紐迷筆記：踢得轟烈，降班又何懼！｜The Outsider
最近紐卡素畀沙地基金PIF收購成功，香港唔少其他球隊既球迷，甚至媒體同球評，對呢隊東北球隊發生興趣。好多人都針對財團如同國家資金投入球會，紐卡素一夜暴發，喺一月轉會窗定必瘋狂掃貨，於是乎真心提供意見有，諷刺、奚落要買麥皮皮、美欺此起彼落。之前換帥一事，亦遭恥笑心頭高無人願意嚟降班云云。其實作為紐迷，有咩風浪未見過？反而畀人收購之後，呢啲冷嘲熱諷就真係聽得少，一時唔識回應。
最近維拉「明叔」艾邦拉荷又發表佢既獨到見解：奇勒水準一路保持係重臣，而Miggy是廢的幫唔到手。大佬，先唔討論你自己捧住個肚腩去踢波，踢嚟踢去最出名都係同一時間搞大兩個女人個肚，你喺平行時間睇波㗎？凡有睇直播既朋友，都睇到奇勒就係紐記出沖位，有球必應咁滯。相反Miggy進攻的確唔多貢獻，前場攞波應該係咁多季以來最少，但未至於佢講到咁差，特別佢同連登、麥明斯都會打到一兩腳one two吖。而佢協房勤力，跑上跑落絕無揸流灘，留佢喺陣中有利無害，點會好似佢咁講呢？佢睇波同對足球既認識，當然同好多明叔一樣：「布腦屎嗰啲波係班友仔渣之嘛！對佢太唔公平喇！」完全係護短兼撐自己友，明明就差到死，就攞數據同肥賓比，又話肥佬唔買人，蒙著眼睛說撐佢。
人哋點講一件事，實際情況又一件事，紐卡素處於近年最差既開局係事實。所以請阿烤Howe返嚟，就係嘗試改變一下球隊既氣氛。近兩季更衣室出現好微妙既和諧，有幾個球員經常表示隊內球員都撐領隊，而且有信心踢得好，不過就聽唔到年青年球員既聲音，甚至舒亞、卡夫芝士呢啲外援即頭無晒聲氣。又好奇怪既係操練時，成日發聲既球員都笑容滿面，大家都輕輕鬆鬆又一day；同時就有兩三單有球員同領隊口角，球員同球員之間有郁手既情況。而大家睇左幾日阿烤帶操，似上堂多過操練，球員個個都收晒笑容認真操嘢。有朋友直頭話，有部分球員操到面都青，好似十世無操過咁。希望之後大家可以睇到紐卡素唔係好似以前咁，得大佬有發言權、操練揸流灘，而係真正既專業同認真，更衣室唔再有所謂大佬存在。
最後希望呢個週末，可以見到新既紐卡素出場，真心踢得熱血「性感」地進攻，我就真係唔介意輸波甚至降班。呢兩季睇到隊波死下死下，仲有人會懷念嗎？何況一月轉會窗，仲有機會增兵，今季西波都唔少，比啲掙扎喇紐卡素！
