高普：也許我在發夢（下篇）
引領利物浦復興的高普（Jurgen Klopp），在〈The Player’s Tribune〉分享自己人生的真諦。充滿激情的他，由多蒙特的小故事，談到自己初為人父的艱苦，再講起自己嘅執教生涯，以及反勝巴塞嘅傳奇一刻。
作者：高普（Jurgen Klopp）
出處：The Player’s Tribune
上篇鏈結
我見證住一個小小嘅足球，如何改變球員嘅命運——埃及文明，仲有好多球員嘅成長故事，都係不可思議。相對起佢哋嘅苦況，我細個嘅經歷簡直不值一提。一路走來，佢哋明明有太多時刻可以放棄，但佢哋拒絕退縮。
佢哋都唔係神。只係一直唔肯放下自己嘅理想。
我認為足球呢回事，有98%嘅內容係你喺受挫之後嘅第二日，仍然笑住享受，然後喺下場波尋找樂趣。我喺失敗之中開始學習，尤其是執教生涯第一次嘅教訓。2001年我接掌緬恩斯，但問題係我喺緬恩斯踢咗十年，球員同自己都係朋友，一下子我由隊友變成教頭，佢哋仲稱呼我「Kloppo」。
當我第一次公布出場陣容，我認為最好嘅方式係要面對面同每個球員講，但問題係，當時球隊安排兩人同房。所以大家想像到，我要由第一間房開始，每次都要同同兩個球員講「你聽日有正選踢……或者『唔好意思聽日你後備甚至無份入大軍名單』」，我就明白自己嘅方法何其拙劣，然後會有人問︰「喂Kloppo……點解（我冇份）嘅？」。其實好多時候我畀唔出答案，唯一只可以講︰「每場波只可以派十一人踢！」。
不幸嘅係，我要連續入八間房重複做同一樣嘢，翻loop「你聽日有正選踢……或者『唔好意思聽日你後備甚至無份入大軍名單』」，然後再loop「喂Kloppo……點解（我冇份）嘅？」！
哈哈哈哈，真係諗起都攰啊！
不過呢一次只係我第一次犯錯，之後我重重複複咁中伏，但又可以點先？咪就係重重複複咁抹好啲屎，繼續從錯誤中學習囉。
仲唔信我講？不妨諗下：我足球生涯最重美妙嘅時刻，都係始於一場災難。
歐聯四強作客慘敗巴塞隆拿三球，仲唔夠差咩。當我哋準備第二回合，我賽前要講嘅野簡單直接。呢舖唔使搵Rocky，我開門見山：「我哋冇兩個世界上最好嘅前鋒，全世界一致睇死我哋，老老實實我哋出線機會都真係好忟水，但今場落場嘅係你哋每一位——因為你哋，一切都有可能。」。
我真心相信做得到，唔係因為佢哋能力驚人，而係因為佢哋生活經歷同克服嘅困難。我只加一句：「就算要輸，我哋都要用最淒美嘅方式去輸。」
講還講，我只係企喺場邊大聲嗌嗰位，換著落到場嘅球員，完成呢件事就好困難，但因為呢班球員，加上晏菲路球場嘅五萬四千人，最後我哋真係完成呢份創舉。足球最美妙嘅地方，係一己之力不足以成功。真架，信我啦。
最唔好彩嘅係，歐聯史上最精彩嘅一剎那那我係……睇唔到。呢啲唔通係領隊生涯嘅寫照？但我真係睇唔到亞歷山大-阿諾（Trent Alexander-Arnold）嘅天才時刻。
我當時見到球隊拎到角球。
我睇住TAA行去角球旗，跟住見到沙基利（Xherdan Shaqiri）都行埋去角球旗。
我轉身準備換人，於是走去助教身邊……每次我諗起都毛管戙……我只係聽到現場慶祝嘅聲音咋。
我轉身望一望，個波飛咗入網。我望住活賓（Ben Woodburn）。佢話：「頭先發生咩乜？」
「我都唔知！」
成個晏菲路球場呢……好瘋狂，我幾乎聽唔到助教講乜。佢大嗌：「咁仲換唔換人呀？」
哈哈哈，我唔會忘記呢一刻，佢呢一句永遠存在喺我腦海。
你想像到嗎？教波十八年、花數以百萬計小時睇各樣大小比賽，我居然錯過咗球場上最出奇嘅入球。自𠴱晚之後，我翻睇奧歷治（Divock Origi）嗰腳入球五十萬次，但現場我只係見到個波入網咋。
完場後我返去自己嘅小靴室，啤酒都冇飲一啖。我根本唔需要。我靜靜地坐低飲咗啖水，會心一笑。興奮嘅心情難以言喻。當我返屋企，家人、朋友都歡迎我，大家都有慶祝嘅心情，但我已經亢奮到筋疲力竭，獨自返房休息。渾身一片空白。
l
嗰晚我訓咗人生之中最好嘅一覺。
最正嘅係，第二朝訓醒發現一切係真嘅，「真係發生左！」
對我來講，足球係唯一比電影更有啟發嘅事。朝早起身、夢境成真，真係打贏Drago架！
自六月起，當我地拎住歐聯獎盃進行勝利巡遊，我無法形容當日嘅心情。我哋坐住巴士遊走街巷，每當我以為巡遊完畢，一轉角又有利迷迎接我哋，好夢幻嘅感覺。如果可以將嗰日嘅愛或喜悅收藏得住，世界一定更美好。
我腦海裏仍然出現當日嘅一切。足球賦予我生命中嘅一切，但我仍然想回饋社會更多。說來容易，其實點做先可以帶來改變？
過去一年，我見到好多球員（馬達、曉姆斯，以及美國女足球星Megan Rapinoe）加入Common Goal行動。或者你未了解佢哋嘅工作，實則呢事相當了不起。有超過120位球員捐出自己1%人工，去支持呢個非牟利組織，將足球傳達世界不同角落，包括南非、津巴布韋、柬埔寨、印度、哥倫比亞等等國家。
唔只世界上最富有球星支持呢件事，加拿大女子足球隊全部正選球員都有參與。來自日本、澳洲、蘇格蘭、肯尼亞、葡萄牙、英格蘭及加納等國嘅球員都有參與…..你點會唔為佢動容呢？足球嘅本質正是如此。
我想成為當中一份子，於是我願意貢獻自己1%人工去支持呢個組織，希望足球世界有更多人嚮應參與。
坦白講，我哋係極其好運嘅一群人，所有有責任去回饋社會上需要機會嘅小朋友。
我哋唔應該忘記現實生活裏嘅困難，足球場上發生嘅都唔係真正嘅問題。足球唔只事關名、利，仲有更多有意義嘅目的。試想想，如果每位球員都願意捐出1%人工，我哋嘅力量可以點樣改變世界？可能我想法好幼稚，可能我係一個鍾意發夢嘅老人家。
但足球係為邊啲人存在？
咪就係每一個鍾意發夢嘅人！
如欲優先下載《體波台》、《Stretford End》、《The Boot Room》及《Invincibles》等多個足球評論節目，請加入體嘢贊助會員計劃。方法如下：
1. 下載Patreon手機程式及開通帳戶；
2.搜尋體嘢專頁（patreon.com/sportsyeah)並訂閱體嘢；
3.支付5美金月費（相等於39港元）。
資訊浩瀚；東張西望。
竭盡所能；深入求真。
企高一格；全新體法。
