史雲斯擬借用布魯斯達 ｜ Liverpudlian Ty
根據 The Athletic 嘅 James Pearce 及 Stuart James，英冠嘅史雲斯與利物浦作出正式接洽之後，現時係最有機會借用年青前鋒 Brewster 嘅球會。史雲斯與利物浦接洽時，表示會俾 Brewster 喺英冠聯賽有穩定嘅上陣機會。
雖然利物浦領隊高普曾經於今夏唔贊成將 Brewster 外借，但係喺球季嘅下半季，呢位德國籍領隊願意俾今季只為利物浦上陣兩次嘅 Brewster，喺其他地方得到一啲寶貴嘅一隊上陣經驗。
據了解，利物浦及史雲斯已就借用 Brewster 嘅事宜展開談判，但強調現時未有最終決定。史雲斯希望能夠成事，但係亦都知道其他嘅英冠球會都渴望借用 Brewster，當中包括普雷斯頓。
另一方面，利物浦亦都想喺 1 月 5 日，足總盃對愛華頓之後，能夠達成借用協議。預料領隊高普喺頻密嘅賽程下，陣容上會作出唔少嘅輪換。
1 月 5 日對愛華頓嘅足總盃賽事，係利物浦 19 日以來嘅第 7 場賽事，Brewster 可能有機會上陣。及後嘅時間，鑑於高普喺後備席上仲有其他攻擊球員選擇，令到 Brewster 唔會取得太多嘅上陣時間。
史雲斯對 Brewster 嚟講，會係一個具吸引力嘅選擇，當中有幾個原因。首先，史雲斯預料會喺一月轉會窗期間，將西班牙前鋒保查巴斯頓（Borja Baston）放走，Brewster 將會有頻密地為該英冠球會上陣嘅機會。放走咗保查巴斯頓嘅話，到時就會只有來自般尼茅夫嘅借將 Sam Surridge，成為佢哋陣中嘅唯一前鋒。
另一個更主要嘅原因就係，Brewster 可以重遇現時執教史雲斯嘅 Steve Cooper。英格蘭 U17 於 2017 年，喺印度奪得世界盃冠軍，當時嘅主教練就係 Steve Cooper，而 Brewster 於該項賽事射入 8 球，成為金靴獎得主。當時佢嘅國家隊隊友包括曼城嘅 Phil Foden、現時效力多蒙特嘅 Jadon Sancho 及車路士翼鋒 Hudson-Odoi。
喺 2018 年 1 月嘅嚴重足踝傷患，令 Brewster 嘅發展及成長停滯咗，當時佢需要休息超過 1 年。喺呢段時間，Brewster 同利物浦簽下一份 5 年嘅新約，期間曾經有幾間德甲球會對佢有興趣。
上季嘅歐聯決賽，Brewster 成為後備席上其中一員。喺今年 9 月，利物浦喺聯賽盃擊敗英甲球會米爾頓凱恩斯，係 Brewster 首次正式為利物浦上陣嘅賽事。佢嘅另一次上陣，係喺 10 月份，同樣亦都係聯賽盃，利物浦同阿仙奴踢成 5-5，最後互射十二碼晉級。
如欲優先下載《體波台》、《Stretford End》、《The Boot Room》及《Invincibles》等多個足球評論節目，請加入體嘢贊助會員計劃。方法如下：
1. 下載Patreon手機程式及開通帳戶；
2.搜尋體嘢專頁（patreon.com/sportsyeah)並訂閱體嘢；
3.支付5美金月費（相等於39港元）。
