隨筆｜Liverpudlian Ty
對於喜歡跟進轉會新聞同埋消息嘅我，自問都相當密切留意利物浦喺一月轉會窗嘅情形，尤其是臨尾三四日。當中嘅過程，甚至所謂「神 deal」，過程真係相當好笑。
喺轉會窗結束前三四日，利記打電話去搵幾乎返硬希臘嘅 Sokratis，真係有趣。喺 Transfer deadline day 嚟講，一開波就好似藥石亂投咁 (at least 我有少少呢種感覺)，直頭係發晒癲咁搵咗起碼 6 至 7 個中堅，向成個歐洲高呼嗌救命。FSG 搵咗啲咩人呢？
1. Duje Caleta-Car (原來 FSG 成日話自己冇錢買人，原來都出到 €23M bid 人架喎。但係你 FSG 臨尾一日話要人，馬賽話要時間搵 Replacement，唔夠時間搵，咪 rejected 囉！)
2. David Carmo (loan and option to buy, rejected by Braga)
3. Kabak (loan and option to buy, 但係 04 要時間搵 replacement，如果唔係好彩 04 連梅斯達菲都肯要，否則神 deal 你個頭呀！)
4. Sokratis (原來人哋就嚟確定返希臘，你先至走去打電話俾人，雖然佢麻麻啫，都唔使去做埋啲無謂兼夾戇居嘢吖)
5. Davies (高普都話，正常時候唔會吼普雷斯頓球員，琴晚後備都冇)
6. Issa Diop (韋斯咸標價 £20M，跟住冇行動)
7. Tapsoba (有媒體報道，利記落實 deal 卡巴克之前，其實想要呢件。佢係好呀，但係利華肯放先得架？仲要臨尾一日，傻架？問咗價之後，梗係又收皮啦！)
8. Umtiti (一個 injury prone，兼已失正選嘅巴塞中堅，但係佢寧願繼續留隊)
由搵 Caleta-Car, Carmo, Diop, Tapsoba 呢啲，可見雖然時間咁少，但係高普仍然最想要嘅中堅，一定唔係宜家買返嚟呢兩位，甚或即使要卡巴克，都仲想要一個踢緊頂級聯賽，有身型、身高、有頭槌、有一定速度，用到波，打到 highline 嘅中堅。
雲迪克同祖高美斯早就因為重傷收咧，其實利物浦嘅中堅危機早就出現。成個一月轉會窗，唔係只有三四日，何況根據以上嘅實例，有啲中堅係有個價嘅，亦都係 FSG 可以出手 bid 到返嚟嘅 (一個 €23M，一個標價 £20M，仲有個里爾嘅 Botman, 由於里爾財困，其實 €30M 已經交易到)。問題係，唔係你 FSG 先至要搵人頂，人哋都要搵人頂架大佬！如果早啲啲日子做嘢，已經可以令高普搵到更合適嘅人選。講真，即使廿幾M買到上面其中一位中堅，都仍然係 OK 嘅操作，唔係因為價錢，而係 timing 同埋個 quality 同結果，唔會係宜家咁樣。結果就係，錢嘅角度，贏晒，但係對高普嚟講，係咪咁啱使呢？卡巴克我覺得可以寄望嘅。
同埋買咗咩人都好，唔係個個都係 VVD，泰亞高，可以唔使夾就出得架。早啲啲買人，唔使繼續 overload 個別球員，唔使再搞到球員係咁輪流傷。唔使因為後防問題，影響埋成個攻守體系，甚至球隊士氣與信心，或者可能仲有機會失少啲分，唔使話咁快就可以唔使爭取衛冕。甚至，琴晚可以解放到隊長或者邊爐是但一個呢。連呢啲都唔肯嘗試早啲啲做嘢，係要拖到啲人傷晒，高普公開出聲話要人，先至臨尾一日俾兩件高普用，喺競技上嚟睇真係好咩？唔覺囉。
更好笑嘅係，當中堅危機出現，利媒如 James Pearce 話，買人係對球會財政不負責任 (financial Irresponsible)，成個文匯報咁。後尾又轉口風，話需要 quick fix，可見其姿態何其核突。咁宜家入咗兩個，咁 FSG 豈不是對球會財政好不負責任？FSG 係不能也，定係不為也？顯而易見吧。
記得有篇英媒文章講過 (David Maddock)，如果 FSG 喺一月真係不作為嘅話，就會有因小失大嘅風險。如果真係前四不保嘅話，可以引申出幾多問題，相信大家都記得，例如目標球員仲想唔想嚟，現時效力嘅球員仲想唔想續約留效。隊波宜家又要面對陣容世代交替嘅時刻，剩係買祖達係唔夠嘅。現實啲嚟講，FSG 嘅角度，營運收益一定收少好多，筆直少咗，即係又少咗錢買人。假如佢哋日後想賣利物浦，宜家個價位都未必係最靚。到時無論喺競技上，定係財政上，都唔會係好事。
如果啲「神 deal」真係咁神，令到 squad building 好好嘅話，點解解救唔到宜家嘅困境？或者可以減低個問題對球隊嘅影響呢？點解一遇到稍為多一兩個人傷，就硬係覺得 squad depth 唔夠，應付幾條戰線嘅時候，都比其他球隊係特別辛苦？甚或某啲球員仲喺隊中，又再後備換佢哋入嚟嘅時候，點解會令有啲球迷即刻覺得絕望冇得追？
另一篇英媒文章都講到 (Simon Hughes)，FSG 係 profit oriented，佢哋只需要利物浦 near the top，文章值得一看，相當程度解釋咗點解 FSG 係咁嘅取向。可見佢哋同球迷想利物浦一直成為爭標，甚至冠軍球隊嘅預期有幾明顯嘅落差。冇錯，FSG 係請咗高普，不過個人相信，當高普 available 嘅時候，唔請嗰個係傻嘅。喺咁嘅營運模式之下，真係好靠高普同教練團隊，否則真係好難吸引好球員嚟，同埋將隊波推到上宜家呢個高度。之後係點？會唔會 Sustain 到？God knows！
God bless LFC.
如欲優先下載《體波台》、《Stretford End》、《The Boot Room》及《Invincibles》等多個足球評論節目，請加入體嘢贊助會員計劃。方法如下：
1. 下載Patreon手機程式及開通帳戶；
2.搜尋體嘢專頁（patreon.com/sportsyeah)並訂閱體嘢；
3.支付5美金月費（相等於39港元）。
