，萊比錫多個位置有所提升，但中堅柯班能否改善表現，無疑影響球隊戰力上限。
2. 主帥
上季拜仁慕尼黑主帥費歷克（Hansi Flick）決定離隊，驅使拜仁慕尼黑係季尾邀請RB萊比錫主帥拿高士文執教。拜仁慕尼黑同RB萊比錫經過一輪談判後，雙方同意拜仁慕尼黑以€25m轉會費由RB萊比錫簽入拿高士文。拿高士文離隊後，RB萊比錫決定聘請薩爾斯堡紅牛主帥馬殊，接手執教球隊。
馬殊執教RB萊比錫半年，20場比賽只取得7勝4和9負，歐聯分組賽以小組第三名完成，轉戰歐霸盃。馬殊執教成績不佳，當然RB萊比錫歐聯身處「死亡之組」，新兵未適應新球隊都可以係失敗因素，但馬殊新官上任，一開始就將之前拿高士文偏向保持控球，三中堅迫搶戰術改為偏縱向迫搶戰術，令球員無法適應新戰術。相反，前主帥拿高士文轉投拜仁慕尼黑後，並沒有立即將三後衛陣式套用係拜仁慕尼黑，繼續保留拜仁慕尼黑四後衛陣式，而拿高士文暫時保留四後衛陣式之餘，再慢慢將自己戰術理念慢慢滲入球隊，馬殊係依方面同拿高士文相比，相形見絀。馬殊開季使用四後衛陣式，球隊無論迫搶上，抑或防守上，都未夠緊密，令球隊係迫搶戰術執行上出現問題，後防亦經常出現空位（想詳細了解馬殊將四後衛戰術套用到RB萊比錫陣容上所出現嘅問題，可以睇體波台主持Matthew 係足球戰術分析網站Totalfootball Analysis上所撰寫嘅文章：
totalfootballanalysis.com/team-analysis/bundesliga-2021-22-rb-leipzig-pressing-jesse-marsch-scout-report-tactical-analysis-tactics
經過幾場敗仗後，馬殊改回使用三後衛陣式，球隊不夠緊密問題有輕微改善，但球隊仍然使用非常縱向嘅戰術，再加上球員狀態不佳，最後成績亦都打回原形。
根據德國《踢球者》報導，有幾位隊內資深球員向新帥泰迪斯高反映意見，表示球員並唔適應馬殊四後衛防守反擊戰術，並希望球隊重返拿高士文時代所使用嘅三後衛偏向控球戰術。球隊戰術短時間內有頗大改變，球員無法適應，令球員感到不滿，主帥馬殊責無旁貸，據報導，馬殊離開RB萊比錫之前，馬殊已經向球會CEO文斯拉夫（Oliver Mintzlaff）表示覺得自己不再適合執教RB萊比錫，結果馬殊執教RB萊比錫不足一季就要下馬。
馬殊離開RB萊比錫後，前莫斯科火車頭主帥泰迪斯高接任RB萊比錫主教練一職。泰迪斯高曾經執教過當時仍然係德甲球會嘅史浩克04，並係第一季帶領史浩克04取得德甲第二名，取得非常優異成績。史浩克04時期，外界認為泰迪斯高戰術偏向低位同防守，而依點令筆者一開始懷疑RB萊比錫聘請泰迪斯高依個決定，但經過泰迪斯高帶領RB萊比錫出戰三場德甲賽事，再加上睇過泰迪斯高執教莫斯科斯巴達嘅戰術分析文章（文章刊於戰術分析網站Total Football Analysis，文章連結：https://totalfootballanalysis.com/article/spartak-moscow-domenico-tedesco-tactical-analysis-tactics ），知道泰迪斯高並唔係崇尚打低位防守，係高位迫搶方面，佢都可以做得非常好。
（圖一. 截圖自德甲官方精華片段）
泰迪斯高執教RB萊比錫頭三場賽事，可以見到泰迪斯高繼續保持「紅牛體系」高位迫搶打法。另外，RB萊比錫再次使用三後衛戰術，防守時轉為五後衛陣型（圖一），盡量令球場中路防守保持緊密，依點係馬殊使用四後衛陣式時做唔到。
（圖二. 截圖自德甲官方精華片段）
（圖三. 截圖自德甲官方戰術分析片段）
有報導指，部分球隊資深球員向泰迪斯高表示希望球隊重新使用類似拿高士文執教時期嘅戰術，而泰迪斯高的確一上任就使用三後衛陣式，但筆者認為同拿高士文係RB萊比錫所使用嘅戰術有分別。史浩克04時期去到RB萊比錫時期，泰迪斯高要求兩閘為球隊帶來闊度。進攻時候，安祖連奴同軒歷治斯可以壓到非常高位，而依兩位翼衛球員亦都要盡量走去邊路，拉開闊度（圖二）。相反拿高士文係RB萊比錫時期戰術係進攻時盡量收窄隊型，盡量要球員（例如：安祖連奴）走入禁區，增加入球點（圖三）。所以泰迪斯高同拿高士文係戰術方面有一定差別。（關於泰迪斯高係RB萊比錫嘅詳細戰術分析，可以睇體波台主持Matthew 另一篇係Totalfootball Analysis所撰寫嘅文章：https://totalfootballanalysis.com/team-analysis/bundesliga-2021-22-rb-leipzig-pressing-jesse-marsch-scout-report-tactical-analysis-tactics ）
3. 球員表現
（圖一. 數據來源：FBREF）
泰迪斯高接受德國《踢球者》訪問時表示，覺得萊比錫太多球員未達到100%狀態，而依點佢並唔係為前任領隊說項或者批評前任領隊。以上半季表現，RB萊比錫大部分球員嘅表現都並唔係十分出色。
門將方面，古拿治（Péter Gulácsi）上季出現幾次失誤，狀態有稍微回落，但以佢嘅用波能力同防守覆蓋面（圖一），對球隊仍然有好大作用。
中堅方面，烏柏美簡奴同高拿迪係2021年夏天轉會窗離隊，球隊簽入基華迪奧同施馬勤，填補中堅空缺。基華迪奧正如轉會部分所說，認為佢更似頂替夏斯頓堡，多於頂替烏柏美簡奴。基華迪奧係馬殊四後衛陣式下，經常暴露其防守弱點，但球隊轉由泰迪斯高執教，轉踢三後衛陣式後，基華迪奧係左中堅位置上有不俗表現。不但係防守上有改善，係進攻上亦有出色表現，根據Twitter帳戶@Odriozolite提供嘅數據，基華迪奧上季暫時係後防左路位置交出平均0.501次對敵方有威脅嘅傳送，依個數據係非常出色，亦都顯示佢作為RB萊比錫後場發起點嘅作用。
（圖二. 數據來源：FBREF）
施馬勤擁有一定上搶同推進能力（圖二），作為頂替烏柏美簡奴或者高拿迪嘅人選係非常合適。不過，施馬勤亦都同烏柏美簡奴一樣會出現「標失波」失誤，而依個問題係因為烏柏美簡奴、高拿迪或者施馬勤都係屬於高位防守戰術中負責上搶嘅球員，一旦出現失誤，對手好大機會面對單刀情況，因此佢地作為上搶嘅角色，容錯空間並不大。後防線「老大哥」兼副隊長柯班（Willi Orban）今季表現回落，間接令整條後防線不穩。佢身邊兩位中堅施馬勤同基華迪奧都係新加盟，作為隊中比較有經驗嘅中堅，柯班更要負起帶領身旁兩位中堅，甚至帶領整隊球隊嘅責任，所以柯班嘅狀態對球隊有一定影響。
後衞方面，係馬殊四後衞體系下，原本係拿高士文時期擔任翼衞嘅球員都顯得唔適應，例如要穆基利（Nordi Mukiele）擔任需要一定防守工作嘅右閘，甚至中堅位置時，穆基利係防守上嘅弱點會被放大。泰迪斯高接手後，球隊重新使用三後衞陣式，將翼衞球員重新放係最佳位置，表現有明顯改善。
中場中方面，上季傷癒復出嘅拉馬（Konrad Laimer）慢慢重拾狀態，奇雲甘保（Kevin Kampl）同凱特拿（Amadou Haidara）嘅表現不過不失，美國年輕中場中泰拿阿當斯（Tyler Adams）有輕微狀態下跌，但能夠擔任不同位置嘅阿當斯，只要適應到泰迪斯高嘅戰術，對球隊而言仍然十分重要。
攻擊中場同前鋒方面，丹尼奧姆（Dani Olmo）同科斯堡（Emil Forsberg）暫時表現平平，蘇保斯禮（Dominik Szoboszlai）今季頭幾場表現不俗，但之後表現平平，要去到泰迪斯高接手後，狀態先所回升。
（圖三. 圖表來源：Twitter帳戶@gasipo_opinions）
上半季整隊球隊最有亮點嘅球員一定係安宮古（Christopher Nkunku）。截至1月23日，安宮古為球隊交出9個入球7個助攻，係球會首席射手兼最多助攻嘅球員。根據網站FBREF嘅數據（圖三），安宮古作出最後一傳嘅次數唔算好多，但每一次作出最後傳送嘅質素都十分高（五大聯賽中xA數據位列頭四名），所以安宮古係球隊進攻方面十分重要。
（圖四. 數據來源：FBREF）
不過，安宮古並唔係完美，雖然佢係球隊首席射手，但把握力其實一般，根據網站FBREF嘅數據，安宮古Goals-xG同Non-Penalty Goals-npxG嘅數據只屬一般（圖四），而依兩項數據係反映球員把握力，所以安宮古要係把握力方面再努力。
André #Silva unter Jesse #Marsch in der #Bundesliga: 14 Einsätze, 3 Tore (9x Startelf)
… unter Domenico #Tedesco: 5 Einsätze, 5 Tore (5x Startelf)
Darüber hinaus verwandelte der Portugiese bislang jeden seiner elf Buli-Strafstöße 💯 (8x #SGE, 3x #RBL)
📸Imago pic.twitter.com/Jr2GvRWNjp
— Philipp Hinze (@philipphinze24) January 15, 2022
兩名正前鋒尤素夫保臣同安祖施華，保臣就作為輪替或者球隊需要兩名正中鋒同場時都非常有用，佢可以作為支點，佢亦可以係前場迫搶中有一定作用。而安祖施華季初剛加盟RB萊比錫時，表現一般，但球隊轉由泰迪斯高執教後，安祖施華五次出場，攻入五球（截至一月十六日），雖然有兩球係十二碼，但表現明顯有提升。
球隊的確如主帥泰迪斯高所講，有好多球員嘅狀態並未去到100%，就算係首席射手安宮古，把握力方面仍然有提升空間。不過，泰迪斯高執教後，經過轉換陣式同指導後，球員表現係有改善。添姆雲拿回巢後，同安宮古合組雙前鋒，相對於馬殊年代，可望增加球隊進攻變化、提升前場衝擊力。
4. 體育總監
高斯治（Markus Krösche）係2021年4月離任（編按：已轉往法蘭克福任職體育總監），之後RB萊比錫體育總監職位一直懸空，而剛好RB萊比錫係大約4月時候，物色緊頂替拿高士文嘅人選。最後球會CEO文斯拉夫同技術總監維華爾（Christopher Vivell）決定由當時薩爾斯堡紅牛主帥馬殊接手。不過，最後結果馬殊不足半季就要同球隊「分手」。馬殊擔任RB萊比錫主帥期間，的確有部分決定值得批評，但本身馬殊是否合適近年RB萊比錫嘅發展方向亦都成疑。
前RB萊比錫體育總監蘭歷克（Ralf Rangnick）2019年係倫敦領袖體育論壇中表示（ vimeo.com/375246645 25:38開始），當時RB萊比錫聘請拿高士文後，蘭歷克唔希望拿高士文係佢影子下執教，所以之後蘭歷克決定減少對場內決定嘅參與，甚至之後決定轉任紅牛足球集團國際足球總監，令拿高士文可以以自己戰術風格去執教。依點亦都顯示RB萊比錫由拿高士文執教後，係發展方向上有一定轉變。然而，拿高士文離隊後，球隊CEO文斯拉夫竟然係薩爾斯堡紅牛邀請同蘭歷克戰術理念非常相近嘅馬殊執教，本來蘭歷克在任期間希望球隊戰術發展方向慢慢遠離佢嘅影子，但最後文斯拉夫選擇行回頭路，決定由馬殊執教，最後馬殊因為未能同球隊融合，招至失敗。馬殊決定離隊時，向球隊表示覺得自己唔適合執教RB萊比錫，而依段說話反映CEO文斯拉夫係選擇新帥上嘅失誤。文斯拉夫對足球冇相關知識，而高斯治離隊後，文斯拉夫並冇立即填補空缺，令體育總監職位留空至今。之後，選擇係技術總監維華爾協助下，親自決定新帥人選，最後不足半季就失敗收場。就算之後聘請泰迪斯高，但都未能彌補球隊係上半季嘅失利。
馬殊嘅失敗，體育總監職位懸空，身為CEO嘅文斯拉夫責無旁貸。萊比錫雖然一直傳出接洽前慕遜加柏體育總監艾保爾（Max Eberl），但截稿之日尚未達成協議。紅牛集團足球部技術總監馬里奧高美斯（Mario Gomez）表示，球隊最重要係搵到一個有經驗，而有相關專業知識嘅人選去擔任體育總監。如果體育總監職位繼續懸空，文斯拉夫一直唔解決球隊問題，紅牛集團應該重新審視文斯拉夫是否適合繼續擔任球會CEO一職。
總結
前體育總監高斯治離開RB萊比錫後，體育總監職位懸空，因此CEO文斯拉夫親自決定由當時薩爾斯堡紅牛主帥馬殊接手執教球隊。馬殊雖然同樣崇尚高位迫搶，但蘭歷克決定由拿高士文執教球隊開始，球隊戰術方向係慢慢將蘭歷克簡單而縱向嘅高位迫搶戰術淡化，再轉變為融入傳控元素嘅高位迫搶戰術，同樣係迫搶戰術，但細節有一定改變。拿高士文離隊後，聘請同蘭歷克戰術理念非常相近嘅馬殊，對嘗試改變戰術方向嘅RB萊比錫而言，係一種倒退，而最後結果馬殊以不足半季時間就失敗收場。
為免重蹈覆轍，球隊仍要補救，第一步係必須盡快聘請體育總監，等待體育總監上任之後，再球隊擴軍方向。泰迪斯高執教後，球隊能保前四，球隊場內有明顯改善，雖然有部分細節仍然有問題，但絕對值得給予泰迪斯高時間去改善。今季不求球隊奪得任何賽事冠軍，只求能夠保持上季成績，而「爭四」對手實力強頑，「爭四」絕非易事。
資訊浩瀚；東張西望。
竭盡所能；深入求真。
企高一格；全新體法。