最新嘅數字顯示，利物浦喺上季嘅電視轉播收入高達 £152M，係英超之冠。此外，同歐洲列強相比，利物浦喺呢方面嘅收入亦係最多嘅。
利物浦上季以 97 分成為英超亞軍，同埋喺馬德里擊敗熱刺，成為歐聯冠軍，係球會史上第 6 次。佢哋上季嘅戰績，令到電視轉播嘅收入高達 £152M。喺歐洲，只有兩間球會超過 £150M，利物浦係其中一隊。至於另一隊就係曼城，佢哋嘅電視轉播收入有 £151M。
喺網上講足球商業嘅 Swiss Ramble 進行咗一個研究，係關於英超頂尖球會同歐洲列強喺電視轉播收入嘅比較，發現利物浦亦係居於榜首。
研究發現，利物浦同埋曼城所得到嘅收入，明顯比贏得國内聯賽嘅巴塞隆拿 (£130M)、拜仁慕尼黑 (£87.6M) 及擁有 C. 朗拿度嘅祖雲達斯 (£76.5M) 為多。
更特別嘅係，本身擁有部份世上最出色球員嘅拜仁慕尼黑及祖雲達斯，佢哋嘅電視轉播收入，比上季喺英超護級失敗嘅卡迪夫城、富咸及赫德斯菲仲要少。
上述三間降班球會，佢哋嘅電視轉播收入，合共 £301.2M。
拜仁慕尼黑比上季喺英超只係贏得 3 場賽事嘅赫德斯菲少 £9M，即使佢哋上季成為德甲冠軍，並且晉身歐聯 16 強。
喺英超嚟講，利物浦及曼城所得嘅電視轉播收入係最多嘅兩隊，之後就係車路士、熱刺、曼聯及阿仙奴，佢哋呢方面嘅收入都超過 £140M。
至於英超 「Big 6」以外嘅球會方面，愛華頓同狼隊係最多嘅，分別係 £128.6M 同埋 £127.2M。來自西甲嘅巴塞隆拿喺呢方面嘅收入，正正喺英超「Big 6」同呢兩隊之間。
呢筆收入對利物浦嘅財政狀況嚟講，係另一個令人鼓舞嘅地方。利物浦能夠贏取歐聯冠軍，會有超過 £100M 嘅收入，加上夏天嘅轉會操作，令球會獲得大約 £74M，可見利物浦將來係處於健康嘅狀況。
如欲優先下載《體波台》、《Stretford End》、《The Boot Room》及《Invincibles》等多個足球評論節目，請加入體嘢贊助會員計劃。方法如下：
1. 下載Patreon手機程式及開通帳戶；
2.搜尋體嘢專頁（patreon.com/sportsyeah)並訂閱體嘢；
3.支付5美金月費（相等於39港元）。
