干拿迪轉投利物浦成數仍然係十五十六？｜Liverpudlian Ty
（編按：文章標題為編輯所擬）
鑑於有唔少朋友關注干拿迪嘅情況，網上亦有唔同嘅說法，咁筆者趁有時間都講吓啦。
首先，利物浦喺夏天嘅轉會目標嚟講，中堅係其中一個佢哋會跟進嘅位置，目標人物亦都唔少，當中包括本人喺一月轉會窗完結後，以隨筆方式提及嘅球員之外，仲有里爾嘅 Sven Botman、RB 萊比錫嘅烏柏美簡奴同埋干拿迪等等。可見利物浦對干拿迪有興趣，唔係呢幾個星期先至發生嘅事，而係至少幾個月之前，甚至更耐嘅時間。
其後，本身係前 BBC 記者，現時於 The Athletic 任職嘅 David Ornstein，喺 3 月尾就利物浦及干拿迪嘅事宜作出報道。根據佢嘅報道，利物浦對烏柏美簡奴有興趣，同埋來自轉會專家迪馬濟奧 (Gianluca Di Marzio) 團隊嘅 Fabrizio Romano 表示，利物浦打算夏天先至開始採取行動，但係拜仁慕尼黑及車路士早就已經主動作出接洽及斟介，最終呢位法國國腳中堅選擇加盟拜仁慕尼黑。喺咁嘅情況下，干拿迪就成為咗利物浦嘅主要目標。
此外，David Ornstein 亦都提到，干拿迪係一直受到唔少歐洲大球會注視，佢嘅合約係有解約條款，金額為 €40M。Fabrizio Romano 同樣喺 3 月 29 日就干拿迪嘅事宜作出跟進報道，利物浦係對干拿迪有興趣，但係當時只係傾緊個人條件。即係話，同唔少以往 FSG 時代嘅轉會操作一樣，利物浦根本未正式就干拿迪嘅轉會費事宜，與 RB 萊比錫達成協議。亦即係筆者一直講緊嘅係，呢單 deal 最終會否成事，或者要等到幾時先至成事，係要視乎 FSG 肯唔肯一次過俾 €40M 嘅解約條款金額，否則到時想同 RB 萊比錫傾壓價或者分期付款，屆時變數只會更大。近日利物浦對干拿迪嘅轉會事宜似乎變得停滯不前，甚或好似已經靜咗落嚟咁，筆者認為，若果最終未能成事，相信呢個會係原因之一。若果 FSG 想向史浩克 04 就買斷卡巴克試圖進一步壓價嘅傳聞係真嘅話，咁利物浦能夠成功羅致到干拿迪嘅機會，恐怕會更加渺茫。
另一方面，根據 Skysports 喺 3 月 30 日嘅報道，RB 萊比錫體育總監 Markus Krosche 表示，佢哋無意出售干拿迪。佢話干拿迪受傷係不幸，球會想令干拿迪繼續成長及發展，加上球隊建立得唔錯，同埋有歐洲賽席位，睇唔到干拿迪要走嘅理由云云。聽起嚟係似乎好合理，但係干拿迪同 RB 萊比錫嘅合約，只係去到 2023 年 6 月，同埋佢份合約係有解約條款嘅，喺咁嘅情況下，佢仲擺出一個 “strong hold” 嘅姿態，令到筆者回憶起拿比基達嘅轉會，期間都係要拉鋸一大輪，當時嘅體育總監韋歷克 (Ralf Rangnick)，亦係擺出一個「強硬」姿態，當時甚至一度以為呢單轉會隨時難產收場。呢啲咁嘅場面，相信係想向所有對干拿迪有興趣嘅球會，包括利物浦，發出明確訊息 – 你想要干拿迪，就要俾足 €40M 解約金。就好似 David Ornstein 嘅報道所講，RB 萊比錫冇壓力要賣走球員，如果想買干拿迪，就要啟動其合約之解約條款。
FSG 入主利物浦以來，除咗喺杜格利殊時代嘅「英人政策」期間，曾斥資引入球員之外，其後佢哋一直對利物浦都係奉行「自給自足」及 sell to buy 嘅政策。即使佢哋近日宣佈有投資公司 RedBird 及 NBA 球員勒邦占士成為新股東，但係當中所注入嘅資金，都係用喺日後收購其他體育隊伍及相關嘅資產併購等商業操作，對利物浦嘅轉會資金及運作模式並唔會帶來改變，呢樣嘢亦已經得到球會領隊高普嘅確認。
總而言之，以現時所見嘅資訊嚟睇，干拿迪單 deal，暫時情況唔太樂觀。所以，即使你幾有「足球視野」都好，喺宜家呢個情況下，去分析如果佢嚟到利物浦，會為球隊帶來啲乜，恐怕係言之過早。另外，若果講得稍為宏觀少少嘅話，以現時嘅營運模式及轉會操作方式，如果利物浦來季失落歐聯參賽資格，同時陣容需要進行世代交替，屆時會有幾多資金可以改善軍容，以便來季捲土重來呢？FSG 又會唔會喺球隊面對呢個重要時刻，會對利物浦嘅轉會資金再次投入呢？實在係一大問號。
David Ornstein 嘅報道
Skysports 嘅報道
Fabrizio Romano 嘅報道：
干拿迪
烏柏美簡奴
高普就 FSG 有新股東事宜嘅回應
theathletic.com/realtime/PBXayFezjyXE…
本專頁相關報道：股東升格！LBJ名列FSG合夥人
隨筆 (關於利物浦一月轉會窗最後幾日)
