球壇兩大著名超級經理人拉奧拿（Mino Raiola）和班勒（Jonathan Barnett）接受The Athletic訪問，爆出一連串金句。談及與大球會的關係，他們不諱言對方的感受並不是自己在乎的東西，他們在乎的只有球員本人的利益和感受。想當初拉奧拿被抨擊慫恿普巴（Paul Pogba）離開曼聯，拉奧拿更以I don’t give a fuck來形容。
他們和文迪斯（Jorge Mendez）一類經理人，一直被指控通過球員買賣和續約行為獲取暴利，所以總是被指責為貪婪、自私。對於經理人的形象，他們如此回答。
拉奧拿：「我唔同意喎，我哋成日畀人描繪係十惡不赦，但點會係真呢。當我喺意大利、荷蘭、法國行街，人人都尊重我，英國以外嘅人都對我嘅工作尊重、欣賞。」
班納：「問題係英國媒體太惡搞，不但係經理人，而係任何喺英國賺錢嘅人都會畀人鬧。可能佢哋覺得，喺英國搵錢係罪惡囉。所以媒體不妨試下喎，我唔否認我搵好多錢，拉奧拿都唔會否認，但我哋始終係成功啊，因為我哋為客人鞠躬盡瘁。如果我哋係損人（損害球員利益）利己，我哋應該釘死喺十字架啦。但我哋冇啊嘛，所以冇人會慳返筆唔搵我哋。」
拉奧拿：「我做呢一行都27年啦，咁多年來我代理嘅，都係高質球員。人哋買車都只會買勞斯萊斯、賓利（Bentley）、法拉利同保時捷，咁係因為佢哋高質嘛。如果球員信任我公司、相信我所做，咁只是因為我而家所做嘅事，都係為佢哋好，但我所作所為，同我嘅個人形象肯定唔同。我照鏡望下自己，都唔會揀自己代理自己啦。」
班納：「我喺八個國家有辦公室，而唯一一個攻擊經理人、問長問短問到篤，得返英國媒體。我喺美國、荷蘭、德國、法國、意大利、西班牙或其他任何地方都冇呢種經歷，事實上，人人對我哋做嘅大部分事情都係擊節讚賞。當然，拉奧拿係另一種情況——佢剋人憎嘛……」
拉奧拿和班勒坦認，要在經理人這一行成功，就要一張厚面皮，亦要不怕樹敵。當然，亦不乏想攀附他們的球員。
拉奧拿：「細細個嘅時候，我爸爸同我講，你命中有一半嘅人會愛你，另一半嘅人會憎你，所以我嚟呢度唔係為左討好大家。我只係需要家人同球員嘅愛，其他嘅我理佢做乜春姐。」
「又同你講個故仔，當然我唔開名，但嗰家球會係畀唔起球員獎金。兩邊傾足三個月，球員走去同球會講：『聽住，我哋頂唔順啦，我哋唔係專業嘅談判專家，我哋都想搵個經理人為同你哋傾呢啲……』球會就同佢哋講：『好極喎。你帶邊個傾都得，除左拉奧拿。』你覺得球員會搵邊個啊嗱？我囉，呢啲就係佢哋畀我最大嘅讚美。」
班納：「我哋份工就係咁，我哋去球會唔係要同球會高層或者教練交朋友，我哋份工就係畀球員話事。如果世界上任何一個頂級經理人講：『家家球會都愛我哋架，我哋係世上最好嘅人。』咁我就會諗：『我要挖走佢旗下大部分球員。』」
拉奧拿：「我返到意大利，佢哋將我當成罪犯，但去到英格蘭，當我提起普巴、曼聯，啲名宿特別緊張，我諗佢哋係咁樣睇我啦。但我認為，喺內心深處，啲名宿會諗：『屌，如果我仲踢波，我好樂意搵佢做經理人喎。」
拉奧拿因為普巴與曼聯鬧衝突，班勒因為巴爾（Gareth Bale）與施丹、皇家馬德里對著幹，是人所皆知的事。十年前，拉奧拿也曾因為伊巴謙莫域，與哥迪奧拿鬧不快。對此，他們亦不在乎。
拉奧拿：「費格遜走嚟鬧我，係對我最大嘅讚美。佢已經習慣每個人對佢低聲下氣咁『yes sir yes sir yes sir』嘛。當佢一離開，格拉沙話要回購普巴，咪證明左我係啱囉。嗰陣我都唔想帶走普巴架，係費格遜唔相信普巴咋嘛。所以當費格遜話我唔鍾意拉奧拿呢個人，仲唔係對我最大嘅讚賞啊？掂啦，佢點講我真係冇乜所謂喎。」
「咁至於哥迪奧拿先生呢，陳年舊事唔使提啦。個個都知道我點睇佢，佢點睇我係佢自由。我認為佢係一個偉大嘅教練囉，就係咁。我唔會因為任何人而收聲，我點講係我權利。」
「你話費格遜定哥迪奧拿都好，個問題係——佢哋認為我哋做經理人嘅應該向佢哋屈服，『你唔低頭你就冇得踢曼聯架啦』，而呢個情況已經轉變緊。喂就算以後唔同你曼聯做生意，我做嚟把撚咩（英文原話：I don’t give a fuck）。我又唔係喺呢啲人嘅手掌心，我係獨立嘅人，我哋需要守護嘅只有呢堆人：我哋代理嘅球員。只要球員鍾意你，你就要做你嘅份內事。」
（待續）
資訊浩瀚；東張西望。
竭盡所能；深入求真。
企高一格；全新體法。