剛過去的國際賽週，拜仁慕尼黑門將紐亞（Manuel Neuer）繼續壓倒達史迪根（Marc-André ter Stegen）擔任德國國家隊門將，不只使後者抱怨，連國內外輿論都對此非議。拜仁高層兩大話事人漢尼斯（Uli Hoeness）和路明尼加（Karl-Heinz Rummenigge）同時開腔撐紐亞，既反駁達史迪根的言論，更斥責德國足協沒有保護紐亞。
漢尼斯謂：「要處理紐亞做正印嘅問題係個笑話。所有德國西部嘅傳媒都走去撐達史迪根，好似佢贏左17次世界盃冠軍咁，但我未曾見過德國南部嘅媒體咁樣撐紐亞喎。」
「紐亞咁多年來都係世界最佳門將。佢之前傷左一段時間，但只要佢搵返狀態——而家佢的確搵得返狀態，咁就乜都唔駛講，佢就係德國隊正印。我本來期待德國足協會更支持佢，不過大家都知我地同德國足協有幾多牙齒印。」
漢尼斯明言，德國足協對拜仁球員的態度惡劣，「我仲記得我地有三個球員被足協強行革扯（湯馬士梅拿、曉姆斯、謝路美保定），而家又要搞埋紐亞。有啲嘢同路維開口傾咪得，但有球員又可以公開地講（指達史迪根公開抱怨為沒有正選而表示失落）。」
「我地以後唔會容許我地嘅球員畀人無緣無故地搞，達史迪根係好門將，但紐亞好過佢咁多，仲有大把經驗啦，仲使講呢啲（紐亞讓出正選）？冇人會懷疑紐亞係德國國家隊正印門將。只要佢健康就可以一直出場，佢一直都係最好嘅門將，乜都唔使講。」
路明尼加亦出聲撐紐亞：「我地冇幾耐會同紐亞續約，因為我地非常感激佢對拜仁嘅貢獻。我地都知道佢嘅實力。上星期六佢對萊比錫紅牛再次證明自己，佢場場波都可以證明自己。」
「我地感謝紐亞，我亦希望德國同德國國家隊都識得感謝紐亞。」
如欲優先下載《體波台》、《Stretford End》、《The Boot Room》及《Invincibles》等多個足球評論節目，請加入體嘢贊助會員計劃。方法如下：
1. 下載Patreon手機程式及開通帳戶；
2.搜尋體嘢專頁（patreon.com/sportsyeah)並訂閱體嘢；
3.支付5美金月費（相等於39港元）。
資訊浩瀚；東張西望。
竭盡所能；深入求真。
企高一格；全新體法。