高普：也許我在發夢（上篇）
引領利物浦復興的高普（Jurgen Klopp），在〈The Player’s Tribune〉分享自己人生的真諦。充滿激情的他，由多蒙特的小故事，談到自己初為人父的艱苦，再講起自己嘅執教生涯，以及反勝巴塞嘅傳奇一刻。
作者：高普（Jurgen Klopp）
出處：The Player’s Tribune
是咁的，我要由一個有少少令人老尷嘅故仔講起。因為，我好驚好多人將我哋呢啲足球員、教練當成係神。作為一個基督徒，我知道只有一個上帝，而且我保證上帝同足球肯定冇關係。事情真相係，我哋都會失敗，而且係經常失敗。尤其是當我後生教波，我成日失敗。
呢個故仔，只係眾多例子中其中一個。
2011年，我帶領多蒙特對拜仁，係整個德甲最多人留意嘅一戰。我哋有成20年冇作客打贏拜仁。而我係一個喜歡從電影搵靈感嘅人，所以每當我需要激勵球員嗰陣，我就會諗到《Rocky》（史泰龍主演電影系列《洛奇》）。我覺得全世界嘅公立學校都應該播晒《Rocky》系列，同學ABC一樣係必修課。如果你睇完呢啲電影之後唔想登上巔峰，你仲唔係有問題？
所以我哋對拜仁之前一晚，我聚集所有球員，喺酒店做賽前準備。球員全部坐低，仲熄晒燈。我同他們分析形勢：「對上一次多蒙特喺慕尼黑贏波嗰陣，你哋大部分人仲係押尿片咋。」
跟住我開始播放《Rocky 4》嘅片段——即係有Ivan Drago做奸角嗰套，絕對係經典。當時Ivan Drago用梗跑步機，成身都用電線駁住電腦，身邊嘅科學家分析佢嘅數據，大家仲記唔記得先？我同球員講：「嗱，拜仁咪係Drago，佢哋樣樣都好勁揪，最好嘅科技、最好嘅架生，冇得頂架。」
然後畫面開始播住Rocky喺西伯利亞嘅小木屋訓練。佢劈完松樹，孭住木頭喺雪地一路行，喺深山裡面跑上跑落。
我同球員講：「睇唔睇到先？我哋咪就係Rocky。我哋細粒過對面，但係我哋有激情喎，我哋有奪冠嘅決心喎。我哋可以能人所不能喎！」
我滔滔不絕，然後瞄一瞄球員，想望下佢哋有乜反應。我原以為佢哋會亢奮到企喺櫈上面，準備衝上西伯利亞山頂咁啦——
然後佢哋坐晒喺度，雙目無神望住我。
乜反應都冇。
佢哋表情係話畀你聽，「呢條痴線佬講乜9？」
跟住我心諗，「等陣，《Rocky 4》幾時上呢……198x？呢班友又係幾時出世呢？」
最後我問，「等陣先，如果有人知邊個係Rocky，請舉手。」
然後有兩丁友舉手：基爾（Sebastian Kehl）、奧禾莫耶拉（Patrick Owomoyela）。其他人都話：「唔好意思，我唔知。」
好，我成段演講，咁就晒左。呢場波係成季最最重要一仗，或者係好多球員成世人最重要嗰一仗，結果佢哋教頭用10分鐘同你講咩蘇聯科技，又西伯利亞。哈哈哈哈哈！你哋又信唔信先？
跟住我又要重新整多次演講。
你哋睇到啦，呢個故仔係真實發生，係我哋生命中真實發生嘅事。我哋都係普通人。有時候，我哋都會老尷。我以為啱啱嗰場係足球史上最偉大嘅演說，結果完全是亂噏。但第二日我照常起身，由頭嚟過。
你知道成個故事最怪嘅地方係咩？我真係唔記得我哋有冇贏到場波。我覺得我係喺2011年嗰場贏拜仁3-1嘅比賽前夕講呢一席話，如果真係咁，呢個故仔絕對精彩，但我都唔確定。呢啲就係人哋可能唔太理解足球嘅一面。
比數，我哋會成日忘記，咁多比賽好易混淆架嘛。
但係呢段日子嘅球員，我生命嗰段時光，同呢啲小故事，我永不忘懷。
贏到國際足協最佳男子足球教練，我好榮幸，但我唔鍾意一個人上臺上拎獎盃。我職業生涯嘅所有成就，都係因為我身邊嘅人。不只係我球員，仲有我家人、我嘅仔，同由一開始長伴我、支持我嘅人，嗰陣嘅我，係再普通不過嘅一個普通人。
說實話，如果我20歲嗰陣，有人話我知我人生將來嘅經歷，我絕對唔會相信佢點講。就算係MichaelJ. Fox （《回到未來》電影主角）踩住懸浮滑板飛嚟話我知，我未來會發生咩事，我都唔會相信佢。
我20歲嗰年，經歷一個改變我一生嘅時刻。嗰陣我仲係細路，但我要做人老竇。說實話，呢個時間唔多好。我日頭要返大學上堂、踢業餘波。為左畀學費，我要去記存電影嘅倉庫返工——聽住啦你班後生，我唔係講DVD，嗰陣80年代，所有電影都要用底片保存架。貨車每朝6點嚟拎新底片，我哋就托住金屬罐上貨落貨，真係好重好重。我哋祈求嗰日佢哋唔會播埋啲用四罐影片嘅戲，好似《Ben-Hur》（《賓墟》），如果唔係嗰日我哋有排受。
我每晚訓5粒鐘，一大早返倉開工，然後日頭返學校上堂。夜晚我會練波，然後返屋企爭取同我嘅仔共享天倫。嗰段日子好難捱，但係佢令我明白咩係真正嘅生活。
嗰段時間，令我一早就要成為一個認真嚴肅嘅人。我好多朋友會喺夜晚打電話叫我跟佢哋落吧，而我身體嘅每一塊骨頭都想同我講，「好啦，我想同你哋一齊去。」但係我當然唔可以咁做。嗰段日子嘅我，已經唔係為自己而活。屋企嘅細路仔理得你攰唔攰、賴唔賴床咩。
當你要為你帶來呢個世界嘅小生命擔心嘅時候，先係真真實實嘅擔心，先係真真切切嘅難關。不論足球場上發生任何事，都唔可以同呢種事相提並論。
有陣時人哋問我點解會成日笑。就算我哋輸左一場波，有時候我都會笑。因為當我嘅仔出世，我就意識到足球無關生死。我哋不係救急扶危，足球亦唔應該散播困苦、仇恨。足球應該係鼓舞人心、散播快樂，尤其是對小朋友。
（待續）
如欲優先下載《體波台》、《Stretford End》、《The Boot Room》及《Invincibles》等多個足球評論節目，請加入體嘢贊助會員計劃。方法如下：
1. 下載Patreon手機程式及開通帳戶；
2.搜尋體嘢專頁（patreon.com/sportsyeah)並訂閱體嘢；
3.支付5美金月費（相等於39港元）。
資訊浩瀚；東張西望。
竭盡所能；深入求真。
企高一格；全新體法。
