「點解歐超未開波你就屌定先？」以NBA制度參考，看歐超聯問題｜Ginger

用NBA呢個close league做參考，我覺得歐超作為一個半close league有好多根本性問題：

1. 獎罰制度:歐足係靠降班呢個終極懲罰迫各隊一定要競爭，降班就代表隊波會損失大量資源，甚至影響生存，而家歐超十二隊股東就算降班都唔會影響佢拎到嘅資源/錢，如果贏輸唔會影響生存，咁點解要競爭？NBA解決方法係靠懲罰強者獎勵弱者去維持競爭性，弱者理論上會出到更高人工同得到更多年輕有能力嘅球員，而強者因為規則限制必定會失去戰力同資源。歐超個半桶水降班制根本比唔到incentive 中下游去競爭，亦提供唔到流動性。

2. 薪金同球員工會：nba球隊係有薪金上限(salary cap)同薪金下限(salary floor)，呢種措施迫使到班主必定要持續投資（觸及下限賠錢係更得不償失)。而上下限係球隊同球員工會嘅協定，資方唔可以亂改。歐超嗰十二隊老闆會唔會比球員工會成立？無salary floor亦即係可以無限擺爛。更可怕係可以用salary cap上限做藉口壓低球員價值，用更少錢向非歐超球隊買人，令資源更集中係歐超，扼殺小球會嘅生存，而球員會更加無say，權力完全向資方傾斜。

3. 球員賣買：作為一個close league，nba獲得球星最低成本嘅方法係draft，球隊之間買賣巨星成本太大。同一道理，歐超球隊互相買賣成本太高，但歐超係無draft，唯有向非歐超球隊買球員，上面都提過歐超球隊出手一定唔高，非歐超球隊好大機會要賤價賣人，就算你做到外卡球隊都唔會夠資源同嗰十二隊鬥，咁點做到競爭性？

歐超未來係點？我估頭五年會好風光引人落搭，但過多十年廿年只會爛到入心，同時成個歐洲足球都比歐超做爛左，最後足球文明大倒退。

體嘢編輯部

資訊浩瀚；東張西望。
竭盡所能；深入求真。
企高一格；全新體法。