利物浦又一難題：沙拿下季大部分時間缺陣？｜Liverpudlian Ty
根據 The Athletic 嘅 James Pearce，利物浦領隊高普喺下個球季或會有唔少時間失去沙拿。
首先，埃及國家隊想搵沙拿踢東京奧運足球賽事，成為佢哋三位超齡球員之一。如果東京奧運會如期舉行嘅話，呢項賽事會由 7 月 21 日開始，至 8 月 7 日。沙拿已經被埃及 U23 國家隊主教練加列比召入初選名單。利物浦係冇責任放沙拿去踢呢項賽事嘅，但係佢哋知道為國效命對沙拿嘅意義。最終決定係點，要視乎沙拿同高普傾成點。
同樣情況亦都出現喺南野拓實身上，主辦國日本亦都希望徵召佢。不過據了解，暫時未就呢件事進行討論，現時亦都冇時間上嘅壓力。
講返沙拿嘅情況，如果佢去踢奧運足球賽事嘅話，實際上佢會無法參與利物浦整個季前熱身準備。同埋如果埃及能夠晉身決賽嘅話，當佢返嚟球會報到嘅時候，距離英超開鑼戰嘅日子係相距唔夠一個星期。
另外，埃及國家隊亦都會喺 11 月 30 日至 12 月 18 日，參加喺卡塔爾舉行嘅阿拉伯盃賽事，實際上係為咗卡塔爾舉辦 2022 世界盃作為測試及演練之用。沙拿參與呢項賽事嘅機會應該唔大，因為歐洲球會屆時都未必肯喺呢啲時候放球員走。
但係，如果疫情好轉嘅話，沙拿將會喺 2022 年初，缺席球會賽事一個月，佢嘅隊友文尼及拿比基達亦然。
因為非洲國家盃將於 2022 年 1 月 9 日至 2 月 6 日，喺喀麥隆舉行。任何球員如果能夠晉身較後階段嘅賽事嘅話，相信會缺席大約 6 場聯賽。非洲國家盃改為季中舉行，對利物浦所帶來嘅影響，高普曾經以「災難」嚟形容。
此外，高普喺 7 月開始球隊嘅季前熱身準備工作上，亦都會因為國際賽事而大受影響。當中包括歐洲國家盃 (6 月 11 日至 7 月 11 日)、美洲國家盃 (6 月 13 日至 7 月 10 日)，球員拼搏及舟車勞頓，為佢帶來真正嘅煩惱。
通常球員參加咗喺夏天舉行嘅大型賽事之後，會有 3 個星期嘅假期，屆時高普想見到艾利神、費明奴或者法賓奴嘅話，相信要等到 8 月份喇。
***喺上述咁嘅情況下，意味著板凳深度喺 2021-22 年度球季，會顯得更加重要。***
***喺沙拿及文尼會喺球季嘅關鍵時刻缺席球會賽事，更加令到利物浦喺夏天急於需要羅致有質素攻擊球員嘅呼聲更加高。***
利物浦今季嘅聯賽入球，當中有 36% 係來自沙拿嘅。同時奧歷治、沙基利及張伯倫都未有取得入球，現時嘅替補與支援度顯然係唔足夠。
喺現時已經荒謬地密集嘅賽程，正正係高普點解對於歐洲超級聯賽計劃失敗而感到高興。對於歐聯嘅改革方案，高普以「笑話」嚟形容。當時班主 FSG 喺參與歐超聯嘅事情上，冇同最受影響嘅球會領隊及職球員傾談及聆聽佢哋嘅聲音，備受強烈抨擊。此外，喺歐聯改革方案上，高普亦認為歐洲足協冇充足地諮詢唔同球會嘅領隊與球員嘅意見。
