之前分享過英超門將撲救表現，個別門將數據的確令人眼前一亮。今次講下各門將面對角球時風格及出迎嘅成功率（數據截至今季英超第17週）。先簡單解釋下圖：x軸水平線係門將面對斬入可出迎範圍角球時選擇出迎嘅機率，由左至右一路遞增，即靠近左邊嘅門將偏向停留於底線，相反嘅門將就係更偏向果斷出擊；y軸垂直線代表門將角球出迎時成功嘅機率，出迎時接實個波或打手鎚遠離危險區域為至成功，如果完全打空或者打手鎚後個波跌入危險區域就會定義為失敗。
個別球員點評：
於面對角球時整體表現最好嘅係修咸頓嘅麥卡菲，有達近43%嘅出迎率，而當中有近85%成功接實或打出化解危機。再比較埋另一項數據 ExG prevented 可以發現，麥卡菲每次應對可出迎範圍嘅角球 (ExG Prevented per Claimable Corner) 平均可以為球隊減低 0 .092 預期入球，為全英超最高！
另一位要講嘅係正選位置已被取代嘅馬菲賴恩。雖然佢今季嘅角球出迎成功率偏低，出迎成功化解危機嘅機率只有68%，不過其實佢面對角球時係肯果斷出迎，喺可出迎範圍角球嘅處理上平均 ExG Prevented 竟然位列英超第二，有 0.083 咁多！相信同上季佢嘅出迎次數排英超尾二有關（題外話，榜尾嘅係阿里沙巴拿加），所以好多球隊對住馬菲賴恩都嘗試將個波斬入可出迎範圍內，不過今季馬菲賴恩喺出迎決斷力高咗唔少，令到佢一下子由上季嘅尾二升到上暫時嘅第二位。
其餘較肯出迎而又表現較好嘅門將包括有艾達臣、艾利臣、馬天尼斯、美利亞等，其中艾利臣及馬天尼斯有著百份百出迎成功率，佢地唔單止果斷出擊，仲百發百中成功每每於角球中化險為夷。而美利亞呢位年青門將雖然不停比外國球評家話佢高波經常亂咁出迎，但其實佢嘅出迎成功率一啲都唔低，足足有成83％！美利亞其實係今季英超角球出迎次數最多嘅一位門將，足足有成18次（當中接實4球，11次打手鎚遠離危險區域，只有1次打空同埋2次打手鎚後個波仍然喺危險區域），以一個20歲嘅門將呢堆數據真係令人非常驚喜。而邊啲球評家唔識扮識成日話佢？有睇開英國電視台啲精華節目嘅朋友一定知……
另一邊廂，亦有門將係甚少出擊，如卡斯柏舒米高及柏捷斯奧，前者絕大部分時間都選擇留喺底線做撲救，只有5%機率會出迎，後者亦只有約8%。角球出迎得少，ExG Prevented 自然係包尾嘅兩個，分別只能夠阻止 0.001 同埋 0.018 嘅 ExG。
另一位想特別講下嘅係般尼嘅樸比，喺好多項據都名列前矛，特別係上季嘅角度出迎表現非常好嘅佢，原來今季角球表現令人大跌眼鏡，出迎率只有 18% 而且成功化解危機亦只有50%，而 ExG Prevented 亦都只有 0.027，排呢個表內嘅尾三。今季嘅樸比點解表現會變得咁差呢？一來佢比起上一季無咁進取少咗出迎，加上可能其他隊知道佢高波經常都會出迎，就索性唔斬咁多入去心臟地帶，所以呢17場內佢要應對嘅角球數字唔多，當中只係有一球接完之後甩手就令到佢嘅成功率大跌。所以我地一於睇下完咗成季之後佢嘅數據會唔會有所提升！
最後一位想講嘅係出現喺本 Page 最多嘅門將 – 愛華頓嘅碧福特！差唔多講親失誤就有佢份，今次都唔例外。碧福特好多情況下都係好肯出擊嘅門將，應對可出迎範圍角球有成25%出迎率，而佢嘅可出迎範圍角球平均 ExG Prevented 係 0.042 令到佢未至於排到尾五，但其實當中只有50%嘅出迎成功率。其實佢魯莽出迎又無準又點止係應付角球果陣，死球時都見唔少，今季大家最印象深刻嘅想必係對住利記上半場時一下死球出擊，踢唔中波之餘仲整傷對面雲迪克，對手而家仲係復出無期。
===============
請多多支持守門員日常！
Thank you for your support on Goalie Daily!
Facebook: www.facebook.com/goaliedailyhk/
Instagram: instagram.com/goalie.daily
YouTube: www.youtube.com/channel/UCOkceg4wD4GdWiwsTRJ3EGw
如欲優先下載《體波台》、《Stretford End》、《The Boot Room》及《Invincibles》等多個足球評論節目，請加入體嘢贊助會員計劃。方法如下：
1. 下載Patreon手機程式及開通帳戶；
2.搜尋體嘢專頁（patreon.com/sportsyeah)並訂閱體嘢；
3.支付5美金月費（相等於39港元）。
資訊浩瀚；東張西望。
竭盡所能；深入求真。
企高一格；全新體法。