1. 睇到篇文時應該已開咗波，香港時間4點半，2022世界盃外圍賽亞洲區，南韓作客北韓，平壤金日成競技場。
2. 留意，係當地5點半。你覺得好濕碎，「即係同南韓日本一樣」。但幸福唔係必然。想講係，我2018年10月去北韓時，都係咁—但轉咗冇耐咋。之前幾年，北韓發老脾，將個時間改返做大韓帝國年代，即係較慢咗30分鐘。極煩。然後2018年春天「文金會後」，肥仔金大統領話見到板門店南北韓兩個時鐘唔同時間，好心痛（忽然發現），先改返。其實係釋出善意，當返係兄弟。小小一件事睇到北韓係一個幾咁煩嘅地方，政治大於一切。
3. 老嘢都仲會J當年北韓世界盃入8強（加上嗰年英格蘭捧盃份外好J），但大佬，大半世紀前嘅事啦。北韓當時其實都未係好窮（舊文寫過，分治初期甚至係有錢過南韓），而家唔係嗰回事。
韓啤攻略-大同江啤酒，北韓的驕傲（好多圖）
講呢啲主要係想講，兩韓分治初期，北韓國力明顯強過南韓。唔單止係軍事，工業亦都係（亦 多得日治時代嘅分工，北工南農）。最重要係， 行社會主義嘅北韓，經濟係好過資本主義嘅南韓嘅！呢個兩韓分治初期，講緊係頭二十年。然後南韓先追返上嚟。 足足去到1970年，韓戰廿年後，南韓嘅人均GDP先追過北韓 – 夠晒諷刺嘅係，除咗外國勢力，主要係多得獨裁者朴正熙 不過呢啲已經係咸豐年代嘅事。 舊文有寫，而家南北韓經濟差天共地， 北韓差不多世界最窮（但其實都未真係包尾，低處未算低） 。南韓就其中一個最富裕嘅國家。 想講嘅係，點解大同江啤酒係北韓人嘅驕傲？因為， 啤酒似乎係北韓而家唯一一樣勝過南韓嘅東西。以前在運動可能係（北韓世界盃一早入過八強， 唔使靠出術添 ），但而家南韓差不多每一方面（除咗軍隊人數）都勝過北韓 就係啤酒例外。 當然呢個，亦都多得 南韓嘅啤酒實在好難飲。係世界知名嘅西啤。我同好多男仔唔同，我幾鍾意韓國，甚至嘢食都係。唯獨係啲啤酒就真係唔掂。其實啲燒酒露我都好怕。冇正式統計，但觀乎啲韓國佬真係嗜酒如命 ，就連啲後生韓妹都係千杯不醉咁 。啲燒酒啤酒廣告好多都係韓國女明星做代言 – 在香港好似唔見噃。 而亦有人反駁，啤酒呢啲嘢，好大程度係marketing。個個話好飲難飲，只係偏見。Blind test 根本冇幾多人分到， 可能係，我唔敢講我味蕾好敏感。但就連 經濟學人都話南韓啤酒很西 ，唯一一樣北韓叻過佢嘅嘢 關於南韓啤酒點解咁西，篇文有講。 主要都係因為冇競爭，兩大巨頭玩晒。 一係就喜達／海特（Hite）。 55% market share，完全係痴線，特別係啤酒呢啲咁激烈而消費者價格好敏感嘅行業。又，而家真露都係呢間嘢出。 而家代言人係Red Velvet個隊長，之前N年係IU。又話說呢隻咁嘅Hite 啤在日本好賣得， 明顯係啲架佬鹹濕，硬晒就分唔到咩味，或者隔離飯香。 唔係喜達，就係OB ，Oriental Brewery。Cass啤亦都係佢。而家係外國AB InBev擁有。 呢兩間嘢加埋，好似係98定99% market share。而家加埋日韓交惡，杯葛日本啤酒（其實本身都好少人飲）。 經濟學人自己實地研究，唔止味道差不多，根本就連價錢都一樣 – 典型嘅Duopoly合謀定價。 呢啲亦都係多得以前啲法律，保護財閥。 依法治國嘛，以前啤酒廠，要有100萬升嘅產能先拎到牌，否則只能自己即場賣，咁即係細廠唔使玩。早幾年先放鬆到12萬升 最正嘅係，經濟學人呢篇文，聽聞就在韓國引起掀然大波，迫使南韓政府都改例。 後來文在寅上台，自己祖藉係北韓人，明顯冇上手咁敵視北韓。韓國人甚至聯署話要引入大同江啤酒，搞到南韓啤酒廠大力反對云云-因為驚唔夠人鬥。
4. 北韓足球隊近況啦喎，好似都算不錯，五連勝。但七月三場在印度踢啲太公波，難以作準。外圍賽分組賽近兩場倒係兩戰全勝嘅。不過在呢五連勝之前，連輸咗六場波。
5. 實情都係錢話事（況且北韓亦唔係好多人，更唔係多人踢波）。而家南北韓足球水平，其實相差相當大。信科學，睇Elo ratings（有更好嘅方法請舉手），南韓係亞洲二哥，僅次於伊朗。北韓在世界排到一百開外，亞洲都近廿名，同越南泰國咁水平（你可以話越南突飛猛進嘅）
6.兩韓計Elo 分數 ，爭成400分。即係幾多？大約係世界頂級（法國或比利時，任你，反正都係講法文食薯條食蝸牛），同芬蘭咁嘅水平分嘢—咁你話，都唔係冇得打喎。又真係唔係冇得打的。事實歷年南北韓足球隊交鋒，其實好多時都係一球上落，唔知係咪顧及兄弟之情，同埋唔想北方朋友返去被勞改（其實呢啲係都市傳說，邊有咁多勞改，否則咪次次換一班人？況且，踢得波嘅都特權階級—雖然唔係免死）
7. 由於近期兩韓關係（其實係北韓同美國）惡化，呢場波特別受注意。肥仔金忽然又射下飛彈（？）咁，連累我囡囡上個月都係睇唔到板門店Joint Security Area。佢好似第三次去首爾都睇唔到，我都有朋友去幾次先睇到。我反而第一次去仲要臨時訂都去到，注定我係韓妹救世主。
Korean World Cup derby will not be seen in Seoul
Broadcasters confirm fears that Tuesday’s meeting between the sides will not be seen back in South Korea, no comment from Fifa or AFC.
8.亦由於局勢緊張（有啲啦），所以呢場波呢，係冇電視直播。北韓固然冇得播（怕輸？），南韓亦都冇得睇。亦都唔會有作客球迷。不過聽聞有主場球迷。仲有黃牛飛（？？？）添。盛惠五十蚊港紙，等於十公斤米。不過遊客有冇得睇都仲係唔知。但憑我片面認知呢，當地人係唔會買飛，亦唔使買飛，買都唔係呢個價。想人冇飯開咩。應該係免費「請」佢地入場做人肉佈景板。
9. 至於南韓球員同教練團又點？你估到了，雖然好近，朝鮮半島有幾大丫，況且寫過多次，首爾係極之近三八線，開車一個鐘去到北韓（唔中地雷的話）。但就梗係咪撚諗住在首爾開車上去啦。撇除地唔地雷之類嘅問題，真係諗得太多。坐飛機由首爾飛平壤？都係諗多咗，冇呢條線，亦都冇火車（炸咗）。
10. 所以，就梗係經大陸飛，可以幫襯惡名昭彰嘅高麗航空。客隊食完個飛機餐應該都冇咗大半戰鬥力。
11. 不過講返，南北韓雖則理論上仲係交戰狀態，又好似敵對。但又真係只能講句太極旗標揚生死有情，真係由始到撚都仲係玩血濃於水。固然新一代可能已經冇乜感覺，但兩國至少在體育上，一直冇中斷交流，甚至可以奧運出聯隊（踢走幾件南韓妹加幾件北韓喎，在香港唔畀人屌死？），十分奇情。而南北韓亦唔似其他世仇，從來冇拒絶對方作賽。
12. 所以，兩韓足球隊，其實都肯定唔係第一次交手。踢過N場。不過如果真係講作客平壤，對上一次講緊1990年了。踢過場友賽，你見上面華盛頓郵報篇文都有講，南韓仔講到十分緊張，但為和平出力，最後北韓反勝2-1。當其時其實兩韓關係相當不錯。呢次亦係史上唯一一次南韓作客平壤，今日就第二次。反而北韓作客南韓就相當多（但，冇人變節？）
13. 打後，仲要講1993年嘅世界盃外圍賽。又係南北韓交手。北韓早早出局，但南韓同日本爭最後一個位。結果日本對伊拉克補時失波畀人追和，南韓就大炒北韓三球，日本無緣入世界盃，韓仔J到今日嘅 「多哈奇蹟」（自己入都唔係重點，重點係日本冇份），日本人而家都記得嘅「多哈之恥」。
14. 北韓順水人情之後，就局勢大變。金日成釘蓋，經濟崩潰，大饑荒，權鬥。結果93-98 唔玩國際賽。然後時間好快去到2002年世界盃？又關北韓事？係唔關事，亦都冇同南韓交手，2002亦都冇入決賽周。但2002世盃係日本韓國主辦，正所謂同市共榮，是真的，北韓人聞說十分支持南韓，話晒大家血濃於水。我理解就係，南韓對任何隊，北韓人都會支持佢地贏，除咗係對返北韓。
15. 時間再去到2005年。點解要講？因為，呢次係對上一次北韓在主場輸波，都幾堅。係喎，雖則南韓自1990都冇作客平壤 ，但北韓體育上只係93-98年鎖國，之後一路都有外隊作客平壤（香港都去過啦）。2005年對伊朗，就係對上一次北韓在主場輸波。其實伊朗當年都係勁旅，北韓輸波好合理，但觀眾一樣小理，掟晒嘢，球證又掟球員又掟。果屆北韓嘅外圍賽極之失敗，分組賽包尾出局的（當然唔係第一階段）。有冇勞改唔知，但至少，外隊係繼續作客平壤（不過冇人贏到），南韓除外。
16. 去到2010世界盃就係關鍵。又留意當時南韓總統係李明博，唔再係親北韓，亦唔玩陽光政策。偏偏呢屆世界盃外圍賽就抽到兩隊一齊。但做乜話南韓冇作客北韓？你估到了，因為場波搬咗去中立場，在上海踢。原因？正係李明博上台兩韓交惡，而且北韓唔肯畀在金日成競技場升偽政權嘅太極旗，亦唔肯畀客隊播國歌。所以唯有中立場踢。斷估今晚係有旗升有國歌？搵人研究下。
17. 講返2010世盃，完全係玩鳩李明博。因為南北韓唔止第一階段分組賽同組，第二階段又抽埋一齊！照舊，北韓冇在平壤主場，在上海踢。結果呢四場波，其實三場打和，到最後一場北韓作客首爾就輸波，北韓堅持南韓人落毒。嘻。但無論如何，見到其實踢落差距好似唔係咁大，或者真係自己友唔會咁重手，冇南北越咁重手。
18. 2010年世盃十分重要 ，因為係史上第一次南北韓一齊踢世界盃，亦好似係唯一一次。你話，1966呢？1966年南韓就冇玩的。放心，2010年世界盃冇抽埋同組（抽簽根本不能抽埋一齊）。想講嘅係，北韓唔知，但南韓人肯定仲係好支持北方兄弟，又射飛彈又炸船又乜，都始終係兄弟，十分大朝鮮膠。朴智星都係咁講，同文同宗自己友嚟的，當然支持北韓隊。被問到如果北韓對美國，親兄弟同養父對決，七成南韓人都支持北韓，少過一成會支持美國。呢啲咪民族意識，係跨越國家的（當然在南韓嘅論述由始到撚朝鮮半島只得一個國家，北邊都係佢地的，反之亦然）
19. 背景大約講到呢度。想補充嘅係，朋友2017年已經去平壤跑馬拉松，當其時又正值南韓作客北韓 — 不過係女足。亦係在金日成競技場。唔知有冇升國旗唱國歌，或者女足WFC啦，政治嘅嘢好彈性。朋友憶述，當年係雙料娛樂一雞兩味，馬拉松最後跑返入金日成競技場，咁有「現場觀眾」打氣。但同時間入面又踢埋波，又一齊打埋氣。
20. 今日場波啦喎，講波，南韓一定高一班起碼。不過反正其實首名出線全無難度，顧及同胞感情，照計都係一球上落。睇下點。
如欲優先下載《體波台》、《Stretford End》、《The Boot Room》及《Invincibles》等多個足球評論節目，請加入體嘢贊助會員計劃。方法如下：
1. 下載Patreon手機程式及開通帳戶；
2.搜尋體嘢專頁（patreon.com/sportsyeah)並訂閱體嘢；
3.支付5美金月費（相等於39港元）。
