好多人話歐洲足協同埋目前歐聯制度仲係好有問題，以下列舉部分︰
(1) seat 太多
答︰cut 番做每個地區一隊固然係最好，但觀眾接受左一國三四隊有廿幾年了，算數啦。
(2) 場數太多，球員好攰
答︰首先各地可立法限制直播場次（係呀！歐聯冇直播，咪睇番聯賽囉）。其次可限制球員出場次數。例如新制下，如果唔計外圍賽，每隊最多可出賽14場，咁只要限制例如每人最多踢 8 場，美斯都冇面俾，小組賽要 field young players。咪得囉。
(3) 歐聯收入加大參與歐聯與無法參與歐聯球會距離和實力
答︰solution 勁簡單但不可能︰歐聯獎金分配要有一部分俾冇得踢的球會。個個都唔肯。
(4) 歐洲足協食水深
答︰咁呢個係政治問題，要由歐盟就歐洲足協於歐盟區收益立法徵重稅，稅金回饋體育。不過要留意番會計專業 virtually 可以扭曲任何徵稅情況。
但無論如何，啲錢俾番球會意義不大！又係俾啲股東 + 高層 + 經紀 + 球員食埋。佢地已經好肥啦。
(4) 歐洲足協不民主不透明
答︰同上，都係狹義政治問題，相關國家要立法。但更好做法係由球迷推動歐盟區政府加英國政府，推動歐洲足協成員國的會員地區足總策動內部改革。問題係球迷其實冇咁樣的要求。
anyway 以上全部都不是歐超聯可以cure 的事！所以根本佩雷斯等等就從來不是在對抗歐洲足協。
歐超聯唯一做的事，係只會為富豪球會帶來新收入。面對疫情下球會冇錢，隨時執笠，球員減薪根本本係唯一合理做法，早應減，起碼有空間減七八成。最好係整個工業禁絕經紀，慳番巨額中介費，不過可能會俾世貿 punish lol。
作為球迷，最起碼要拒絕俾錢睇。同埋不要俾精英足球綁架。
班主甚至歐足協最仆街的地方，就係覺得皇馬巴塞先有人睇，慕遜嘉柏對里爾就冇。點解足總要挽留南華？因為冇佢會少左收入。 擴充文化上的品味，係每個足球迷的日常小責任。
要令足球 sustainable （如果有咁樣的一天），最核心關鍵係限薪，其次係全球博彩業都要嘔番小小錢出黎俾足總機構，用來穩定制度，仲有當然係 fans 買番啲球會啦。不過算啦，我睇唔到啲類似出路的可能。所以都係攬炒最好，順便業餘化都ok。
資訊浩瀚；東張西望。
竭盡所能；深入求真。
企高一格；全新體法。