最衰鮑家耀係男人｜施建章

一句歧視女性，可以不檢視裁判水準!
一句歧視女性，跟唔到比賽速度可以唔理!
一句歧視女性，可以點樣水唔夠水準都無問題。

唔好再搵女球證吹波，一句被視作歧視句語，鮑家耀又道歉，愉園又道歉跟住又一大堆手尾，又被入信投訴，最衰鮑家耀係男人。係呀男女平等，鮑家耀唔識講嘢，球証吹錯無水準都唔俾投訴。跟唔到波，男人同女人都一樣，伍炎堅好少俾人投訴，一定佢係男人，唔關佢執法水準事。個球証連去波同去腳都唔識分，暗瓦底啲球員同教練X過N咁多次，話你針對女人就當無事。吳超覺、廖國文成日俾人X，係吹得唔好，個國際牌同陳譚、火牛、區志成、姿勢黃、陳蔭明、伍炎堅比都差一大截，但起碼無教練同球員話佢跟唔到波節奏，大家都國際，唔通真係歧視你跑得慢、無速度、唔夠快？

當日傳媒的報導，正是問題的核心:
愉園主帥鮑家耀: 「求求足總不要再用女球証！我不是看低女性，但她真的沒有體能跟足全場節奏。她走漏了多少事件？她不止是一場，其他賽事也是如此，跟不上節奏又如何判決？所以求足總不要再派她吹男子賽事。」(體路)
飛馬主帥郭嘉諾:「犯規就是犯規，球證吹慢少少，3、4秒已可引發球員受傷。經過復賽，球員一直進步，希望球証都可以。」(HK01)

有踢波先明點解

無論評述同球証，未必個個好波，但最基本做呢兩項職業的人，自己都要踢波才能理解球員心理。還記得多年前參加足總的裁判班，國際球証張國駒經常提醒裁判學員，要眼快雞慢，球証是球賽的僕人，一場最好的執法，是越少雞聲越好，因為球証能控制比賽，球員不敢犯規，自然雞聲少。

陳譚新在第一課時就向大家表示，球証一定要有體能與控制比賽技巧，球証要熟書，更加要有判斷力，當球員被對手侵犯腳部，怒氣沖沖向球証投訴，作為球証一定要理解同冷靜。因為腳部是球員的搵食架生，你睇漏一眼，佢可能俾人踢到成年受傷唔駛踢，唔火滾就有鬼。

最衰鮑家耀係男人，做乜鬧女人!
最衰鮑家耀係男人，做乜輸波鬧女人!
最衰鮑家耀係男人，做乜教女子隊果陣無人話你鬧過女人!

鬧女人梗係唔啱，梗係要道歉，梗係要認衰，鮑SIR同愉園所有道歉都做齊晒喎，咁足總係咪要檢討吓球証水準?唔好話我歧視女人，我鬧左最衰鮑家耀係男人，我好尊重女性，LEFT PLASTIC放過鮑家耀，放過我，放過男人。

施建章