股東升格！LBJ名列FSG合夥人｜Liverpudlian Ty
根據由 FSG 老闆約翰亨利所擁有嘅美國媒體 Boston Globe，現時擁有英超球會利物浦及美國職業棒球隊波士頓紅襪嘅芬威體育集團 (FSG)，佢哋野心勃勃嘅發展計劃喺星期二向前邁進咗一大步。佢哋多咗兩個新嘅合作夥伴，一個係來自紐約嘅投資公司，另一個係職業體壇嘅著名運動員。
據知情人士透露，本身係利物浦及波士頓紅襪母公司嘅 FSG，批准 RedBird Capital Partners 嘅 7.5 億美元私人投資，令到呢間來自紐約嘅投資公司，成為 FSG 嘅第三大股東。呢個合作夥伴關係將會注入現金，以便有助 FSG 日後可以收購更多嘅體育隊伍。至於另一位 FSG 股東，係 NBA 球員勒邦占士。
勒邦占士係現時世界上其中一位最廣為人知、具有影響力，同埋富有嘅運動員。佢喺 2011 年，持有大約 2% 嘅利物浦股份。至於現時佢會持有幾多 FSG 股份，則未有透露。勒邦占士成為咗 FSG 嘅股東之後，亦都將會成為波士頓紅襪，同埋其他 FSG 名下嘅體育隊伍及附屬機構嘅老闆之一。當中包括體育媒體 NESN、NASCAR 賽車車隊 Roush Fenway Racing 同埋芬威體育管理公司 (Fenway Sports Management)。
報道話，勒邦占士可以提高 FSG 資產嘅品牌價值，當中嘅潛力係巨大嘅。再加上 RedBird 嘅投資，將會有助 FSG 嘅消費力量，以便能夠擴展佢哋嘅資產組合，同埋開始日後作出嘅資產併購。據悉呢項交易，有待美國職業棒球大聯盟 (Major League Baseball) 嘅批准，期間可能要等幾個星期。
同勒邦占士一齊成為 FSG 股東嘅，仲有 Maverick Carter。佢係勒邦占士嘅朋友，亦係長期嘅商業夥伴。勒邦占士同 Maverick Carter 嘅加入，係 FSG 有史以來，第一次有黑人股東。
俾 FSG 睇中嘅項目相當多，包括 NFL 球隊、NBA 球隊、另一間歐洲球會、NHL、MLS、WNBA、NWSL 球隊，仲有體育博彩、Esports 同埋數據分析公司。
RedBird 嘅現金注資，令佢哋得到 FSG 嘅 11% 股份。令 FSG 嘅企業價值大約有 73.5 億美元。FSG 將擁有 6 億至7 億美元嘅債務，其中超過 6 億美元嘅現金，係去咗現有嘅合作夥伴度。
本身擁有美國媒體 Boston Globe 嘅 FSG 主要擁有者約翰亨利，將會繼續掌控 FSG，並且仍會以華納為 FSG 董事長，同埋米高哥頓擔任 FSG 嘅總裁。華納仍然係 FSG 嘅第二大股東，同時米高哥頓就會「下跌一級」，成為 FSG 嘅第四大股東。
本身係負責 FSG 顧問及市場推廣工作嘅 FSM，同勒邦占士已經合作咗十幾年，FSM 係負責有關占士嘅所有關於市場推廣及代言嘅工作。
RedBird Capital Partners 嘅現金，當中大部份嘅投資，都將會用喺 FSM 身上，呢個意味著勒邦占士將會喺 FSG 嘅營運方面，扮演更重要嘅角色。喺 2019 年，FSG 成功將利物浦嘅球衣贊助商轉為 Nike，結束同 New Balance 嘅長期合作關係。
勒邦占士本身係 Nike 嘅客戶。佢喺 2015 年，同 Nike 簽下一份終身合約，相信其合約總值係超過 10 億美元。
喺過去嘅一年，FSG 從佢哋其中一個較新嘅股東，位於美國達拉斯嘅 Arctos Sports Partners 身上，得到一筆未有公開詳情嘅投資。
據消息人士透露，FSG 將 RedBird 嘅注資，視為佢哋追求新收購項目，同埋合作夥伴關係嘅第一步。
福布斯最近對 FSG 嘅估值係 66 億美元，喺體育王國排行榜上名列第四，並且比另一隊美國職棒紐約洋基嘅母公司（64億美元）嘅排名仲要高一位。喺呢個最新嘅估值嚟講，FSG 排喺 Jerry Jones 控股 (NBA 球隊達拉斯獨行俠，同埋地產、接待服務、Esports) 嘅 69.8 億美元；高安基體育及娛樂 (擁有英超球會阿仙奴、職業美式足球隊聖路易斯公羊、NBA 球隊丹佛金塊、NHL 球隊科羅拉多雪崩隊) 嘅 87.3 億美元，同埋自由媒體 (擁有一級方程式賽車、美國職棒亞特蘭大勇士、無人機競速聯賽) 嘅 130 億美元之後。
之前名為新英倫體育集團 (NESV) 嘅 FSG，佢哋喺 2002 年，先以 7 億美元，收購美國職棒隊波士頓紅襪，福布斯對佢哋嘅估值係 33 億美元。
FSG 嘅另一次大灑金錢，要數到 2010 年，佢哋喺全球經濟不景嘅情況下，以 4.93 億美元嘅價錢，收購因為之前嘅班主而導致財困嘅英超球會利物浦。
畢馬威 (KPMG) 最近對利物浦嘅估值係 26 億美元，咁即係話，勒邦占士據報起初只持有接近 2% 利物浦股份，佢呢項投資嘅價值已經由 650 萬美元，增加至大約 5200 萬美元。
上面提過嘅 RedBird Capital，係由投資者 Gerry Cardinale 牽頭嘅。
喺上年秋天，Gerry Cardinale 同埋喺美國職棒隊奧克蘭運動家，以 “Moneyball” 成名嘅 Billy Beane，成立 RedBall Acquisition Corp.。佢係作為一間特殊目的收購嘅公司，係去尋求一間公司去投資同埋上市。據報道，佢哋曾著眼於對 FSG 作出 15 億美元嘅投資，同埋如果將 FSG 上市嘅話，個估值可以去到 80 億美元。
不過，RedBall 遇到來自公眾投資者喺投資價格方面嘅阻力，最終 FSG 決定繼續作為一間私人公司，令到 RedBall 嘅希望落空。
仍然相信 FSG 及 Gerry Cardinale 對於體育產業嘅發展機會，係有相似嘅願景。Gerry Cardinale 本身亦都係美國職棒隊紐約洋基嘅母公司及其 YES Network 嘅董事局成員。根據美國證券交易委員會 (SEC) 喺上年嘅記錄，其中一位 FSG 嘅有限合夥人，Seth Klarman，同埋佢嘅 Baupost Group 對沖基金，最近向 RedBall 投資咗 5200 萬美元。
喺上年 7 月，Gerry Cardinale 同埋 RedBird 收購咗法國乙組球會圖盧茲嘅 85% 股份。Gerry Cardinale 講過，喺歐洲嘅足球聯賽，好多嘅投資機會係有待發掘。
