David Ornstein：維拿杜姆有機會在季尾離開利物浦 ｜ Liverpudlian Ty
根據 The Athletic 嘅 David Ornsterin，利物浦中場球員韋拿杜姆可能會喺季尾離隊。
隨著利物浦喺一月預期會係一個相對平靜嘅轉會窗，宜家已經有唔少嘅目光會注視佢哋嚟緊夏天嘅轉會操作。從南野拓實，呢位可能係利物浦喺一月轉會窗羅致嘅唯一球員中，可能會找到線索。
現年 24 歲嘅日本國腳南野拓實，今季成為歐洲球壇其中一位優秀嘅攻擊球員之一，利物浦啟動其 £7.25M 嘅解約條款，成功將佢從薩爾斯堡紅牛羅致。此外，利物浦亦都被傳與多蒙特翼鋒查頓辛祖及巴黎聖日耳門前鋒麥巴比呢類貴價球員扯上關係。
但係喺可見嘅將來，辛祖及麥巴比都未必會加盟利物浦。因為動用相當嘅金錢，去羅致一啲每場都希望踢正選嘅球員，而高普又唔能夠對此出場時間作出保證嘅情況下，利物浦亦都唔係咁有興趣斥巨資進行羅致。
相反，南野拓實同意加盟利物浦時，佢知道會由球隊嘅必然正選，變成嚟到要面對強烈競爭，並且準備好面對呢個挑戰。體育總監米高愛華士亦勢將帶領利物浦向類似嘅方向前進。一般相信，佢哋會尋求好似南野拓實呢類嘅球員，而唔係好似查頓辛祖類別嘅球員。
雖然隊中主將，例如沙拿及文尼，宜家已經成為世界級球星，佢哋嚟到利物浦嘅時候，都仲係成長之中，需要證明自己嘅階段，呢個就係利物浦喺羅致球員方面，打算繼續營運嘅方向。喺咁嘅方向同目光之下，利物浦應該羅致於2017 年，喺摩納哥離隊嘅麥巴比，而唔係宜家喺巴黎聖日耳門羅致佢。
一啲高價收購，好似雲迪克同埋艾利臣，係例外嘅個案。因為利物浦喺呢啲個別位置上，對於能夠改變球賽戰果嘅球員係有急切嘅需要。呢啲嘅轉會操作，其後可見其合理嘅一面。不過，球會管理層唔會預期，呢類動用大額資金羅致球員嘅情況成為常態。
球會亦都同大部份嘅主將以優厚薪酬續長約，例外嘅係荷蘭中場球員韋拿杜姆。現年 29 歲嘅佢，同利物浦嘅合約仲有 18 個月，據悉有意大利及西班牙球會對佢有興趣。
利物浦及韋拿杜姆都對現時嘅情況感到舒服。有可能出現嘅情況係：(1) 續約、(2) 喺 2021 年自由轉會、又或者 (3) 如果接獲合適報價的話，喺今季結束後離隊。利物浦會樂意朝著可能性 (1) 嘅方向發展，不過亦都對可能性 (2) 感到可以接受，雖然佢係喺 2016 年，以 £25M 從紐卡素羅致。至於可能性 (3)，係利物浦唔係太喜歡嘅選項，因為利物浦唔想失去韋拿杜姆，同埋會要求高昂嘅報價。
如欲優先下載《體波台》、《Stretford End》、《The Boot Room》及《Invincibles》等多個足球評論節目，請加入體嘢贊助會員計劃。方法如下：
1. 下載Patreon手機程式及開通帳戶；
2.搜尋體嘢專頁（patreon.com/sportsyeah）並訂閱體嘢；
3.支付5美金月費（相等於39港元）。
