那個輝煌年代的祖雲達斯｜總編手記
話說早兩日受邀去時代廣場，去觀摩祖雲達斯展覽。冇左C朗嘅祖雲，仲有乜好睇？
回味90年代嘅足球回憶，都係值得嘅。
今年適逢祖雲達斯創會124週年，而且盡攬本國聯賽及各大盃賽、歐洲三大球會盃賽、歐洲超級盃同洲際盃嘅冠軍，而歐洲歷史上只有四家球會可以獲此成就（其餘三隊係阿積士、拜仁慕尼黑及曼聯）。以下呢個奬盃，就係祖雲1976/77年贏下嘅歐洲足協盃冠軍。
呢次展覽，喺9月6日至10月24日期間舉行。而且祖雲好有心，將喺都靈祖雲達斯博物館（J Museum）嘅珍貴收藏品都帶到香港，係球會史上最大型海外獎盃展覽。同場仲有唔少精品同球會產品，例如呢個有J字樣嘅祖記杯，我都買返個送畀防中維……
相對於C朗，施丹、保方、巴治奧、尼維特、迪比亞路先係球會歷史上嘅真正主角。尤其是施丹年代、納比領軍嘅祖雲達斯，簡直係聞風喪膽。
就係呢件施丹10號，象徵住祖雲達斯喺歐戰吊打曼聯、直搗阿積士嘅黃金歲月。
今次展覽，丹恩奴域、安永佳、謝德謙同梁冠聰都有嚟亮相宣傳。聰仔都表示，希望香港球會好似祖雲達斯咁搞大型展覽，先可以感受本地足球文化。
對於佢哋嚟講，足球象徵榮譽，而球會嘅歷史係應該承傳，先可以將足球發揚光大。祖雲達斯經歷高低起伏，但如果唔好好傳承球會歷史，又如何凝聚人心？
