James Pearce分析馬迪普、占士米拿續約情況 | Liverpudlian Ty
The Athletic 嘅 James Pearce 近日發表文章，主要講到占士米拿、雲迪克同祖爾馬迪普嘅合約情況。
利物浦喺 7 月份於 Melwood 開操，年紀最大嘅占士米拿仍然係隊中體能同耐力最好嘅球員。即使有法賓奴、祖爾馬迪普、拉蘭拿及張伯倫等球員，但係佢哋都未能與現年 33 歲嘅占士米拿匹敵。
喺每一個階段嘅操練後，球會嘅醫療團隊會喺球員嘅耳垂位置抽取血液樣本，量度有氧耐力 (Aerobic Endurance)。如果乳酸 (Lactic Acid) 高於某個特定水平，球員就唔可以進行下一輪嘅操練。
占士米拿同 22 歲嘅祖高美斯喺跑步嘅時候，唔單止不落下風，表現更加係明顯比對方優勝。
當佢嘅能量恢復飲料並唔喺實際上佢所預期嘅位置時，佢會咆哮話：「我哋做得唔夠徹底喎，宜家我哋係歐聯冠軍嚟架嘛，係咪？」
呢個就係典型嘅占士米拿，奠定標準、力求並確保冇人會唔盡全力。
占士米拿喺 1 月就會踏入 34 歲。17 年前，佢效力列斯聯，並且首次喺頂級聯賽中亮相。不過，時至今日，佢嘅步伐並冇因此而放慢落嚟。嗰種飢渴感同慾望嘅燃燒，比以往尤有過之。
呢位前英格蘭國腳可以話已經超越咗麥阿里士打，成為利物浦球會嘅光輝歷史上，最偉大嘅自由轉會球員。
四年前，占士米拿決定離開曼城，加盟利物浦。佢已經為利物浦上陣咗 181 場，並且取得 22 個入球，當中包括佢出色嘅射入十二碼紀錄，18 個十二碼，射入咗 16 個，佢係隊中嘅可靠先生。利物浦喺馬德里擊敗熱刺，成為歐聯冠軍，確保咗佢終於有一啲實質嘅嘢，可以反映佢嘅努力。
一個好熱門嘅問題就係，究竟占士米拿會否喺下個夏天之後，繼續留喺利物浦呢？佢同利物浦嘅合約將於 6 月尾屆滿，喺 1 月已經可以同非英國球會傾談加盟前嘅合約協定。占士米拿喺 7 月，參與利物浦季前美國之旅時表示，佢嘅經理人喺上個球季結束時，已經向利物浦洽談。
佢話：「我哋同球會傾過，同埋問佢哋會否想做啲乜嘢，佢哋話冇，跟住就再冇其他嘅消息。有三樣嘢，可用性、體能狀態同埋表現水平，希望我能夠繼續展現出呢三樣嘢。」
據了解，及後利物浦同占士米拿方面，就潛在續約事宜洽談過，嚟緊會有更多嘅會談。
對雙方嚟講，其實都有嘢需要考慮嘅，唔單只係關於米拿日後喺球隊嘅角色。今季 4 場英超賽事，佢只有 1 場為利物浦正選上陣。嚟緊拿比基達嘅傷癒復出，更加會增加咗中場球員之間嘅競爭。
不過喺兩年前，當時 10 月中之前嘅時間，占士米拿只有兩次正選上陣，但係仍然喺 2017-18 年球季，為利物浦喺所有嘅賽事上陣咗 47 次。佢喺歐聯貢獻咗 9 個助攻，打破歐聯嘅紀錄，並且喺基輔進行嘅歐聯決賽中正選上陣。上季佢喺所有賽事正選上陣 31 次，並且有 14 次後備上陣。
占士米拿能夠勝任多個位置亦係重要嘅因素。如果羅拔臣需要休息，或者受傷，米拿能夠成為後備左閘。唔會對建議嘅人致謝，不過佢會集中精神，埋頭苦幹，以球隊為先，就好似喺 2016-17 年球季咁，大部份時間成為球隊嘅左閘。
利物浦亦都考慮到嘅係，占士米拿嘅重要性唔止喺球場上，佢係一個模範同埋領袖。喺離開更衣室之前，占士米拿經常用佢嘅說話，向球員作出正如高普形容嘅「最後一點小動作」。佢每一日都以身作則，同埋如果佢感覺到有人未盡全力嘅話，佢唔會害羞於表達自己嘅意見。
利物浦右閘阿歷山大阿諾話：「見到占士米拿嘅體能同埋狀態嘅水平，真係令人難以置信。呢樣嘢可見佢平時係點樣好好地照顧自己及維持自己嘅水平，兼且反映咗佢喺職業生涯中係幾咁專業。」
「起初，當你入到更衣室，你會覺得佢真係好嚇人。但係最終你會睇到佢內裏比較柔情嘅一面。你只需要喺呢個表面嘅硬淨中「作出突破」！」
「無論佢成為正選定係後備，佢經常都會好多嘢講，佢經常都會俾一啲意見同埋忠告。當佢講嘢嘅時候，你聆聽佢嘅說話，佢係一位對自己嘅專業同技能完全地專注嘅人。」
占士米拿嘅修養及風度，可以喺歐聯勝利巡遊時反映到出嚟。當時佢乘坐嘅開蓬巴士停咗喺一個希斯堡路球場慘劇嘅生還者家屬門外，以便能夠向佢哋展示歐聯冠軍獎盃。呢個動作對於喺 1989 年嘅慘劇之後要坐輪椅嘅 Andrew Devine 嚟講，意義重大。另外，占士米拿基金會亦都提供免費足球訓練營俾當地嘅年青人，繼續為呢個城市發揮作用，作出貢獻。
自從古天奴最終如願轉投巴塞隆拿嘅事件之後，利物浦已經比較擅於留住隊中嘅主力球員。喺過去嘅 17 個月，費明奴、沙拿、軒達臣、文尼、祖高美斯、羅拔臣、阿歷山大阿諾、奧歷治及張伯倫都已經續咗一份長約。
喺上述嘅情況下，宜家仲有一啲球員嘅合約事宜需要體育總監米高愛華士去處理。
關於較早前有媒體聲稱，雲迪克將會同意續一份 6 年嘅新約，利物浦對此感到困惑。佢哋強調，未有相關嘅談判展開，雲迪克同利物浦嘅合約係去到 2024 年。下一批續約嘅球員，應該會係占士米拿、祖爾馬迪普同埋韋拿杜姆。
祖爾馬迪普喺 2016 年夏天，由德甲球會史浩克 04 自由轉會至利物浦，並且簽下一份為期 4 年嘅合約。不過，利物浦已經啟動咗其合約上續約 12 個月嘅選項。喺咁嘅情況下，呢位今季狀態唔錯嘅前喀麥隆國腳，同利物浦嘅合約會去到 2021 年。至於韋拿杜姆，佢同祖爾馬迪普一樣，合約都係去到 2021 年，所以佢哋並唔係需要最迫切同優先處理嘅球員。
處理占士米拿嘅去留問題會比較急切，佢以自由轉會方式由曼城加盟，有高昂嘅簽字費，並且有大約 £120,000 周薪，係球隊嘅比較高薪嘅球員。利物浦過往未有向踏入職業生涯後期嘅球員開出呢類條件嘅習慣。
不過，占士米拿仍然係「物有所值」嘅，佢係一個勝利者，並且向其他人表現出應該點樣做。
如果膠著嘅情況持續嘅話，佢好似史杜歷治及安利簡咁樣，喺夏天自由轉會嘅機會就會漸漸增加。
希望最終唔會係咁樣嘅結果。無論係續約 1 年，甚或兩年，利物浦需要有占士米拿喺隊中，佢仲有好多嘢可以為球隊作出貢獻。
如欲優先下載《體波台》、《Stretford End》、《The Boot Room》及《Invincibles》等多個足球評論節目，請加入體嘢贊助會員計劃。方法如下：
1. 下載Patreon手機程式及開通帳戶；
2.搜尋體嘢專頁（patreon.com/sportsyeah)並訂閱體嘢；
3.支付5美金月費（相等於39港元）。
