雙紅會以1-1和氣收場。利物浦領隊高普（Jürgen Klopp）批評曼聯的龜縮戰術，卻遭到前曼聯領隊摩連奴（José Mourinho）反唇相譏「你入得嚟麥記，仲以為呢度賣牛河」（“He doesn’t like the menu. He wanted meat, and he got fish.”）
除了曼聯的鐵桶陣，VAR對華舒福入球前連迪路夫的犯規判決，以及球證的執法尺度，均令利物浦球迷大為不滿。華舒福上半場憑快速反擊接應占士的右路傳中先開紀錄，紅軍靠末段拉蘭拿伏兵門前扳平。高普評論戰局時表示：「我哋值得呢1分。我哋令曼聯得償所願踢出呢種風格，人哋排出五後衛。我哋進攻做得唔夠好。我哋壓力大，本來可以把握某啲入波機會。」
「有一支球隊一味防守，而另一支球隊真正踢波。反過來說，如果另一隊波控球冇咁多，我認為曼聯唔會咁踢。」是役曼聯控球比率只有32.1%，是曼聯自2003-04球季以來，歷史第二低的主場控球率。此外，近16年來曼聯單場控球率最低的比賽，是2018年3月對利物浦，紅魔鬼的控球率僅有32.06%。高普認為，跟曼聯這種風格的球隊對壘是「冇得踢」：「我點解要失望？我唔應該對曼聯嘅風格失望。曼聯只想防守，唔係批評，係事實——今年、上年，前年，我哋作客佢哋都係一味防守。大家以為雙紅會大開大合，但唔係嗰回事。我哋成日都面對呢類對手，或者我哋可以做得更好，但今日佢哋咁踢我哋冇得打。」
高普不只批評蘇斯克查，似乎同時批評了前領隊摩連奴。在Sky Sports擔任嘉賓的摩連奴反駁：「高普咁講係因為佢未曾喺奧脫福贏過曼聯。高普入到嚟先知份餐單唔啱胃口，佢想食肉但人哋賣魚喎。」
如欲優先下載《體波台》、《Stretford End》、《The Boot Room》及《Invincibles》等多個足球評論節目，請加入體嘢贊助會員計劃。方法如下：
1. 下載Patreon手機程式及開通帳戶；
2.搜尋體嘢專頁（patreon.com/sportsyeah）並訂閱體嘢；
3.支付5美金月費（相等於39港元）。
資訊浩瀚；東張西望。
竭盡所能；深入求真。
企高一格；全新體法。