唔明白唔理解可以去睇去聽去學，自己都唔知唔肯定呢就唔好亂咁對外講，除非你想博鬧啦。講緊嘅係前諾域治/韋斯咸前鋒艾殊頓，佢早排接受咗 talkSport 嘅電台訪問，當中談及到佢對現今守門員嘅睇法，初初聽落都還算可以認同，不過愈聽就愈唔對路，後段真係聽到火都黎。
初段佢講到哥迪奧拿黎到英格蘭，完全將守門員呢個位置從新演譯。因為以往根本唔會有教練叫啲門將負責組織攻勢嘅第一步或者逼佢地唔好成日一腳踢上前場，要用短傳破解對方嘅逼搶。而英超近年最明顯嘅例子當然就係曼城同利物浦，佢地靠住艾達臣同艾利臣呢兩位除咗撲救能力外，擁有上乘嘅腳下功夫同傳送能力，加上高位防守令佢地經常需要做埋清道夫嘅門將，令到球隊可以經常地形成 11 個打 10 個嘅形勢由後場開始組織攻勢或者解除威脅。
而呢兩隊嘅成功令到愈黎愈多球隊開始仿效佢地，對於英式傳統門將一向都係有事就一下大腳踢走黎講，呢個打法直接令到對門將嘅要求愈黎愈高，例如當哥迪奧拿加盟曼城嘅時候，祖赫特表現大跌就係一個好例子，因為佢完全執行唔到哥迪奧拿嗰套，變相令到自己不停出醜，最終黯然離隊。除非球隊堅持傳統英式/穩守突擊打法，例如好似英超嘅般尼咁，樸比就只需要專心做好撲救同出迎，有咩事就一腳踢走已經做到領隊嘅要求。
講到呢到我都仲認同艾殊頓嘅睇法，不過之後就精彩了。艾殊頓之後話，以往練波成日都係要將門將同其他場區球員分開，依家唔應該再係咁，佢唔清楚依家係唔係咁但佢認為門將應該要同其他球員一樣接受場區球員訓練。
之後佢話佢覺得有生之年應該會見到唔少球員踢踢下後衛或者中場踢埋守門員，因為依家對守門員嘅腳下功夫要求咁高，不如索性揾個可能已經30歲或者年輕而又有6尺3寸高嘅後衛/中場球員，如果佢地打本身嘅位置上唔到位，就直接試下用兩年轉型做門將，橫掂已經有返咁上下腳下功夫。而且現今打法嘅門將點都係會犯錯，而領隊一定係覺得好處多過壞處所以先會對門將有「打多一個場區球員」嘅諗法同戰術，所以艾殊頓認為揾場區球員練幾年就應該可以應付到門將呢個位置。
坦白講，艾殊頓後段嘅睇法真係難聽過粗口。首先唔通佢真心認為哥迪奧拿、高普或者其他對門將有差唔多要求嘅門將真係會仍然淨係要求門將做返自己嘅訓練，唔使同其他球員一齊練波？
然而佢覺得腳下功夫好然後練兩三年波就已經可以勝任門將呢個位置實在係太睇少守門員要負嘅責任同埋背後嘅努力，簡直係侮辱咗所有守門員，特別係一啲努力咗好多年但因為種種原因而踢唔到最高水平嘅球會或者甚至連職業足球員都做唔到嘅球員，你叫佢地情何以堪？
有睇開我地嘅分析嘅朋友應該都可以了解到，一個波撲到撲唔到，並唔係咁易就咁一句反應唔夠快或者唔好彩就可以解釋到。當中係可以細分到好多詳細嘅位置而導致相關嘅結果。當中需要嘅經驗同努力訓練嘅過程並唔係咁易就可以得到。
而作為一位守門員，除咗艾殊頓講嘅腳下工夫同埋我剛剛提及嘅撲救之外，其實仲有好多其他原素，例如技術上需要有能力阻截射門 (Shot Prevention) 以及無球在腳時候嘅腳法同位置感 (Foot Work & Positioning) ，而溝通上需要有能力適當地指揮隊友 (Commanding) ，而心理上亦都要應付到同場區球員好唔同嘅壓力，因為做場區球員傳失一個波仲有後面嘅球員幫你補鑊，但做守門員如果傳失波，好大機會會送一個入球機會比對方。當然仲有好多好多其他嘅例子，但重點就係一個守門員並唔係咁易做，唔識嘅人真係唔好再無料扮四流出黎用場區球員嘅角度去評論守門員，根本就係睇低呢個位置所需要嘅能力，對住呢啲人一句講曬，你識條鐵咩？
艾殊頓 talkSport 訪問片段
如欲優先下載《體波台》、《Stretford End》、《The Boot Room》及《Invincibles》等多個足球評論節目，請加入體嘢贊助會員計劃。方法如下：
1. 下載Patreon手機程式及開通帳戶；
2.搜尋體嘢專頁（patreon.com/sportsyeah)並訂閱體嘢；
3.支付5美金月費（相等於39港元）。
資訊浩瀚；東張西望。
竭盡所能；深入求真。
企高一格；全新體法。