係巴塞令我知道甚麼叫做愛 | Hong Kong-Catalonia Solidarity Assembly

係巴塞令我知道足球唔單只係足球，而係一種愛。

想當年，睇住細哨著住紅藍雙間嘅波衫踢波。原本件波衫面乜都無，唔似其他球隊上面有心口贊助；有一日，件衫心口上面多咗幾個英文字：unicef，聯合國兒童基金會。

原來足球係可以幫其他人。

2011年，巴塞贏咗歐聯冠軍；第一個捧起獎盃嘅唔係隊長佩奧爾Puyol，而係成隊波最唔出名、寂寂無名嘅艾比度Abidal。由佢第一個捧起獎盃，因為幾個月前發現佢肝臟有腫瘤要做手術；最後，佢正選上陣踢決賽，榮光當然先歸於佢。可惜，之後佢肝臟問題依然，要進行肝臟移植。當時有人自願提出捐肝，個個係同佢無血緣關係，但一同喺草場出生入死嘅丹尼爾艾維斯 Dani Alves；只不過到最後由艾比度嘅親人挨一刀。

原來足球係超越贏輸，可以為隊友付出一切。

其他隊嘅作客波衫好型，但唔知點解巴塞個件要係紅黃間。原來紅黃間係巴塞所屬嘅加泰羅尼亞嘅旗幟顏色，巴塞 more than a club ，因為佢係西班牙中央政府打壓當地文化時，佢守護緊屬於佢哋嘅價值。

原來足球係可以守護一個地方嘅文化。

2017年，加泰人發起民主公投自決前途。但和平到不得了嘅投票卻受到中央政府暴力打壓：唔俾運選票入票站、派防暴企係票站門口、毆打投票嘅老人家……到最後加泰人都成功完成投票，不過西班牙政府唔理之餘，仲要捉埋加泰政府領袖。結果政府領袖流亡海外，其他政府官員就如依家新聞所見，因為一個和平公投而被判十年監。

巴塞令我花咗唔知幾多個深夜，望住十一個男人跑嚟跑去，但同時知道甚麼叫做愛。愛，係不惜一切守護內心最珍重嘅嘢。依家當巴塞同加泰人面臨住我哋呢幾個月所面對緊嘅嘢，各種嘅暴力，我哋可以為佢哋做嘅最卑微之事，就係同佢哋講：Fight for Freedom, Stand With Catalonia!

如欲優先下載《體波台》、《Stretford End》、《The Boot Room》及《Invincibles》等多個足球評論節目，請加入體嘢贊助會員計劃。方法如下：

1. 下載Patreon手機程式及開通帳戶；
2.搜尋體嘢專頁（patreon.com/sportsyeah)並訂閱體嘢；
3.支付5美金月費（相等於39港元）。

體嘢編輯部

資訊浩瀚；東張西望。
竭盡所能；深入求真。
企高一格；全新體法。