FSG如何辜負高普？ ｜Liverpudlian Ty
上季勇奪英超冠軍嘅利物浦，喺今季遇上重大嘅考驗同埋難關。由中堅位置所引發嘅危機，已經喺隊中深化，導致喺四個禮拜前仲喺榜首嘅情況下，戰績嚴重滑落，球員身心俱疲之餘，信心同士氣都顯著受損。
無疑對球隊嘅操練、賽前嘅部署與準備、排兵佈陣、戰術配置、臨場調動，呢啲絕對係高普及其團隊嘅責任。但係，一隊球隊能否成功，成功後又能否持續強勢，除咗領隊、教練團隊同球員嘅努力之外，班主及管理層嘅態度同有冇實質嘅支持，其實係同樣重要。
以下呢篇文章，係出自 Times Sport 嘅 Chief Football Writer – Henry Winter，會同大家講吓關於 FSG 同埋高普。
原作者：Henry Winter
譯者：TY
原文標題：Jurgen Klopp has been let down by Liverpool owners
輸俾曼城、或者不敵哥迪奧拿嘅無窮創造力，並唔係令人羞愧嘅事。唯一令人感到可惜嘅，係冇作出回應，呢個就係宜家利物浦要面對嘅挑戰。
問題嘅中心，就係利物浦嘅班主 FSG，會否作出回應。佢哋同武漢肺炎大流行所產生嘅成本問題角力之中，並且之前已經投資興建位於 Kirkby 嘅一流訓練場地，喺夏天亦都引入祖達、泰亞高艾簡達拿同埋森美卡斯，轉會費合共大約 £72M。
FSG 被唔少人覺得係好班主，部份係因為佢哋唔係同樣來自美國嘅前班主吉列及希克斯；亦都唔係曼聯嘅班主格拉沙家族咁不受歡迎，而係約翰亨利會參與社區活動、能言善道，同埋喺聘用高普、羅致艾利神及雲迪克嘅事情上，顯示出決斷力。
但係，曾經提議將票價增加至 £77，導致出現 2016 年球迷離場抗議事件，最終要作出道歉嘅，係 FSG。喺上年，宣布將利物浦球會 200 名基層工作人員，列入臨時停職計劃之中，並且要求英國政府代為支付其 80 % 薪酬，令到球迷反彈之下，被迫將之撤回嘅，亦係 FSG。有份一齊推動 Project Big Picture 嘅無恥圖謀，同埋宜家參與緊只向錢看嘅歐洲超級聯賽計劃嘅，亦都係 FSG。
雖然偶爾有一啲有浪漫色彩嘅故事會出現喺約翰亨利身邊，但係他係一個商人，佢係志在謀求賺到一大筆錢，甚至更多。對約翰亨利嚟講，利物浦唔係佢嘅嗜好，或者激情所在。一番計算之後，金錢更有意義。當利物浦陣容需要適當嘅投資嗰陣，約翰亨利將之煞停。所有嘅跡象睇嚟，嚟緊嘅夏天將會係另一個緊縮時期，未能播下成功嘅種子，而晏菲路球場嘅草地就繼續休養生息。
約翰亨利第一次令到高普失望，逼使佢只能夠喺次一級嘅英冠聯賽中游份子，同埋德甲榜尾球隊中，尋找球員加強球隊嘅後防中路，就好似一個家傳戶曉嘅名字，要嚟到街頭小店購物咁。FSG 面對高普所需嘅時候，就好似變到幾乎一無所有咁。對於以自己作為班主，以了解球會嘅歷史而感到自豪嚟講，約翰亨利係應該知道，喺傳統上，利物浦需要更進一步嘅時候，陣容係會得到加強嘅。
對於覺得自己有幸喺星期日嚟到晏菲路球場睇對曼城場波嘅人士嚟講，結果令到大家都感到失望同崩潰。你見到杜格利殊爵士亦都嚟到晏菲路球場，大踏步入場。佢經常喺度，會坐喺有利位置嚟支持利物浦，就好似佢喺球員時代嘅表現一樣。喺 1977 年，奇雲基瑾轉投漢堡，杜格利殊由些路迪加盟。約翰亨利同佢嘅助手，應該唔需要被提醒嘅係，利物浦喺 1977 年，喺奇雲基瑾帶領嘅前鋒線，贏得歐冠盃，及後憑杜格利殊射入決定性嘅一球，協助球隊成功衛冕，再奪歐冠盃殊榮。維持奪冠嘅勢頭，一直都加強陣容。
星期日對曼城場波，當中有 7 個球員，係喺 2018 年歐聯決賽輸俾皇家馬德里嘅正選，佢哋係阿歷山大阿諾、羅拔臣、軒達臣、韋拿杜姆、沙拿、費明奴及文尼。當中有 9 個球員係 2019 年勇奪歐聯冠軍嘅正選球員，就係上述 7 個，再加埋艾利神及法賓奴。即使係一個皇朝都需要新元素，即使係人才儲備亦都需要補充。
利物浦呢班波，睇嚟已經好疲倦，佢哋需要恢復活力。自從喺 1963-64 年度球季開始以來，利物浦未試過喺晏菲路球場上連輸三場，當年佢哋接連輸俾諾定咸森林、黑池及韋斯咸。雖然係咁，但係喺 Bill Shankly 嘅帶領下，仍然能夠奪得聯賽冠軍。然而，今個球季唔會出現當年嘅情況喇，因為曼城太好，利物浦太過疲憊。
喺嚟緊嘅夏天，利物浦需要 FSG 對球隊進行大量嘅投資，同時仲有賣走球員嘅工作，或者從中可以收返一啲資金。 可悲嘅係，拿比基達太過容易受傷喇，奧歷治同埋沙基利係唔錯，但係佢哋唔係精英球員，即使利物浦球迷會對佢哋嘅貢獻表示感謝。同韋拿杜姆傾續約嘅僵局，似乎係利物浦出現困境嘅徵兆：一個班主當佢應該專注地支持高普，俾資源佢，務求令球隊再次成為領導者嘅時候，佢就喺度尋找給予高普資源嘅最低界線係乜。
如果對約翰亨利嚟講，錢係最緊要嘅話，佢應該實知道如果喪失歐聯參賽資格嘅話，會有乜嘢代價，同埋佢喺想搞歐洲超級聯賽嘅搞手面前，亦會感到羞愧。但係，對於大多數關心體育比賽誠信同完整性嘅人嚟講，令人擔心嘅係，利物浦如果未能喺英超聯賽有所作為，並且再次得到歐聯參賽資格嘅話，可能只會鼓勵 FSG 進一步同歐洲嘅貪婪球會打成一片。
約翰亨利需要作出正確回應：預期應該要賺錢之前，你需要作出投資，去支持高普。利物浦被曼城喺下半場嘅出色表現擊潰後，英國 BBC 電台第五台，由瑟頓及沙華治主持嘅 phone in 節目度，聽到有啲打電話入嚟嘅人士，佢哋嘅腦海都已經偏離所有嘅常識，甚至有人要高普下台。幸好，瑟頓及沙華治令佢哋明白到，其實高普係代表利物浦嘅拯救計劃。
高普會對逆境作出回應，呢個係佢嘅本性。佢會對利物浦未能好好地衛冕聯賽冠軍感到憤怒。喺過往嘅歷史，有表現更為差勁嘅衛冕聯賽冠軍，好似布力般流浪，1995-96 年球季得第 7 名、車路士喺 2015-16 年球季得第 10 名、李斯特城喺 2016-17 年球季得第 12 名。
作為一個咁有智慧嘅人，高普會仔細檢視及分析自己同埋其他人。佢需要喺接受媒體訪問嘅時候，少啲發脾氣或者針鋒相對，同埋要更勇於作出換人調動。佢需要保持警惕，保持展現佢嘅勇氣，就好似佢帶領嘅 2019 及 2020 年嘅利物浦咁。換出對曼城表現出色嘅居迪斯鍾斯，令人感到奇怪，咁並唔係高普嘅本色。
喺重整球隊軍容嘅同時，高普亦都應該要考慮持續為教練團引入新元素。前曼聯領隊費格遜過往擅長羅致新球員去挑戰隊中嘅現有球員，並且引入新嘅教練團成員，務求挑戰現狀，尋求突破。
有新面孔會有幫助，但係任何熟悉球隊更衣室，並且擔任某啲角色嘅人都會知道，球員仍然會對現狀作出回應。經驗豐富及有推動力嘅球員，好似軒達臣、羅拔臣及文尼，會努力為球隊現況作出回應。35 歲嘅占士米拿仍然雙腳跑動，但唔係因為佢嘅飢渴感。作為一個職業球員，艾利神相當專心致志，但係佢應該要重新集中精力投入操練，以便防止再次出現類似星期日下半場嘅錯誤。
現年只係 22 歲，天份極高嘅阿歷山大阿諾，亦將要作出回應及改善。佢要努力改善自己嘅防守，以便能夠同本身出色嘅進攻能力相輔相成。無畏無懼嘅年青球員，例如居迪斯鍾斯，亦會努力為球隊現況作出回應。因傷缺陣嘅雲迪克及祖高美斯，將於今年某段時間復出，及為球隊挺身而出，為羅拔臣及阿歷山大阿諾提供快速補位，令佢哋助攻嗰陣更具信心。祖達亦都將會復出，以致力為球隊改善表現嚟作出回應。
利物浦將會還我本色及會對球隊現況作出回應，但係球隊需要 FSG 嘅支持。
如欲優先下載《體波台》、《Stretford End》、《The Boot Room》及《Invincibles》等多個足球評論節目，請加入體嘢贊助會員計劃。方法如下：
1. 下載Patreon手機程式及開通帳戶；
2.搜尋體嘢專頁（patreon.com/sportsyeah)並訂閱體嘢；
3.支付5美金月費（相等於39港元）。
