晉級殊不易？賽前分析歐國盃A組：意大利｜FootballNerds足球攻略
意大利喺2018年世界盃嘅慘痛經歷後，特意聘請咗Roberto Mancini協助國家重建足球王朝。Mancini上任後，踢法上再冇以往咁沉悶，更著重中場嘅控制；陣式上亦由常用嘅三中堅陣式轉成4-3-3。意大利嘅成績同表現亦因此得到改善，外圍賽更以全新姿態結束，殺入決賽週。雖然外圍賽所面對嘅對手都比較弱，但絕對係個好開始。如果你以往較少睇意大利國家隊嘅比賽，筆者會建議大家一定要記得睇佢哋開波前唱國歌，佢哋係唱國歌嘅時候係相當激昂，未正式開波已經感受到佢哋嗰份熱情同代表國家嘅自豪感，喺平日較為少見嘅場面。今次對意大利嘅踢法分析會用到一項新興數據，最後會介紹一位值得留意嘅球員。
踢法
當意大利控球在腳時，大多會有耐性地喺自己半場保持控球，嘗試引對方上前逼搶，喺對方中場及防線之間同防線身後製造空位。當空位出現，中場同後衛就會發揮出色嘅傳球將個波送上前。
意大利進攻時，左右閘其中一邊會推上前（左閘為主），提供更高自由度予左翼Lorenzo Insigne走入Half-Space或其他位置去擴大進攻嘅優勢；右閘就會相對冇壓得咁前，收入中間形成三中堅陣式。右翼就會拉邊，嘗試拉開對方防線，製造空間予隊友後上插入。
失去控球權時，意大利主要會用4-5-1作為Mid-Block同Low-Block嘅企位。佢哋有清晰嘅Pressing Trigger同Pressing Trap，會主動上前施壓，但唔會壓得太前，以保持意大利以往防守時嘅整體性。另外，佢哋向前施壓嘅過程中，有時會由4-5-1轉成4-4-2，整個過程都尚算流暢。
數據比較
意大利主張保持控球，倚賴中後場球員嘅傳送能力策動攻勢，所以佢哋嘅傳波、技術同護球能力都非常重要。以下喺比較Progressive Passes同準確度嘅數據圖，意大利所有中場喺歐洲五大聯賽都係名列前茅（Stefano Sensi並不包括在內，因為今季出場時間少於1500分鐘），喺各自球隊中都擔當重要角色，係球隊組織攻勢同推進不可或缺嘅成員。另外，中堅同龍門嘅個人技術都不容忽視，要成功搶波絕非易事。如果對方逼搶時壓得太過前而出現漏洞，就好容易俾意大利有機可乘。
One to Watch
我哋唔逐一點評各個球員，隊中重要球員如Leonardo Bonucci、Insigne、Marco Verratti同Jorginho等相信唔需要再多講，所以筆者只揀咗一名球員等大家可以對佢多加留意，佢就係Manuel Locatelli。今季有睇開意甲嘅球迷相信對佢都唔會陌生，佢今季係薩斯索羅嘅表現好穩定。佢嘅傳送包括長傳及短傳都非常出色，而且有唔錯嘅身體質素，跑動多，覆蓋範圍大，能夠勝任中場多個位置。佢可以踢「六號位」，協助球隊控制節奏，組織攻勢，同時為後防提供一道可靠嘅屏障。佢亦可以踢「八號位」，為球隊提供好多無球跑動，同中前場做唔同嘅配合；防守時可以走到邊線做協防，又可以上前主動做迫搶。如果Verratti仍然受傷嘅話，Locatelli相信會係頂替佢嘅人選。
意大利陣中其實重有其他球員值得留意，例如Nicolò Barella同Alessandro Bastoni，兩位都係來自國際米蘭，係佢哋今季奪冠嘅功臣之一。Barella經過今季後，相信已吸引不少目光；而筆者相信除非意大利有中堅受傷，Bastoni今屆歐國盃唔會有太多出場機會。最後，今屆意大利喺分組賽雖然有主場之利，但同組要面對黑馬土耳其，重有兩隊善於打防守反擊嘅瑞士同威爾斯，晉級之路並非想像中容易。
Written by: Liam
資訊浩瀚；東張西望。
竭盡所能；深入求真。
企高一格；全新體法。
