老實講，執教國家隊係一份半退休嘅工作。平均一個月教一兩場比賽，對一啲年紀唔太大嘅教練來講實在唔夠挑戰性。同埋原來人工都差得幾遠。以拜仁慕尼黑為例，Flick 一年人工收800萬歐元、路維收350萬歐元（人工對國家隊教練來講已經算係最高個批），一年間比賽個數量都唔同。
正如高普話齋，德國係出產左唔少幾好嘅教練：Klopp、Tuchel、Flick、Nagelsmann 。其中四大教練之中，有三個上年帶到球隊殺入歐聯四強；下季去多蒙特嘅Marco Rose 都係上位嘅少帥。不過呢五個年紀唔太大，都應該教球會，week in week out 磨練下自己比較合理。而且球會賽事可以每日操練，完完整整咁整合一套體系；國家隊嘅比賽，講真大半都係天才波。所以，上述五位仲可以教頂級大會，短期內都唔會係國家隊帥位嘅人選。
咁邊個係比較合理？ Ralf Rangnick 、Stefan Kuntz 同 Roger Schmidt （PSV主帥）。
德國國家隊教練，其實由達禾爾 、碧根鮑華、福士、列碧克、禾拉，到奇連士文、路維，執教德國國家隊前，喺球會生涯都唔係頂級名帥，甚至有個別幾個更加係未曾教過波嘅少帥（碧根爸、禾拉、奇哥）。路維喺德國國家隊做助教之前，其實都係越撈越霉。
體嘢MeWe：mewe.com/p/sportsyeah
Ralf Rangnick 嘅管理工作同現時德國足總嘅總監兼領隊比亞荷夫重疊，其實德國足協更加應該請佢去頂比亞荷夫，反而係做總監嘅角色而非教練。當然，Rangnick 近年無論做教練或者總監都做得好好，18/19球季都有教過RB萊比錫得聯賽季軍。
不過，如果Rangnick 去德國足總工作，以佢咁識波同咁多年嘅管理經驗，其實去重組現時德國嘅青訓、業餘足球同職業足球嘅理念，會比起比亞荷夫更加合適。Rangnick 本身已經有料，如德國足協可以幫佢搵到森馬、拿姆（已經幫德國足協申辦同統籌2024年歐洲國家盃）、2015年已經預視到世界球壇和德國球壇問題嘅Funino 推行者Dr. Matthias Lochmann 、以及史浩克04嘅62歲傳奇青訓教練Norbert Elgert （曾經訓練出Neuer， Howedes， Matip， Draxler， Leroy Sané， Goretzka， Kolasinac， Malick Thiaw， Max Meyer 等人上一隊）等作輔助，作全國性嘅管理改革……咁無論邊個做教練根本都唔會令人擔心。以上提及幾個人結合了管理（Rangnick、Sammer）、球員（Lahm， Sammer）和青訓改革（Lochmann， Elgert）嘅經驗，而且非常熟悉足球運作…..如果作為管理層，選出嘅新任帥位人選一定唔會差得去邊。
比較少人提及嘅Roger Schmidt， 其實佢都係一個有趣同可行嘅人選。因為難度會比較細，佢依家只係教緊PSV， 同埋佢無論教利華古遜或者PSV燕豪芬都幾敢於用新人，而且有紅牛理念打底。年紀方面53歲，都接近目標年齡。
另一個人選為現時德國21歲以下國家青年代表隊嘅教練Stefan Kuntz，佢曾經於2017年帶領德國U21在當年嘅21歲以下歐洲國家盃奪得冠軍；其後，再於2019年帶領德國U21再奪得21歲以下歐洲國家盃嘅亞軍。Kuntz 唔係咩戰術大師， 不過識用人同識睇人。人際關係都做得非常唔錯。佢身邊有一個猛人做助教，叫Daniel Niedzkowski ，亦都係現時德國足協教練班（Weisweiler Academy）嘅主要導師。德國U21青年代表隊能夠在連續兩屆中殺入決賽並獲得好成績，全憑二人嘅合作無間。
大前提係：Ralf Rangnick 去德國足協，最好唔係做教練，而係做總監。佢上任，德國足總未來行嘅道路（包括選帥），一定唔會錯得太離譜。路維走，但繼續比留比亞荷夫做總監兼領隊，繼續助長德國足協內部嘅弗賴堡派。現時嘅國家隊助教索格（Marcus Sorg） 做埋主帥真係唔係天方夜譚。如果Rangnick 頂比亞荷夫，呢啲情況又未必會出現。
所以為免掟煲唔掟蓋，路維走、 比亞荷夫都要走。德國足協要由業餘聯賽、青訓以及職業聯賽嘅計劃中增添新思維，德國足球先會真正再重新出發。路維走，只是一個好開始，但並非一個復興。
最後，總結一下我嘅狂想：Rangnick 做總監兼領隊，Sammer/Lahm/Elgert/Dr.Lochmann 做策劃，Stefan Kuntz升職做主帥，揾Daniel Niedzkowski做助教。唔只路維要走，佢身邊嘅應聲蟲：比亞荷夫、國家隊助教兼前弗賴堡主帥Marcus Sorg ，都可以一齊走。
比亞荷夫於2020年12月曾經表示，自己當時已經同Ralf Rangnick 就德國足協嘅工作談論/接洽過（https://www.sportbuzzer.de/artikel/oliver-bierhoff-bundestrainer-suche-ralf-rangnick-nachfolger-joachim-low-klopp/amp/） ，不過未知係咩崗位。不過在我嘅角度睇，Rangnick 最好就唔係頂路維，而係頂替比亞荷夫本人。
www.dw.com/en/klopp-flick-rangnick-who-could-replace-joachim-low/g-56816513
如欲優先下載《體波台》、《Stretford End》、《The Boot Room》及《Invincibles》等多個足球評論節目，請加入體嘢贊助會員計劃。方法如下：
1. 下載Patreon手機程式及開通帳戶；
2.搜尋體嘢專頁（patreon.com/sportsyeah)並訂閱體嘢；
3.支付5美金月費（相等於39港元）。
