緣來係利迷：戴治｜Liverpudlian Ty
點解無啦啦出舊news？當然唔係無啦啦。相信大家都知道，現時需要搶分護級嘅英超球隊般尼，宣佈解僱執教該隊接近十年嘅領隊戴治。
咁戴治離開咗般尼，咁又關利物浦咩事？其實，喺度想講吓，大家喺球場上見到嘅呢位硬漢子，其實自細就係利物浦球迷。呢樣嘢，佢講過唔止一次，媒體亦都提及過唔止一次。
戴治現年50歲，喺英國諾咸頓出世。佢出身自諾定咸森林嘅青訓系統，球員時代亦曾效力過車士打菲特、屈福特、布里斯托城、盧頓（外借）、米禾爾及諾咸頓，司職中堅。但係，最令我有深刻印象嘅，係佢踢過車士打菲特。
戴治喺車士打菲特渡過咗成功嘅七年，係球隊嘅隊長。喺1997年嘅英格蘭足總盃，當時身處英甲嘅車士打菲特異軍突起，佢哋由第三圈開始，過完一關又一關，先後擊敗六隊球隊，包括貝利、史卡堡、布里斯托城、保頓、諾定咸森林（英超）及域斯咸，晉身足總盃四強。賽事喺曼聯嘅奧脫福球場進行，對手係另一隊英超球隊米杜士堡。擔任隊長嘅戴治，射入十二碼，將比數一度改寫成 2-0。最後雙方賽和 3-3，需要重賽。雖然重賽落敗 0-3，結束佢哋喺足總盃嘅神奇之旅，但係仍然足以成為英格蘭足總盃嘅經典時刻，實在令人難忘。
戴治喺2007年離開諾咸頓，結束球員生涯，退役後加盟屈福特，成為佢哋嘅U18教練。喺2009年，屈福特聘用Malky Mackay成為領隊，戴治晉升為球會嘅助教。2011年，Malky Mackay 離隊轉投卡迪夫城執教，戴治升正執教屈福特。屈福特喺戴治執教下，於英冠聯賽取得第十一名，係當時該球會近四年來最好嘅成績。其後，屈福特轉咗班主，戴治被解僱。
喺2012年9月，戴治曾短暫成為英格蘭U21國家隊教練團成員，其後於下個月接替重返般尼茅夫執教嘅艾迪賀維，成為般尼領隊，直至最近先至離開。
戴治執教般尼期間，最令人有深刻印象嘅，除咗佢嘅鐵漢形象，球隊長期限米煮限飯嘅情況下，嗰種相當硬淨同埋具競爭力嘅踢法，令到唔少對手都吃過苦頭。佢甚至曾帶領球隊踢過歐霸盃外圍賽，對般尼嚟講，相信已經係一項成就。另一方面，喺香港嘅網上社群，更加會經常引用「般尼從來不易」，嚟形容嗰種難以對付嘅程度，戴治嘅執教能力，可見一斑。
講返戴治嘅「鐵漢柔情」，佢對利物浦嘅支持，其實佢喺唔同嘅場合都有承認過，細細個就係利物浦嘅球迷。佢喺2019年3月表示：「我係一個70後，好多人都係利物浦嘅球迷。」
「我來自Kettering，我唔能夠成日去到捧場。我係一個遙遠嘅利物浦球迷，雖然係咁，我仍然係利物浦球迷。」
「喺幾季之前，我的確有見過杜格利殊爵士，呢個係一個重大嘅時刻。因為你宜家年紀漸長，同埋都係從事同一個專業，你係唔會忘記呢啲人物。」
「見到佢，我真係相當高興。當時喺普雷斯頓有場波，我第一次嚟到現場考察，杜格利殊同我講一聲「你好」。其實，我嚟呢度，實際上係想見到佢，同埋同佢傾計。」
「當你見到呢啲人物，你會有一種奇怪嘅感覺。因為當你仲係小朋友嘅時候，睇到杜格利殊（King Kenny）獻技，你會鼓起面頰。然後，你宜家遇見佢哋，佢哋同你如常地去傾關於足球嘅嘢，對於我嘅生活嚟講，仍然係頗為超乎現實，我實在覺得呢個係頗為重大嘅時刻嚟。」
「就正如你可以想像到嘅係，佢係一位了不起嘅人物。佢只係同你一樣去傾談關於足球嘅嘢，但係喺我嘅內心深處，我會諗起當時仲係一個金髮小子，喺度諗「嘩！佢係King Kenny呀！同埋喺電視機度睇佢。」
除咗King Kenny之外，戴治亦都曾經喺記者招待會度，講過佢喺 1985 年嘅事。
戴治當時除咗係一位忠實、狂熱嘅利物浦球迷，仲係一位年青小伙子。佢向記者表示，曾於1985年踏足晏菲路球場嘅草地，參與過利物浦名將Phil Neal嘅告別賽。
此外，戴治話：「我對利物浦嘅第一個回憶係喺七歲嘅時候，其後喺八、九歲嗰陣，你會開始想真正了解利物浦更多。 」
「你會開始有自己最喜歡嘅球員，以我嚟講，會係杜格利殊（King Kenny）。作為一個小朋友，佢點會唔係你最鍾意嘅球員呢？」
「仲有桑拿士，基文斯我都見過佢好多次，佢真係一位好出色嘅球員，兼且從來都唔會扮晒嘢。」
「喺 70 年代，利物浦實在相當強大。」
講返Phil Neal嘅告別賽，戴治當時只有 15 歲，並且喺諾咸頓當地嘅一支球隊中出賽，佢喺Phil Neal對陣愛華頓嘅比賽前參與其中。
戴治表示，呢啲更加似係佢對利物浦嘅記憶，佢接受Skysports訪問時亦講過，佢對利物浦嘅情有獨鍾。相當程度上，佢過往執教資源唔係咁多嘅般尼，係反映到佢有一定嘅執教能力，相信佢日後仍有機會重返英超領隊嘅行列。
