誰惡誰大誰正確？超級經理人拉奧拿、班勒訪問節錄（下）｜體嘢報道
球壇兩大超級經理人：拉奧拿（Mino Raiola）、班勒（Jonathan Barnett）接受The Athletic訪問，談及經理人在球壇的地位以及與國際足協（FIFA）的糾紛。由於國際足協打算規管經理人在球員轉會交易佣金份額，故此遭受拉奧拿、班勒的抵制。拉奧拿甚至認為，國際足協是一個過時的機構，理應被早日解散。
上篇鏈結
班勒：「有一點國際足協唔太明白，我哋又唔係細路，又唔係做埋啲小本生意，大家咁高咁大姐。」
拉奧拿：「有一點我同班勒好唔同，我直頭認為國際足協唔應該存在。我嘅夢想，或者我希望喺有生之年睇到，足球界有一套全新嘅制度，一個對外界嘅更誠實嘅體系同產業，而家呢套太舊啦。」
拉奧拿語重心長地說：「年年都有醜聞發生喎，唔通每單都係巧合咩。你FIFA嘅格就係腐敗嘛，腐敗在DNA裏，因為你嘅組織就係咁樣樣。所以呢2021年嘅最大問題就係：國際足協存在嘅意義係乜？我哋交晒所有權力畀呢個商業機構，我都唔明點解有人希望成為呢個機構嘅一份子。以前呢個組織有咁多醜聞——都唔係講一年半載嘅事，係三十年來始終如一。我們唔需要國際足協，我哋唔需要一個對現代足球一無所知嘅組織。」
國際足協將會訂立經理人佣金的上限，並且重新引入考牌制度，嚴格規管經理人行業。而許多經理人均表示，這是外行管內行。
班勒：「我最大嘅不滿係，國際足協同現代足球世界相差太遠。佢哋只係縮喺瑞士嘅象牙塔，唔知球員做緊乜、經理人做緊乜、球會做緊乜。佢哋去諗新規則，但又唔知球員做啲乜，甚至唔識球員喎！國際足協咁鍾意搞大型活動、搞世界盃，我祝佢哋好運囉，但佢哋應該離開嗰堆自己唔熟悉嘅事物。」
拉奧拿：「我接受唔到一個將人打入監獄嘅組織去規管我嘅生活同生意，我亦唔會接受有人高高在上咁對我指指點點，更唔會接受佢哋用埋啲不合邏輯、唔誠實、違背我原則嘅方式嚟管理所有嘢。我要為球員嘅權益而戰，而家佢哋想要剝奪球員嘅權力。我唔會接受架。我從來冇接受過，以後都唔會。」
班勒：「佢哋發聲明話經理人行業有腐敗、洗錢，但佢哋連一個例子都舉唔出喎。全英國有成四五千個經理人，國際足協有冇落案告任何一位呢？」
「佢哋講法太荒唐，好可恥。其實我哋都向佢哋寫信，話佢哋都有可能畀人告架，因為佢哋冇憑冇據地咁樣指控我哋。我可以向佢哋展示下國際足協成員畀人拉嘅證據，我可以展示畀你哋睇架，咁佢哋公道啲出示返經理人犯罪嘅證據。」
資訊浩瀚；東張西望。
竭盡所能；深入求真。
企高一格；全新體法。
