車路士終於成功擊敗Big Six球隊，過程仲幾具信服力，對得住一班凌晨起身睇波嘅亞洲區球迷。經過三場後，杜曹取得兩勝一和而且一球不失，相信足夠令一班未上任已經開始質疑嘅車迷暫時收聲。
一、10號嘅蒙特
小弟曾經講過蒙特位置應該會越踢越後，而且唔合適合踢no.10，但佢呢場嘅表現可以話係狠狠地打咗我一巴。今場杜曹再次排出343，但前線三人唔再係平排展開，而係將雲拿同赫臣奧杜爾置於左右，而蒙特就放喺兩人中間身後，排出嚟更似3412。
今場車路士49%攻勢來自右路，除咗因為赫臣奧杜爾嘅活躍同列斯占士嘅後上外，亦多得蒙特積極地走入右路half space以overload熱刺左路。呢個青訓組合為熱刺帶來唔少麻煩，三人多次穿插喺戴維斯、靴爾保同戴亞之間，把握對手換防時嘅空位製造攻勢。
蒙特嘅進攻覆蓋面極廣，可以不斷支援左右兩個half space，同翼鋒、翼衛形成傳球三角形，確保進攻時嘅人數投入。蒙特嘅傳送同突破能力的確未見太突出（至少未突出到能夠成為play-maker），但佢嘅跑動、反應、入楔都成功轉化為創造力，帶動球隊進攻。今場蒙特交出3次key passes，同列斯占士同列為全場最多。
進攻外，今場蒙特喺背身對抗方面嘅表現亦令人喜出望外。上季一直略嫌蒙特拎波太離腳，技術不至於可以順暢轉身，而力量方面亦唔足夠推開對手，因此踢作為進攻橋頭嘅no.10會有所不足。但今場蒙特面對熱刺力量、防守偏強嘅中場時仍然有50%地面對抗成功率（5/10），1次盤扭成功，多次喺中路擺脫對手成功轉身。
賽後蒙特被選為MOTM，稱得上實至名歸。唔知往後蒙特會唔會繼續向10號位呢個方向發展，但今場嘅表現對球隊、球迷同佢自己嚟講都係相當鼓舞。
二、中場抗壓核心高華錫
熱刺下半場開始加強逼搶力度，針對車路士嘅後場組織。呢段時間車路士中後場一度受到頗大嘅壓力，幸好熱刺幾次嘅成功搶斷都被球證吹罰。喺車路士受壓之下，高華錫嘅作用極為明顯。呢位上季車路士最佳球員多次主動同熱刺中場對抗，於受壓時成功擺脫對手，甚至利用熱刺前壓後嘅身後空間發動反擊。
今場高華錫嘅對抗數據極出色，贏晒全部地面對抗（6次）同空中對抗（1次），外加1次盤扭成功，對於車路士中場解鎖、抗壓、推進可謂至關重要。
對比之下，簡迪上場後車路士嘅中場就立即失勢。簡迪嘅抗壓能力實在唔強，同時熱刺又換上極爛打嘅拉美拿，令車路士中場再次受到極大壓力，要不是熱刺創造力太差車路士應該拎唔到三分返屋企。一般情況下球迷都會認為簡迪防守能力高於高華錫，但當面對高強度壓迫時簡迪用波能力不足嘅弱點就會成為球隊防守缺口。
三、把握力仍有極大改善空間
全場掌控戰局，照形勢嚟睇車路士絕對唔應該嬴得咁少。根據Understat嘅數據，車路士全場xG高達2.63，單計下半場xG就已經有1.69，但最後只能射入一球十二碼。
今場入球數字低並非因為埋門差，而係創造出嚟嘅機會質素唔高。上半場完壓熱刺左路，但入到禁區後總係無法傳出一腳致命傳送。下半場成功把握熱刺身後空間打反擊，但最後一傳嘅決定同時機都令人失望。射門機會唔係冇，只係唔夠清脆利落，最後全場只創造出1次big chance，喺16次射門中僅有2次中龍。
賽後杜曹亦提到今場車路士欠缺clear chance，希望佢喺發現到呢個問題後能夠重點改善。
四、三中堅係權宜之計？
杜曹上任三場都使用三中堅，令人好奇佢係咪已經搵到自己嘅心水陣式。誠然，好多車路士球員都非常適合踢三中堅陣式（Azp、阿朗素、魯迪加等），但三中堅陣式又係咪適合車路士陣容呢？
最大Concern係進攻球員分配，現時呢套三中堅陣式就只有三個attackers，然後再屈指一算，陣中能夠踢到呢個位嘅球員有成8個咁多（艾巴咸、基奧特、雲拿、蒙特、夏弗斯、佩利錫、薛耶治、赫臣奧杜爾），差唔多3個人爭1個位。你可以話呢個係幸福的煩腦，幸福的煩腦嘅背後又的確會帶來唔少實際煩惱。球員過度輪換的話好難可以保持狀態，但輪換不足又會令球員不滿，加上車路士高層喺剛剛夏天投入大量資金喺鋒線上，固然希望能夠盡量發揮進攻球員力量。
不負責任地推測三中堅可能只係短期方案，甚至只係為對熱刺呢場而準備。林柏特在任尾段車路士嘅防守穩定性同逼搶都出現問題，使用三中堅陣式估計係想先打好防守，以控制代替進取，整理球隊逼搶陣形。因此可見車路士呢三場比賽喺進攻上其實略為單調，亦欠缺較進取嘅攻勢。
杜曹使用嘅陣式非常多變，可以肯定未來車路士必定會變陣，問題只係「幾時變」同「點樣變」。但就現階段而言，杜曹使用三中堅呢個部署係成功嘅。
如欲優先下載《體波台》、《Stretford End》、《The Boot Room》及《Invincibles》等多個足球評論節目，請加入體嘢贊助會員計劃。方法如下：
1. 下載Patreon手機程式及開通帳戶；
2.搜尋體嘢專頁（patreon.com/sportsyeah)並訂閱體嘢；
3.支付5美金月費（相等於39港元）。
資訊浩瀚；東張西望。
竭盡所能；深入求真。
企高一格；全新體法。