曼聯的永劫輪迴｜Peter Sam
曼聯嘅永劫輪迴去到連加利仔都識講，但究竟曼聯根本問題係邊？好似冇咩人講到，所以想寫篇文講下自己對曼聯問題嘅見解，順便總結下曼聯暫時嘅情況。
1）曼聯暫時情況
根據BBC駐曼市記者Simon Stone 、英國獨立報足球版主編Miguel Delaney等可信性較高嘅記者報導，大部分高層都係希望蘇斯克查最少留到下年夏天，而原因離不開係：高層仍然認為蘇斯克查能夠帶領球隊係未來取得成功、曼聯仍然未係歐聯出局、市場缺乏領隊或暫代領隊人選同埋唔願意向剛續約嘅蘇斯克查團隊作出解約賠償。依四個原因我都覺得合理，但最大問題亦都係Miguel Delaney係十一月七日所寫嘅文章中所提到嘅問題：曼聯高層係冇Plan B。
蘭歷克方面，德國《圖片報》記者Christian Falk表示蘭歷克仍然對曼聯感興趣。稍後時間，Miguel Delaney亦都證實依段消息，但佢亦表示蘭歷克希望曼聯要保證之後要比佢擔任體育總監。而Christian Falk之後係另一名知名記者Fabrizio Romano嘅Twitch直播中表示，雖然蘭歷克之前已經同曼聯管理層接觸過，但管理層對能否同蘭歷克一齊合作抱懷疑態度。
其他人選方面，根據多個消息，施丹係無意執教曼聯，而白禮頓主帥樸達、普捷天奴、同阿積士主帥坦克格都冇可能係季中接手曼聯，就算去到下年夏天，曼聯能唔能夠係三個領隊人選之中請到其中一個都係成疑，依個亦都係令曼聯未想炒蘇斯克查嘅原因。
干地方面，多個消息指，曼聯本身就對干地執教歷史抱懷疑，曼聯高層懷疑嘅並唔係干地嘅成績，而係考慮過佢之前執教球隊年期偏短，同埋由佢所購入嘅球員年齡偏高，依兩點同曼聯現時希望搵一個長期領隊帶領年輕球員發展嘅目標相違背，所以曼聯一直都冇決定過搵干地，最後干地亦都選擇執教熱刺。
2）曼聯問題分析
無論名宿、記者、球評抑或球迷都講過曼聯唔同嘅問題，亦都代表曼聯依隊球隊已經千瘡百孔，但根本問題究竟係咩呢？
先講蘇斯克查，有球迷會將佢同費格遜連繫埋一齊，認為蘇斯克查同費格遜一樣係偏舊式英格蘭領隊，主要負責球隊人事管理多於戰術排陣，但依樣會出現兩個問題：
一，的確蘇斯克查嘅管理球隊模式類似費格遜，但無論費格遜抑或安察洛堤，依班並沒有固定戰術理念嘅領隊，佢地就算冇固定戰術哲學，但都會有明確方向去改變自己係唔同執教時期嘅戰術，例如當費格遜面對摩連奴同雲加嚟到英超，佢會將球隊嘅踢法由英式轉向歐陸打法，係費格遜心裡面係有一套佢認為完美嘅歐陸打法，再之後搵有經驗嘅基羅斯做副手，最後先會出現07/08賽季出色嘅成績。費格遜係由想法，到理念建構，再到搵人，都係有清晰方向，但依家蘇斯克查係冇，蘇斯克查甚至係各方面都好似只做到一半，同埋曾經成功過嘅嘢之後多數都唔會持續見到，甚至被推翻。
二，雖然第一點提到費格遜嘅成功，但當費格遜面對哥迪奧拿依代更注重細節嘅教練出現，費格遜係開始比人見到佢跟唔上潮流嘅跡象，費格遜就算有清晰方向，識得搵助教同球員幫手，但費格遜係細節上嘅不足係逐漸隱藏唔到，所以就算蘇斯克查100%變成費格遜，最後結果可能都係跟唔上戰術潮流。
所以蘇斯克查一來係學習唔哂費格遜嘅嘢，二來就算變咗第二個費格遜，細節上嘅不足可能已經令佢失敗。
不過，雖然蘇斯克查本身有問題，但其實蘇斯克查都唔係問題起源，佢可能只係曼聯嘅縮影。我並唔係為蘇斯克查推卸責任，但請佢嘅格拉沙同埋支持佢嘅費格遜難道又冇問題？
費格遜係2013年退休後，曼聯一直都攞唔返個成績，依樣嘢亦都話比大家知，冇可能將所有責任推落任何一任領隊身上，曼聯嘅長期不振一定係關管理層事。
費格遜2013年退休後，曼聯聘請莫耶斯（英式）、雲高爾（Positional Play）、摩連奴（防守反擊）同現任領隊蘇斯克查（嘗試打高位迫搶），依四任領隊嘅戰術理念都係南轅北轍，亦都見唔到球會有一套一致嘅足球哲學，而球隊經常改變足球哲學，令到無論買人賣人、新舊球員適應、聘請領隊等等都出現問題，繼而出現球員唔適應，每任領隊經常要使用一班前朝遺留又唔適合自己戰術嘅球員，之後令到球會經常蝕賣球員，而仍然留低嘅球員多數就會因為不適應新戰術而表現變差，最後就出現「同化論」嘅情況。
曼聯冇方向就係根本問題，但曼聯係咪冇嘗試過搵返自己嘅方向？答案係：唔係。
費格遜退休後，曼聯第一次出現聘請足球總監嘅討論，但結果係不了了之，最後曼聯接受費格遜嘅建議由莫耶斯執教球隊。
之後去到摩連奴執教曼聯嘅尾段時期，因為摩連奴接近被炒，經歷過後費格遜時代三任領隊嘅失敗，曼聯又重新開始討論聘請足球總監依個問題。根據當時傳聞，曼聯係搵過甘波斯、蒙治、保羅米曹同蘭歷克四位知名足球總監見面，但之後曼聯並沒有作出決定，甚至之後傳出搵埋費查同李奧費迪南依兩位同球會有密切關係，但並沒有足球總監經驗嘅人選。
去到蘇斯克查擔任暫代領隊時期，因為蘇斯克查帶隊成績不俗，所以曼聯將佢轉為正式領隊，並將部分原本屬於足球總監嘅權力交係蘇斯克查身上。最後，係2021年3月，曼聯開設體育總監同技術總監職位，並內部提升梅度夫同費查擔任依兩個職位，而蘇斯克查繼續擁有開設體育總監職位前嘅權力，亦都代表蘇斯克查同梅度夫係同等，甚至蘇斯克查有時比梅度夫擁有更多決策權。
曼聯依家係有體育總監，但曼聯嘅足球總監係「有英超特色」嘅體育總監，亦即係類似利物浦米高愛華士嘅角色，佢地係同其他歐洲球隊嘅體育總監唔同，「有英超特色」嘅體育總監要同領隊對分權力，佢地係冇權力決定球隊方向同埋決定聘請或解雇領隊，甚至可以理解佢地做「領隊係場外嘅幫手」。
一定會有人問：「利物浦咁樣都成功啦，點解曼聯嘅足球總監又唔可以咁？」如之前所講，曼聯本身係冇方向，而利物浦就算有球迷認為FSG只識賺錢，並唔投入資金係轉會市場上，但FSG對利物浦嘅發展係有想法同方向，再加上擁有鮮明戰術哲學嘅高普，利物浦係唔會出現冇方向嘅問題。相反，曼聯本身就冇方向，再加上連自己戰術哲學都未搞清楚嘅蘇斯克查嘅時候，一個冇權力決定球會方向嘅體育總監，其實對曼聯嘅幫助不大。
蘭歷克經常提到3Cs 球會管理哲學。3Cs：理念（Concept）、能力（Competence）、資金（Capital），依三樣係成功管理球會嘅因素：
- 理念（Concept），一間球會一定要有自己嘅戰術哲學，亦即係成日講嘅「球會DNA」，而依樣唔單止要球員有，教練團同管理層都要有，球會上下應該要知個方向，無論一隊、預備組定青年軍都係打同一套戰術哲學，盡量保持球會有一致嘅足球哲學。
- 能力（Competence），當你揀定一個足球哲學之後，就要搵合適嘅人去實行，球員、領隊、教練等等都要配合球會嘅足球哲學去聘請，然後發揮最大作用。
- 資金（Capital），錢當然就係幫助球會去實行足球哲學，但資金只係限制成功嘅上限，並唔可以取代理念同能力，因為依三樣要同時存在先發揮到作用。
而3Cs其中兩個C：理念（Concept）同能力（Competence），就係曼聯缺少嘅嘢，曼聯就算有資金（Capital），但冇清晰方向同搵啱嘅人返嚟，最後只會一直錯落去。
所以解決方法就係請一個正常嘅體育總監，體育總監係要有權力決定球會嘅方向，係有權力決定教練球員去留，咁樣先可以令曼聯重返正軌。
不過，因為正常嘅體育總監需要極大權力，曼聯兩大勢力：格拉沙同費格遜，佢地係球會嘅權力亦都會被動搖，所以曼聯一直都未有一個擁有極大權力嘅足球總監。
費格遜剛剛退休之後其實唔太多干涉曼聯嘅管理，算干涉嘅可能只係得推薦莫耶斯比曼聯。去到蘇斯克查上任為止，費格遜可以話係冇干涉過曼聯嘅事，但去到佩雷斯宣布推行歐超聯後，費格遜開始干涉曼聯嘅管理，例如有報導指，費格遜搵曼聯名宿（如：加利仔）係媒體向格拉沙施壓，表達對曼聯加入歐超聯嘅不滿。去到今季，費格遜對曼聯嘅干涉已經不再掩飾。首先，係鏡頭面前向UFC輕量級冠軍Khabib表示C朗係一定要出場，變相向蘇斯克查給予壓力。之後，據消息指，蘇斯克查經歷大敗比利物浦後，費格遜係董事會力挺蘇斯克查，並希望球會最少給予三場時間比蘇斯克查領軍，挽回劣勢。由此可見，雖然費格遜剛退休嘅時候，並不太多參與曼聯管理事務，但經歷過歐超聯同埋蘇斯克查面臨被炒危機，費格遜係曼聯嘅影響力終於浮上水面，而依件事令部分熟悉當年畢樹比爵士如何干預曼聯管理，最後令球隊降班嘅球迷同記者擔心。
格拉沙係費格遜退休後，一直都成為曼聯球隊管理上嘅最終決策人，無論買賣球員，抑或聘請領隊，最終決定權都係佢手上。而格拉沙系統（包括曼聯副主席活華特）都係缺乏足球上嘅知識。費格遜退休後，曼聯管理層所作出嘅決定，大部分最後都係碰壁收場，例如：後費格遜時期冇一個領隊算十分成功、經常以溢價購買球員、處理球員領隊嘅續約問題不善。如果要數曼聯管理層嘅不堪，十隻手指一定數唔哂，依個亦都係格拉沙由佢入主曼聯一刻開始，就一直被曼聯球迷要求離開嘅原因。
去到依家要面對蘇斯克查執教曼聯嘅困境，費格遜同格拉沙都表現狼狽。費格遜與其曼聯弟子盲目支持蘇斯克查留低。格拉沙就唔單止一同蘇斯克查團隊續約後，曼聯就出現成績滑落，更有消息指格拉沙並沒有蘇斯克查以外嘅Plan B，令曼聯管理層依家處於極度尷尬嘅位置。
所以依家曼聯唯一解決方法就係費格遜同格拉沙都放棄大部分曼聯控制權，搵一個對足球方面有認識，又唔係同曼聯有好密切關係嘅人去管理球隊事務，亦即係正常嘅足球總監。但要曼聯兩大勢力放棄權力並非易事。
根據知名足球轉會新聞記者Fabrizio Romano同埋德國《圖片報》記者Christian Falk所講，雖然曼聯部分高層一直都對前RB萊比錫總監及教練蘭歷克感興趣，但高層亦都擔心蘭歷克要求取得球會所有權力，所以並不會視佢為首選。依個消息證明高層去到依刻都係拒絕將自己嘅權力交係其他人手中，再加上另一邊費格遜對曼聯傳統嘅執著，要兩大曼聯勢力放權比外人，可能性仍然不大。
曼聯問題千瘡百孔，大家可以批評麥圭亞同普巴嘅不濟，大家批評蘇斯克查冇戰術細節亦都冇錯，但曼聯問題不只在於球員同領隊問題，管理層亦都要負責。香港足球評述員何輝講過：「球會管理會反映係球會成績上。」而今日曼聯係場上嘅不濟，亦都反映管理層嘅不濟。評論曼聯問題嘅時候，當然可以放大係戰術細節上、心理上、球員能力上，但如果要解決問題，必須要由上而下去解決問題，冇可能將問題拆散嚟解決，因為球會管理就係一環扣一環，管理層管理不善，就會帶嚟連鎖反應令球會成績變差。
面對蘇斯克查嘅不濟，好多球迷為頂替蘇斯克查人選提出好多名帥嘅名字，但如果管理層仍然一樣，最後都只會永劫輪迴，過幾年又要求換帥。所以聘請一個擁有權力去帶領球會方向嘅足球總監先係最「治本」嘅解決方法。不過，要一個擁有足夠權力嘅足球總監前，首先都要解決格拉沙同費格遜會否放權問題，管理層願唔願意行出第一步，就係曼聯能否成功嘅關鍵。
