英超版戰衣冇世冠章 利物浦向英超賽會上訴 ｜ 體嘢報道
根據 The Athletic 嘅 James Pearce，有關喺英超賽事中穿上印有世界冠軍球會徽章嘅球衣事宜，利物浦已向英超賽會作出上訴。
利物浦喺卡塔爾進行嘅世界冠軍球會盃決賽，於加時憑費明奴一箭定江山，最終以 1-0 擊敗巴西球會法林明高，係球會史上首次奪得呢項殊榮。利物浦成為世界冠軍球會，並且能夠喺球衣上印上尊榮嘅金色徽章。
但係，利物浦現時只可以喺歐聯賽事——亦即係話，佢哋只可以喺明年 2 月 18 日，歐聯 16 強首回合對馬德里體育會嘅時候，先至可以穿上印有世界冠軍球會徽章嘅球衣上陣。
現時英超賽會只係容許喺一個球季期間，將慈善訊息添
加到球衣之上，並且規定任何改動球衣嘅建議，都必須得到董事局嘅批准。
佢哋之前喺 2008 年，拒絕咗曼聯奪得世冠盃之後，喺聯賽中穿上加印世界冠軍球會徽章嘅球衣。不過，據了解，利物浦要求英超賽會就上述做法重新作出考慮。
利物浦方面相信，球會歷來首次成為世界冠軍球會，無論佢哋踢緊乜嘢賽事，都應該可以喺球衣上反映及慶祝呢項成就。
利物浦亦都會指出一個事實，就係世界冠軍球會盃喺 2000 年改制以來，只係第二次有英國球會能夠奪得呢項殊榮，呢個對於英超聯賽嚟講，亦都應該係一個感到驕傲嘅源由。此外，利物浦亦會指出，喺 2016 至 2018 年奪得世冠盃嘅西甲球會皇家馬德里，西甲賽會亦都俾佢哋喺聯賽穿上印有世界冠軍球會徽章嘅球衣上陣。
利物浦亦會正式向英格蘭足總呈交正式嘅申請，以便佢哋能夠喺 1 月 5 日對愛華頓嘅足總盃第三圈賽事中，球衣上可以加上世界冠軍球會徽章。
根據國際足協嘅規例，關於喺 2007 年開始使用嘅世界冠軍球會徽章，「只能適用於現時嘅球隊官方球衣」，「唔能夠用喺之前，或過去歷史版本嘅球隊球衣、訓練球衣、運動服裝、訓練上衣，又或者任何其他產品之中」。
可見喺上述國際足協嘅指引下，由奪得世界冠軍球會盃開始，利物浦就已經可以使用世界冠軍球會徽章，直至 2020 年 12 月舉行世冠盃為止。
喺前往卡塔爾嘅途中，荷蘭中場韋拿杜姆講到世冠徽章點樣成為推動球員嘅動力。佢話：「當我同家人及朋友傾談關於呢項賽事嘅時候，佢哋都有談及個徽章。呢個係你想要嘅嘢，每一次你望住件球衣，都會提醒你為球隊奪得世冠盃冠軍。」
擊敗法林明高奪得世冠盃之後，利物浦會得到 £4M 獎金。但係當中嘅收益，會因為贏得錦標所產生嘅商業因素而大為增加。
利物浦成為歷來第一隊喺同一年內奪得歐聯、歐洲超級盃及世界冠軍球會盃嘅英國球會，可見喺高普嘅帶領下，展現出明顯嘅復甦。
利物浦剛剛成為世界冠軍球會，加上與體育用品巨頭 Nike 嘅球衣贊助合約會喺 2020 年夏天開始，咁樣將會令佢哋喺亞洲及南美嘅分店中佔有更大嘅比重及曝光率。
如欲優先下載《體波台》、《Stretford End》、《The Boot Room》及《Invincibles》等多個足球評論節目，請加入體嘢贊助會員計劃。方法如下：
1. 下載Patreon手機程式及開通帳戶；
2.搜尋體嘢專頁（patreon.com/sportsyeah)並訂閱體嘢；
3.支付5美金月費（相等於39港元）。
