皇馬一年收入，仲少過維他奶？——論職業球會商業估值 | 李聲揚
【背景，引自足球財經】
英國《金融時報》於香港時間十一月二十七日約中午時分率先報導曼城母公司城市足球集團（City Football Group, 下稱“CFG”）獲美國私募基金Silver Lake 以五億美元作價入股，認購 CFG約10% 股權。有關消息於同日稍後時間獲得交易雙方證實，而公告亦特別提到交易並無涉及股東出售原有股份，所有收益純為新發行的股份，與及整家 CFG 的估值約爲48億美元，打破全球體育企業估值紀錄。此前，阿里巴巴副主席蔡崇信以 23.5億美元估值完成全購NBA球隊布魯克林籃網，而曼聯在交易前的總市值為約 28 億美元。（此段為編輯所加，方便讀者了解曼城母公司被入股的來龍去脈。）
同市共榮呀喂！多得小友報料。完全諗唔到，真係冇發達。
1. 曼聯大升，點解？因為曼城咯。有冇留意同市共榮四隻字我特別用天藍色？
2. 曼城冇上市，但新聞係私募基金（呢間出名）Silver Lake最新入股(*)咗10%，作價4億8（美金，下同）。咁即係，成間曼城估值係48億美金。
3. 外行人會覺得，嘩，咁值錢。但諗真啲，其實球會係好唔值錢，應該係，嘩，「咁平」。類似嘅我都寫過，不妨又回多次帶。
4. 首先，話我仇富（？）都好。曼城始終冇上市，條數就係咁話話估值48億，亦係因為有人真金白銀拎4億8買10%—但如果真係上市，仲係咪咁嘅價？你可以參考下UBER或WEWORK啲「估值」，去到上市就見光死。
5. 現實啲，曼聯，市值，升完之後，30億美金。唔好問我點解曼城值錢過曼聯（你肯定曼城上市仲有嗰48億「估值」？），但曼聯上市trade咗咁耐，個市值比較可靠。
6. 留意，都不過係30億美金。咩概念？240億港紙。維他奶近期跌到PK，都仲有300億港紙市值。而出咗香港，畀你計埋大陸，仲有幾多人識咩係維他奶？
7. 唔係講戰績，但計收入呀，粉絲數目呀，影響力呀，品牌價值呀。曼聯都肯定係全世界頭五間球會之一。喂，先係大半間維他奶？Something is wrong.
8. 你係都要話曼聯雄風不再（利申：前曼迷，但講緊廿幾年前），負債又高乜鬼。不妨睇下，祖雲達斯，一樣全球top 10 （if not top 5）球會，一樣上市，市值係曼聯三份一左右。
9. 結論好簡單：球會嘅市值，完全同佢地嘅影響力，不成比例。
10. 再睇多啲，睇埋收入。維他奶，一年10億美金左右．「其實仲多過皇馬」，多過任何一間球會，every single club。球會收入高，頂級球會講緊可以去到近10億美金-但冇你想像中咁多，都話少過維他奶。
11. 或者話，你想像唔到維他奶之類嘅悶棍公司做幾多生意。球會收入，間間都係嗰三味：match day, broadcasting, commercial．大約畀你數字你想像下：英超轉播費一年幾十億美金，但咁多隊分，阿公又食咗舊，一隊落袋咪億幾兩億幾美金。贊助？講緊一隊過億美金一年就好勁了。match day？基本上所有大會，呢舊都係三味中最細嘅。靠你嗰一千幾百蚊飛就死得。更加唔好信嗰啲咩簽尼馬只係賣波衫已經回本嘅弱智故事—大佬呀，你賣衫賣到幾億，你估球會落晒袋咩，好多去咗Nike/Adidas度咯好冇？
12. 你會話，計收入有鬼用咩，要計利錢。冇錯啦，就係bottom line
13. 點解咁有影響力嘅球會，市值連間（已經跌咗好多嘅）維他奶都不如？因為，球會係賺唔到錢的。
14. 至於點解球會賺唔到錢，好多書有講，不再一一重覆。但好簡單嚟講，球會如果上市，就好似特首（！），係有兩個老細，而佢地嘅目標係唔一致，甚至矛盾嘅。
15. 球迷就梗係想捧盃，你問球迷甚至唔介意球會蝕到仆街（馬拉加？辛尼特？安捷？），「總之畀我捧次盃」。但股東就睇另一樣嘢，梗係睇錢，唔賺錢都唔係蝕到仆街，否則邊個埋單？
16. 所以啲成功球會（唔計中東佬嗰啲古怪嘢，或傳說中的西班牙政府送個球場畀皇馬巴塞之類），就係在兩樣嘢之間平衡。追求勝利，但唔好蝕得太多。咁亦即係，你冇乜可能賺到大錢，因為有錢賺，球迷就會想你去買勁啲嘅人(**)。
17. 結論係乜？其實球會，我覺得都係唔好上市好。當然其實而家上市似係潮流，曼聯祖雲達斯嘅玩法，當係消費品牌咁，甚至開下餐廳開下學校，就另文先再討論了。
*嚴格嚟講入股嘅唔係曼城，係母企City Football Group，仲有一大抽紐約FC 墨爾本FC 橫濱水手之類的物體。雖然多數都係十分老味唔方賺錢。分分鐘你話「曼城」值錢過CFC都有機。
**又嚴格嚟講，球會買入賣人唔係計入上面講嗰啲咩三味收入，係好似買機器買地咁，分開N年攤銷。但反正都係錢能通神，無數研究指出過，小弟都寫過好多篇，球會人工支出，係同成績，有相當強嘅正相關。反而同轉會費相關性冇咁大。你睇美斯就知，巴塞近乎零轉會費搵返嚟，但唔高薪畀佢，佢一早走咗啦。所以話球會有錢買入，其實應該係指可以畀高啲人工。畢竟就算你買到人，都要球員肯受你份糧。
如欲優先下載《體波台》、《Stretford End》、《The Boot Room》及《Invincibles》等多個足球評論節目，請加入體嘢贊助會員計劃。方法如下：
1. 下載Patreon手機程式及開通帳戶；
2.搜尋體嘢專頁（patreon.com/sportsyeah)並訂閱體嘢；
3.支付5美金月費（相等於39港元）。
